Pago Pago, AMERIKA SAMOA

MALAGA MV MANUATELE I MANU’A - SOUSOU LE VASA FA’ALEAGA NISI O MEATOTINO

O le malaga a le MV Manu’atele lll i Manu’a i le afiafi o le aso Gafua, itula e 10:00 i le po, e le’i faigofie le vasa i le sousou ma ua to’atele na lagona le faigata o le folau i le tai sousou.

Na fa’alogoina le fetosoa’i o le uta o ta’avale ma isi mea totino uma sa fa’ae’e faatasi ma le pasese e to’atele na’ua, aua sa malaga ai sui tofia mai le Ofisa o le Kovana, sui tofia e malaga mai le Faletupe o Atina’e fa’atasi ma le latou fa’atonu. 

Sa malaga foi sui tofia mai le Matagaluega o le Saogalemu Fa’alotoifale ma le latou sui fa’atonu, sa malaga mai ai fo’i sui tofia mo galuega o le aso iloga o le Manu’atele mai le Ofisa o le Mataupu Tau Samoa. Sa  malaga atu ai fo’i le Ofisa o le Land Grant mai le Kolisi Tuufa’atasi ma le latou fa’atonu.

O le to’atele fo’i le mamalu lautele o e sa lisia o latou suafa i le lisi o lea pasese ina ia oo atu e molimauina le sisigafu’a a le Manuatele 2021.

Ina ua taula le va’a i le uafu o Falesao, sa iloga ai o mea na ta’ei o mea ua fetosoa’i, o mea sa taia solo i le puipui o le va’a, o uta o ta’avale. Peita’i e le toe mafai ona feoai nisi e siakia ni uta ona o le fita o le vasa sousou.

O le fa’afetai ona ua toa’i taunuu le va’a, ae le o i ai se fa’aletonu i le ola o le aumalaga, ae ua na’o se ta’avale a le KVZK -TV ua matua maomi ma ua leaga le pa’u, ua le toe mafai ona ave mai i fafo mai le va’a.

Fa’afetai i le Kapeteni o le va’a i lenei malaga, ua tautai a’e i ou faiva i le manuia. Sa auai i luga o le MV Manu’atele se sui o le Samoa News. 

O le taimi nei, o le a taula lava le Manu’atele lll seia mae’a le sisigafu’a i le aso Faraile ona fa’ato’a toe fo’i mai lea iinei ma lana pasese ua fa’atulaga.

O le aso Lua e malaga ai i Ofu ma Olosega ina ia aumaia uma tagata mo le Farm Fair poo le fa’aaliga tele a le Aufaifa’ato’aga i le Faletaalo i le Laumua o le Segaula. Ua fa’atulaga foi le fanauiti o lo’o auai i aoaoga fa’apitoa mo le taumafanafana o le a faia latou asiasiga i lenei faaaliga tele ua fa’ato’a faia lava lea i Manu’a i lenei tausaga.

O le aso Lulu fo’i o le a toe malaga fo’i le Manuatele lll e toe aumai ua fo’i sui mai Oosega ma Ofu ina ia auai mai mo le fa’aaliga o faigafaiva ma ua fa’apea fo’i mo le toe aso mo le sisigafu’a 2021 a le Manu’atele.

3 AOGA MAEA PASIA MAI E LE KOMISI E PASIA AGAVA’A  O AOGA 

E tolu aoga a le malo ua mae’a fa’ailoa mai e le Komisi e Pasia Agava’a o A’oga i le itu i Sisifo o le Malo tele, ua pasia lelei e i latou a latou suesuega na faia aua le toe a’e mai i ai o le fanau a’oga i le tausaga a’oga fou.

O aoga ua pasia le latou ta’i ono tausaga, ma ua aofia ai le A’oga maualuga Samoana, Aoga Matata Eseese a le Nuuuli Voctech High, ma Faleasao Elementary.

Ua fa’ailoa mai le ta’i 6 tausaga lea ua atofa mai ai le latou pasiga o nei a’oga uma, peita’i ua toe fa’ailoa mai e ta’i lua latou asiasiga o le a faia mai pe a mae’a le afa o lea taimi atoa ua pasi mai ai.

Ua fa’ailoa mai e le susuga le Taitaifono Gregory A. Franklin, “O le mafai ai ona ausia lenei tulaga ona ua matua mae’ae’a lelei ona faatulaga mea na mana’omia ona faia e aoga ua mautu lelei ma ua talia ai a latou fa’afesili moomia mo le pasiga.”

“O le pasiga o nei a’oga, o le a fa’amoemoe lava ia fa’aauau ai ona fa’apea le fa’atautaia tonu aoga uma nei e tusa o fa’ata’atiaga ua mae’a tapena e le matou komisi i taimi uma. O le isi mea e mana’omia, ia fa’aauau ona i ai sui o a’oga nei ua mae’a pasia le suesuega, i le vasega o sui e asiasi fa’atasia le latou aoga, i soo se taimi.”

Ua fa’ailoa mai fo’i e le susuga le Fa’atonu ia Talauega Asaeli, “Fa’afetai i le galulue fa’atasi o pule aoga, faia’oga, le aufaigaluega, PTA ma matua uma ae maise lava le fanau a’oga, ina ia ausia lenei pasiga. Fa’amalo ia te outou ona o lo outou loto ma le alolofa i fanau, aua le lumana’i manuia o le atunuu ma le tatou malo. Malo le galulue ma le loto.”

LAVEA ALII FAIGALUEGA A LE ASPA - FA’ALELEIA O LAINA ELETISE

O le aso Faraile na tea sa motusia ai le eletise e oo mai i Nuuuli, peita’i, sa le mautinoa e le to’atele le mafuaga o lea motusaga. Peitai ua fa’ailoa mai e to’atasi se ali’i faigaluega a le ASPA vaega a le a’u toso laina, na avatu ai se tasi o ali’i faigaluega o laina eletise i le falema’i, ina ua a’afia i se fa’alavelave fa’afuase’i a’o fa’atautaia galuega tau laina eletise.

O ona manu’aga e le afaina tele sa togafitia mo sina taimi o le po ma toe te’a ai i tua i le aiga ma o le a vaava’aia toto’a pea o ia ma ona manu’aga, o se tala lea a le ali’i CEO o le ASPA, Wallon Young.

O le fa’alavelave lea sa tupu i luga o le pou moli o loo i ai le Feeder #7 lea e fa’afesaga’i ma le Moso’oi Building i Tafuna.

Na fa’atautaia mai le galuega a lenei sui mai le Loli o lo’o i ai ma le Pakeke, sa taumafai le ali’i faigaluega e fa’atautau mai fa’apitoa ina ia koneti mai i le pou i se taimi mulimuli ane i lana lava lea galuega, peita’i a’o taumafai o ia e fa’atautau lea uaea, ua ane le uaea lea ma se tasi o uaea ola o le eletise.

O le taimi lava lea sa sioti ai loa le uaea ma ua pa ai, iu ina feosofa’i ai ma le Feeder #7, ma ua motusia uma ai le eletise mai lea laina. O i si sui na latou faigaluega fa’atasi na fa’ata’alise atu ma ave’esea mai le sui ua a’afia mai le Pakeke ma aumaia fa’atopetope mai loa o ia i le falema’i i Faga’alu.

E tusa ma le 25 minute ae toe mafai loa ona fa’aola le laina o le atoa o le Feeder #7 ma ua fa’aoo mai fo’i le vala’au ua toe atoatoa mea uma sa fa’aletonu.

Ua mae’a asiasia fo’i le ali’i faigaluega e sui sinia o le aufaigaluega atoa ma uia fa’ailoa mai e Wallon, le ali’i CEO o le ASPA, O lo ua fa’atautaia le suesuega atoatoa lava o le mea tonu na tupu.

MAE’A FAALELEIA CT-SCAN A LE FALEMAI LBJ MEDICAL CENTER

Ua faailoa e le LBJ Medical Center , ua mae’a toe faaleleia nei le latou CT SCan poo le fa’aata malosi e mafai ona faia ai fa’aata o le ulu, ma isi totoga uma e tausailia ai le gasegase ma le tulaga ogaoga o i ai mo soo se tasi. Ua silia ma le lua vaiaso o ta’atia le mea faigaluega ona sa taumafai ona toe fa’aleleia nisi o ona totoga e tusa ai ma le fa’amatalaga a le CEO Faumuina John Faumuina.

O le tala mai sa fa’ato’a oo mai totoga sa tatau ona faaleleia o le CT Scan i le va’a ole Cargo i le aso Toona’i na tea. Na malaga mai fo’i ma le ali’i inisina fa’akonekarate e le mai e le LBJ mai le Medpharm na te lipeaina le tatou CT Scan.

O lo tumau pea iinei lea alii Inisinia se’ia uma lana konekarate mai le LBJ Medical Center. O lelei lea o nei ituaiga o konekarate e fetaui tonu lona tomai ma le tatou CT Scan, na fa’apipi’i lava totoga i le afiafi o le aso Toonai ma amata loa ona fa’aaogaina le masini fa’aata malosi lea.

I le taimi nei o lo’o aiaia pea le aumaia o totogi ma le fa’apipiina e le Inisia fa’apitoa lea, o se vaega o le feagaiga na osia ma le MedPharm, ma e toe fa’aleleia lava e le Medpharm le CT Scan i soo se taimi e leaga ai ni ona totoga.

Ona sa le mafai ona fa’aaogaina le CT Scan, ae tupu mai le faalavelave fa’afuase’i ma afaina ai le tamaitai e 16 tausaga, sa le mafai ona faia se fa’ata lea mo lea talavou. Sa va’aia le oso fa’ama’ilili o le tamaitai lea, ae sa manatu matua e ao ina faia se fa’ata pe le o afaina le faiai ua poloka ni alatoto poo piliki fo’i i totonu si o la’ua alo. 

O nei togafitiga uma e tatau lava ona mua’i faia le fa’aata malosi lenei, e mautioa ai le mea o tupu i le faiai o le talavou.

Ua fa’ailoa foi se manatu o le ali’i Inisinia o le CT Scan, e tatau ona amata faia se gaoioiga e fa’afo’ia ai le tulaga o le leaga mai o le CT Scan ae o lo ua mae’a i ai totoga moomia iinei.

Ua manuia lava togafitiga o le talavou lea sa afaina mai le fa’alavelave lea, ma ua toe te’a nei o ia i tua mai le falema’i i le aso Faraile ua te’a, ua toe savali lelei lava, ua le toe oso fo’i lona ma’ilili.