Ads by Google Ads by Google

Tala I Vaifanua


O se vaaiga lea i le taimi o le sisigafu'a, i le tutula'i mai fo'i o nei leoleo tama'ita'i i o latou tiute fai mo lea aso taua o Amerika Samoa. Capt Kilisitina Tema Afo, [tupito Taumatau] la'eia le toniga a leoleo. [ata: Leua Aiono Frost]

LITAEA CAPT. KILISITINA TEMA AFO - 33 TAUSAGA TAUTUA I LE DPS:

 

Ua mae'a ona fa'asolo ma ua sauni le Tama'ita'i Kapeteni Kilitina Tema - Afo e litaea mai ona tofiga i le Vaega o Fa'amaumauga a le Matagaluega o le Puipuiga o le Saogalemu Lautele (DPS) i le aso Faraile nei.

 

"O le mafuaga fo'i o le litaea mai galuega ma le faiva sa fiafia e tautua ai i le atunu'u lautele ae maise le Faigamalo a Amerika Samoa, ona ua o'o tausaga i le vaitau e malolo ai ma tapenapena fo'i le olaga mo tiute fa'atagata matua o le aiga. Ua atoa le 66 tausaga o le soifua, ma ua agava'a ai ona talia manuia sa fa'apolopolo mo lea fo'i vaega o le soifuaga, ae o lo'o i ai pea le malosi o totoe e soifua fiafia ai,” o sana tala ata lea i se talanoaga ma le Samoa News.

 

O lenei tausaga ua atoa i ai le 33 tausaga o lana tautua i le DPS ma sa amata mai lava lana tautua o se tama'ita'i sa a'otau e avea ma se Leoleo ma na fa'afaigaluega fa'ata'ita'i i lea faiva i le toese i Tafuna i le 1984.

 

Ia Fepuari 1985, ae maua lona tusi faamau e avea ma Tama'ita'i Leoleo mai le Komesina o leoleo Afioga le Tamaalemalo Aomoeualogo Te'o J. Fuavai i le ulua'i nofoaiga a Kovana A. P. Lutali.

 

I lona olaga faigaluega fo'i o se Leoleo, e to'a sefulu nofoaiga a Komesina o Leoleo ua ia tautua ai, ma ua ia fa'aalia, "E tofu lava i latou uma nei, ma le tele o ni mea aoga ua ou maua mai ai i ala o latou pulega, le fa'atinoga fo'i o tiute, ma le latou fo'i una'iga malosi o i matou uma o leoleo tiute, i le fa'atinoga o galuega e tusa ai o ala o le tulafono. O le fa'afetai sili lea ua mafai ona ofoina atu ia i latou uma na, sa ou maua le avanoa ou te galue ai i a latou ta'ita'iga."

 

E ese mai le vasega o Komesina, ae i ai fo'i i latou sa matua vavalalata lo latou galulue faatasi ma Kilisitina i Tiute fa'atino i totonu o le matagaluega.

 

Na mua'i avea ma Leoleo Tama'ita'i mo le Vaega a le Parolman i le Ofisa Ulu i Fagatogo. Ma sa avea foi ma leoleo i le vaega o le CIIB ta'ita'ia e Tauese Va'aomala Sunia i lena vaitau, ae faigaluega fa'atasi ai ma le afioga Falana'ipupu Ta'ase Sagapolutele.

 

"I lea vaega o lo'u olaga faigaluega, o se vaitau faigata tele, aua o lea fa'ato'a ou o'o ai le faiga o sailiga ma suesuega tetele i le mafuaga o le maliu o nisi o lo'o masalomia e ese se ala ua mafua ai ona oti, ma e tatau ona sailiilia tino maliu ma faia fa'amaumauga aua le fa'amasinoga."

 

Sa fa'amatala e Afo le faigata ia te ia ona suesue tino maliliu o nisi sa fa'atonuina e ao ina suesuea lelei mo fa'amaumauga. "Ta te le fia tago fua i ni tino o e ua maliliu, e le leiloa fo'i nei tagata, ae ua fai mai le fa'atonuga ma e tatau ona faia, ae maise ai le agaga fo'i lea ia i tatou, o e ua maliliu e iu ina toe o mai i le po e fa'afefe ma fa'amata'u mai ia te'i tatou."

 

"O le ta'ita'iga a Tauese Va'a Sunia, e leai se faigofie o iai, ma o le ala fo'i lea sa tele ai sona sao i le faiga o le galuega fa'aleoleo, atoa ma tomai e mana'omia ina ia sa'o ona fa'atino tiute. Fa'afetai mo le fa'asoa, fa'afetai mo le fa'asa'o mai o a'u i taimi e sese ai, fa'afetai mo le fa'atonuga ina ia iloa lelei fai le galuega, lea ua fa'amatu'u atu o le a malolo, ae o a outou a'oa'oga na, sa faia a'i tiute se'ia o'o ina ma'ea ona fai nei."

 

Mai le amataga o lana tautua sa avea ai o ia ma PSO, ona avea lea o ia ma Satini, sos'o le Satini ma le avea ma Lutena, ae mulumuli ai ona avea lea o ia ma Lutena, peita'i ua tu'ua nei le galuega ae ua mae'a avea o ia ma Kapeteni.

 

Pe afai e fa'aauau pea ona tiute i le Matagaluega, e mafai ona sos'o ma le Commander. Peita'i e le'i o'o lana auaunaga lea tofiga, ae ua o'o mai tausaga e talia ai lana litaea fa'apea ma lana saogalemu.

 

Ina ua fesiligia i se mea e sili ona matuia ua ia va'aia pe tautua ai a'o avea ma leoleo, ae ata Afo, "O le taimi sili ona ou fefe ai o le taimi na ou faia ai suesuega o le tagata maliu, tausailia pe na fasia o ia maliu ai, pe na maliu lava ona o se gasegase ua maua ai. O le tau siakia o tino maliu o nisi, e matua fili lava ia a'u ia! "

 

Peita'i i le taimi sili ona fa'anoanoa ai i lana galuega, ina ua va'aia le fa'ataumaoi pe fa'atauga o fanauiti i totonu o mafutaga fa'aleaiga. "O na ituaiga o va'aiga e tate leiloa pe tate fia fasia ai ma le matua lea na ia faia le soligatulafono, pe tu'u e fai le kosi a le tulafono ua mae'a fa'ataoto mo na ituaiga o solitulafono."

 

O lona taimi fiafia e galulue fa'atasi ma nisi, "O taimi lea o avea fa'atasi ma'ua ma le susuga le Sui Komesina o Leoleo, Falana'ipupu Ta'ase Sagaolutele."

 

"Ua le pei o i maua o ni leoleo, ae se tuafafine ma se tuagane. Ua matua iloa lelei lava e le isi mea e loto i ai le tasi i le galuega, ae maise fo'i o fetufa'iga i mea e fa'aletonu i totonu o ma'ua aiga, ae maise o le faiga o le galuega,” o sana tala lea.

 

"E otegia fa'atasi fo'i ma'ua e Capt Tauese Va'a Sunia i lena vaitaimi pe a le sa'o ona faia galuega, pe tuai fo'i, ae o le fiafia lava ia e le 'avea a'o tautua fa'atasi i le CIIB."

 

I lenei vaitau ua sauni e litaea, ua ia fa'ailoa mai ai sona taofi e tusa o lenei nofoa'iga a Komesina Le'i Sonny Thompson, sa ia fa'ailoa ai, "E masalo ua manatu nisi e faigata le matou auaunaga i lea fo'i ta'ita'iga, ae i lo'u sui, ou te iloa atu se ta'ita'i o lo'o finau malosi mo se mea e lelei ai ona fa'atino e i matou tiute faigata, ae maise i taimi e lamatia ai le soifua ona misa ma fevaevaeaiga tuga.”

 

FA'AMANINO FA'ATONU DHR MAFUAGA - LE'I AUAI I LATOU I FONOTAGA MA LE EEOC

 

O le fa'atonusili o le Matagaluega o Tagata Faigaluega a le Malo, Nafanua Eseneiaso Liu, ua ia fa'apupula atili le mafuaga sa le auai ai so latou sui, po'o ia fo'i i fonotaga sa fa'atautaia e le Sui na malaga mai le EEOC i Honolulu.

 

"O le mafuaga na le auai ai se isi o i matou, aua sa o'o lelei atu le sui o le ‘Pae ma le Auli’ Ipu Lefiti ma fa'ailoa mai, o lo'o malaga mai Glory Saure o le EEOC mai Honolulu, ona o se vala'aulia fa'apitoa na tu'ufa'atasia e i latou ma le Coalition Against Sexual & Domestic Violence. O lea malaga e taumafai ai ona fa'amalamalama atili mataupu e mafai ona fesoasoani mai le EEOC.”

 

O le tu'uagatala sa i ai, e fa'auia talosaga i le Ofisa o le Kovana, ona fa'ao'o ai lea o se tusitusiga e vala'aulia ai ni sui o le malo. Peita'i e o'o lava ina o'o mai lea sui ma fa'atautaia latou semina, e le'i o'o ane se tusitusiga e vala'aulia ai sui o le malo e auai i na semina.

 

Saunoa le fa’atonusili, “ua mae'a fa'atulaga le sui o le EEO i le tatou nei matagaluega, ma e a'oa'oina fa'apitoa fo'i o ia e le EEO mai Honolulu, o ia lea o Eseta Iosefa, ma o ia fo'i e faia a'oa'oga fa'apitoa tau le EEO po'o aia tutusa i avanoa faigaluega a le Malo."

 

"Ua le na'o le Malo e fo'i e mafai ona fesoasoani i ai Eseta Iosefa, ua mafai foi ona fesiligia sana fesoasoani i tagata o le atunu'u e faigaluega i Kamupani ma pisinisi Tumaoti.”