"INA NE'I GALO IA I TATOU LE SAO O TUA'A UA TATOU SA'A AI I MA'A O MALIE!"

O upu tomua ia o le saunoaga aloa'ia a le afioga le Kovana Sili Lolo Moliga ina ua o'o i le taimi atofa o le polokalama fa'asolo e fa'ataoto ai le Pale Fugala'au i le Ma'a Fa'amanatu o Fitafita uma o Vaega Au ua maliliu ona o le latou tautua, po'o afaina fo'i na fa'amanu'alia ai a'o tautua i so'o se lala o le Vaega Au a le Malo Tele. O le afioga lava le Kovana Sili sa vala'auina fa'apitoa mo lea faiva, na te fa'ao'o le pale i lona tulaga e fa'ataoto lelei ai.

I le sauniga sa tatala aloa'ia i le vi'iga o le Atua na saunia e le fa'aili fa'apitoa mo le faamoemoe, Wess Band. Ona tula'i lea o le fa'afeagaiga Tiakono Fesoasoani Katoliko Malaki Timu mo le Tatalo ma sina upu tomatau mo le fa'amoemoe.

"Ua ou fiafia ina ua ou ala a'e i le taeao, ua ou foliga i le Alii..." Ina ua maea le tatalo sa ia fa'amnatu mai se fe'au sa fa'ailoa mai e Iesu, Afai ou te alu, ou te toe fo'i mai, afai fo'i ou te alu e sauni se mea e nonofo ai outou, ou te toe sau..."

"O le tagata ma lona tupuaga, o le tagata ma lona fa'asinomaga ma le tagata ma lona taunu'uga. O mea ia ua mae'a tu'umatamaga mai e le Atua mo i tatou uma. Ua mae'a ona tatou tutupu mai i o tatou aiga, ua maua faiva tatou te galulue i ai ma saili ai le ola o le tagata lava ia, ae i ai lo tatou taunu'uga, e tasi lava, e tatou toe fo'i a i le Atua i le agaga, ae matu le tino i le palapala."

"E to'atele tatou pelega ua to i matu le folauga, ua le mailoga se tasi e malaga i lena nu'u tumau ua mae'a folafolaina, ae o manuia uma o latou galuega sa fai a'o soifua, lea ua tatou a'ea'e ai i lenei nu'u tatou te nonofo ai. Fa'afetai mo i latou ua mavae atu mai lenei ola, ae o manuia uma sa tausinio i ai, ma latou galulue i ai, ua taoto mai mo i tatou."

O le lagona lea sa amatalia ai le tautalaga fa'apitoa a Lolo, ma sa ia toe fa'apipi'i atili lea lagona, "Ina ne'i galo ia i tatou le sao na tautiga ai o tatou tua'a, sa latou amata asaina le gasu o le tai taeao ma latou fa'anaunau ina ia tatou ola saogalemu i le sa'olotoga e mafai ona puipuia ai i tatou e le Malo tele o Amerika. O manuia nei ua tatou ola ai, sa latou taumafai ai e soalaupule fa'atasi ma le malo tele ina ia o'o mai i o tatou taimi, ua tatou ola lelei ai.

Na fa'aauau pea lana tautalaga, "E i ai lava se tasi sa ia foa'i lona ola, ia mautinoa ua e ola fiafia ma saoloto. Fa'afetai lea, aua o i latou nei ua momoe mai i tu'ugamau, ae mautinoa ua nonofo i tatou ma le manuia. E le galo ai fo'i le manuia i la le agaga, ia tatou taofi mau i mea lelei, ia amio lelei ma toe fa'afo'i le fa'afetai, aua e to'atasi lava le sa maumau lona ola, ina ia ola le tagata agasala. Fa'afetai lea mo lena fo'i fa'aolataga.”

“Aua ne'i galo, e i ai lava se tasi sa ola taumafai, tautua ma le filiga, le fo'i i le faigata, ina ia sao ma uli la tatou folauga i lenei vaitau o le soifuaga. Fa'afetai fa'afofoga mai e afua mai Manu'a se'ia o'o mai i Tutuila nei."

Mo le tatalo fa'ai'u o le aso, na fofogaina e le susuga le Faife'au fa'apitoa mai Ierusalema o lo'o avea ma se malo fa'aaloalogia a le susuga Pr Kruse ma le Ekalesia. O ia lea sa ia tutula'i ma ia fa'ailoa mai, "O lenei vaitaimi ua so'otaga lelei le au Kerisiano, ua mae'a valoia nei mea uma i le Tusi Pa'ia, ia tatou viia le Atua o Isaraelu, aua o ia e to'atasi na maliu mo i tatou uma."

Ua fa'ailoa mai fo'i, na sisiina fu'a ma fa'ataoto fo'i le pale o fugala'au i le fanuatanu i Satala, fa'apea ma le Tu'ugamau o Fitafita i le tumutumu mauga o Utulei, i latou sa maliliu i le faailogaina o le fu'a a Amerika Samoa i le tausaga e 1980, i le va'alele na pa'u aga'i i le Faletalimalo o le Rainmaker, lea ua fa'aigoaina nei o le "Sadies by the Sea."

AMATALIA UNA'IGA FA'APITOA TAOFI LE ULAULA TAPA'A

Ua fa'atulaga le tolu aso iloga e afua i le aso se'ia o'o i le aso Tofi, o le a fa'atautaia ai fonotaga fa'aleaoaoga i le Naumati Room, Tradewinds mo le taumafaiga lava ina ia maua'a le tima'iga, "Taofi le Ulaula" i le mamalu lautele o le atunu'u.

Ua mae'a fa'asalalauina fa'alauaitele le latou fa'amoemoe ua una'ia malosi nei: "Ia o'o atu i le 2025, ua le toe Ulaula Tapa'a Amerika Samoa atoa!"

Ua i ai fo'i suiga o le tulafono tau Ulaula Tapa'a ua mae'a tapena e i latou, ma suiga fou o lea tulafono e ao ina toe fa'aulu o se Maga e aiaia ai le fa'asa lenei ua matua taumafai i latou e pasia ma fa'amalosia loa.

“E moni ua mae'a pasia le tulafono na aiaia muamua ai le ulaula tapa'a ma ua fa'asa fo'i ona toe ulaula se tasi i nofoaga faitele, luga o ta'avale la'u pasese ma isi nofoaga,” o se tala lea a se tasi o le Komiti Fa'afoe o le Tobacco Diabetes Coalition.

"Peita'i, ua matauina e i ai nai vala e le o manino lelei ai le fa'aupuga o le tulafono lea, ma ua toe manatu ai e toe fa'aulu o se maga ia tamau ai le fa'asa.”

E le'i mamao atu fo'i ona o'o lea vaega i luma o le Ofisa o Mataupu Tau Samoa ina ia fesoasoani le vasega o Pulenu'u ma Leoleo o afio'aga ta'itasi mo le latou misiona lea e fia fa'alautele atu agai i tua i afioaga uma o Amerika Samoa.

Ua ma'ea fo'i ona faia le so'otaga mo le aso fa'atulagaina e auai atu ai le vasega o Leoleo Falema'i, Leoleo Uafu, Leoleo Malaeva'alele ma Leoleo o le Maota o le Malo i ona vaega eseese, ina ia tima'ia fo'i i latou i se latou sao aoga tele mo lenei fa'amoemoe.

Pe to'ai taunu'u i le toe aso o lenei masina, Me 31, 2018, o le aso Tofi lea, ua fa'atulaga e faia le latou talotaloga i le Malae o le Suigaula a le Atuavasa i Utulei ma e amatalia lava i le taeao 6:30am e o’o i le itula e 8:00am, ae la'ei e tagata uma lava le mitiafu lanu mumu.

O le toe fonotaga fa'aleaoaoga fo'i lea ma o le a fa'atautaia lea e le Matagaluega o le Soifua Maloloina fa'apea le Cancer Foundation ma le TAOA. E faia lava lea fonotaga i le Naumati Room Tradewinds.

O le afuaga ona faia nei fonotaga fa'aleaoaoga, o le toe fa'amalosia lea o le mau ma tulafono e fa'asa ai le ulaula tapa'a i le atunu'u. Fa'aititia atili le toe ulaula o se tasi i le si'omaga o Amerika Samoa ina ia avea ai le atunu'u ma se Malo ua saoloto mai le Ulaula Tapa'a. Ae maise, o le taumafaiga lenei ina ia fa'alautele atili le silafia e tagata uma o a'afiaga o nisi e le ulaula, ona o le ulaula tapa'a a i latou e ulaula i o latou autafa.