MAGIC CIRCUS OF SAMOA - TUPA'I BRUNO & PULU AE AE JR.

Ua toe taliu mai foi le susuga Tupa'i Bruno ma lana vaega fa'afiafia o tagata tatafiti, ina ia faia latou fa'aaliga e pei ona matua fiafia i ai le fanauiti a le atunu'u. E fia maimoaina e le to'atele nei fa'aaliga, ae maise o se tietiega fo'i i ituaiga fa'alue eseese ua masani ona fa'atutu e Tupa'i Bruno ma lana au fa'afiafia.

O le amataga o fa'aaliga ua i ai nei i le Paka Liona e tatala aloa'ia i le afiafi o le aso Tofi nei, ma ua fa'ailoa mai, "O le to'atele lava o i matou uma o fanau a Samoa. Ua taumafai fo'i e a'oa'o tomai i nei fo'i ituaiga o taleni ma ua gafatia fo'i ona faia lea tautua e fa'afiafia atili ai lava fanau." O i la'ua o ulugali'i talavou ma sa auai atu i le Sauniga i le taeao o le aso Sa a le Teen Challenge i Tafuna, ma o le ali'i lea, ua avea nei ma tama o le aiga e to'alua nai o la'ua alo, ae o lo'o faigaluega fa'atasi lava ma le tina i le Magis Circus a Samoa.

Ua fa'ailoa e le ali'i lea, ma o le a fa'alauiloa ane lava lona tala'aga i le taimi o a latou fa'aaliga, na mua'i avea ma fa'atau nusipepa a'o tamaititi e fesoasoani ai i le tausiga o si o latou aiga. Lea ua avea o ia ma se tasi o ali'i tatafiti, o se taleni fo'i e le faigofie ona a'otauina ai oe, ae ua iloga ona aoga mo le tausiga o lona aiga, ma ua femalaga'i ai fo'i i isi malo ona o lenei taleni.

"E le mafai ona galo le fa'asinomaga ma le a'oa'iga sa sau a'i le olaga. Ia o i le malumalu tapua'i e fa'afo'i le vi'iga ma le fa'afetai i le Atua. O lea fo'i ua fai le aiga ma ua i ai fanau, e tatau ona fa'asavali mai fo'i olaga o le fanau i lena laina sa'o sa a'oa'oina ai a'o laiti se'ia o'o ina tagata matutua,” o se tala lea a le ali'i tatafiti.

Ua taofia suafa o i latou, mai fa'asalalauga, ina ia matuinoa e fa'afofogaina e le mamalu lautele tala'aga o i latou uma o lo'o galulue ma faia fa'aaliga matagofie i lea lava po ma isi po uma e faia ai nei fa'aaliga.

O le o’o mai o le Magic Circus of Samoa, ua fa'apa'aga ai le susuga Pulu Ae Ae Jr.; Swire Shipping ma le Peter E. Reid Stevedoring, Inc. Ua le gata i lea ae ua fesoasoani atu fo'i i ai le Pepsi, Sadies Hotels ma le Samoa Ford Motors.

Ua fa'atulaga le tatalaina o latou fa'aaliga i le Aso Tofi, Aso Faraile, Aso To'ona'i ma le Aso Sa e amatalia i lea i le 7:00 i le afiafi. Ua eseese fo'i totogi ulufale mo fanau iti ma tagata matutua. E mafai ona fa'atau vave pepa ulufale itula e 12:00 i le aoauli o aso o fa'afiafiaga e pei ona ta'ua i luga.

FAATUPEGA POLOKALAMA SOIFUA MALOLOINA E LE FETARALE

Ua fa'ailoa mai e le faipule i le Konekeresi, Aumua Amata e lua ni fa'atupega ua taua'aoina mo Amerika Samoa e fa'atautaia ai le lua polokalama tau le soifua maloloina. O nei polokalama ua fa’atupeina e le malo fetarale.

"O ituaiga o fa'atupega fa'apenei mai le Malo Tele e aoga tele ia Amerika Samoa ina ia fa'aleleia ma fa'atele ai ni polokalama tau le soifua maloloina e fa'atautaia mo tagata lautele o le teritori,” o se tala lea a Aumua.

Ua ia fa’ailoa mai e $285,000 mo polokalama tau le soifua maloloina lelei, ma le isi e $250,000 mo le polokalama tau le mafaufau ma ona foi tautua eseese e aga i lea fo'i vaega o tagata lautele o le atunu'u.

O lea alagatupe mai le vaega fetarale, Matagaluega o le Soifua Maloloina ma Tautua mo le Mamalu Lautele [HHS].

Ua fa'afetaia fo'i e Aumua i latou uma na tofu sao i le taumafaiga o nei alagatupe ae maise lava le tama'ita'i o Elizabeth Ponausuia. Ua fa'apea fo'i ona ia fa'afetaia le mata'alia o le susuga le fa'atonu o le DHSS John Suisala ma le afioga Motusa Tuileama Nua o le DOH i le taumafaiga o nei fo'i alagatupe. Fa'afetai fo'i le lagolagosua mai a le Failautusi a le HHS Secretary, Alex Azar ma le fesoasoani a le matagaluega na fa'auia vave mai ai lenei fa'ai'uga matagofie mo le tatou atunu'u.

TALIU MAI FANAU SAMOANA HIGH SA MALAGA POLOKALAMA JSA

Ua taliu mai i le atunu’u le fanau a Samoana High lea sa maua avanoa e malaga ai i le Polokalama a le Junior Statesman i Iunivesite i Amerika sa lautogia i ai.

O i latou nei o lo'o ao'oga ua iloga fo'i ona manuia a latou taumafaiga sa auai atu i ai. O Yasminna Sanchez na auai i le Princeton University, o ia na ia maua fa'ailoga maualuluga e lua mai lana taumafaiga, ua fa'amauina ai; Lessei Perelini na auai fo'i i le Princeton University; Lisa Vaiau na auai i le Stanford University, a'o Lusiano Fuataga sa auai i le Georgetown University.

Na vala'auina i latou nei e avea ma sui e fa'alauiloa ni mea taua ma le lelei fo'i o le auai atu i lea Polokalama JSA.

Ua fa'ailoa mai e i latou, "E aoga tele lou fa'amasani i nei fo'i Iunivesite sa malaga atu i ai, fa'atasi ai ma isi fanau a'oga o lo'o ua avea ma sui mai o latou fo'i setete ma teritori. I a'oa'oga sa fa'atautaia e pei lava ua avea ita o le tamaititi ua avea mataupu i le Iunivesite ma ua a'oa'oina mai fo'i fa'apena i matou uma. E i ai galuega sa fa'atino ina ia sailia ai fo'i se mea ua e maua ma iloa mai le taimi atoa na auai ai i lesona a polofesa lautogia mo nei a'oa'oga.”

“Ou te fa'afetai ua mafai ona ou alu i nei avanoa, ua iloa fo'i le ituaiga o a'oa'oga ua i ai lo'u naunau e tausaili ai tusi pasi maualuluga pe afai o le a mae'a a'oga maualuluga iinei. E leai se faigofie o i ai, ae o le taumafai lava le tali o mea uma,” o se tala lea a Yasminna Sanchez, ua taliu mai ma lana samala, o le fa'ailo o togi maualuluga i ana taumafaiga i le JSA i lenei tausaga.

O lona uso o Karlinna Sanchez, sa ia mauaina le samala e tasi i lona

tausaga fa'ai'uaso ai i le Samoana fo'i, 2017.