Ads by Google Ads by Google

Tala I Vaifanua


O se va'aiga i le 'au a tama'ita'i talavou Handball Team mai Amerika Samoa ua i ai nei i le latou tolauapi mulimuli i Niu Ioka e tapena ai mo le malaga ese ia Oketopa 04, 2018 mo ta’aloga a le Youth Olympics i Buenos Aires, Argentina. "O outou mama na, fai ma le fatu o outou faiva, o lo'o tapua'ia outou e lo outou malo atoa!" [ata foa'i]

LAVA SAUNIA 'AU HANDBALL TAMA'ITA'I - SAILIGA PINE YOUTH OLYMPICS

 

Fa'ailoa mai e le Peresetene ma o le Faia'oga fo'i o le 'au Handball a tama'ita'i talavou Amerika Samoa o lo ua fa'atautaia nei a latou koleniga i Niu Ioka, e tapena ai i latou mo le ta'amilosaga Youth Olympic i Buenos Aires, Argentina,

 

"Ua matou sauni mo le fa'amoemoe, ae mana'omia talosaga ina ia fa'amalosi'au mai ia i matou i lenei malaga o le a matou savalia,” o se tala lea a Carl Floor Sr.

 

I le taimi nei, ua fa'aumiumi le latou nonofo ma koleni fa'apitoa ai i Niu Ioka ina ia fa'amasani i latou uma i le tau ma le taimi i Argentina. O a latou koleniga fo'i o lo'o fa'atautaia, ua agatonu lea mo le taumafaiga a le 'au ina ia fesaga'i ma isi 'au a'o talafeagai le malosi o latou tino, ma le fa'ataututu ai fo'i ma le tau o Argentina.

 

"I le taimi nei o le vevela i Niu Ioka e 66F, ma e tutusa lelei lava ma le tau o Argentina. Ua o'o mai fo'i le fa'aaliga ia i matou, e mafai ona lae'ia e le 'au ni ofu mafanafana ina ia saogalemu ai latou i le taimi o ta'aloga, peita'i matou te le'i paketi mo se toniga fa'apena. O lea la o le a ta'a'alo pea lava i le toniga ua mae'a tapena mai, ma e mana'omia ai a outou talosaga Amerika Samoa, ia malolosi pea le fanau ta'a'alo,” o se tala lea a Floor o lo’o malaga ma le au ta’alo.

 

O le taumafaiga ina ia manuia le latou alo atu i le Youth Olympics, ua mae'a tauva ai le 'au ta'a'alo lenei i le Ta'amilosaga Handball a South California, lea sa talimalo ai le Au Handball mai LA. Na toe soso'o lea ma le toe ta'a'alo fo'i i Boston lea sa talimalo ai le BTHC ma ua iloga lava fo'i le lelei o latou taumafaiga na e lua.

 

Na faia koleniga fa'atasi ma le Womans National Coach Juliano de Oliviera i LA ma sa ia toe fesoasoani fo'i i koleniga i Boston ma sui totino o le 'au Handball Club a Boston.

 

Ua fa'ailoa mai e Floor, "O le ulua'i vaiaso e tolu o le malaga mai, e le'i faigofie lava aua sa matele ina femalaga'i le tatou 'au, fa'apea ai ma koleniga faigata tele sa lu'ia ai matou i lea vaitau fa'atasi ma isi sui e matutua ma lelei fo'i a latou ta'a'alo fa'atauva. O lea tulaga ua fa'amausali atili ai ia i matou le olaga o le tagata ta'alo Olimipeka, o mea uma lava e fa'amautu ia lelei lau ta'alo ma ia atoatoa le malosi."

 

Ua mae'a fo'i ona asia e le 'au ta'a'alo le Gannon University ma sa fa'afeiloa'ia i latou e le ali'i peresetene Ketih Taylor ma le latou faia'oga o le ta'aloga Pi'i o Don Henry. O se tala fiafia lea ua maua mai, "Ua tofusia uma le 'au ta'a'alo lenei a Amerika Samoa ma le avanoa e a'o'oga ai i le Iunivesite o Gannon i le isi tausaga a'oga fou."

 

O se tala mai a nisi o sui o le 'au Handball, Frances Nautu, "Ua ou fiafia tele ua maua so'u avanoa i lenei Iunivesite a le Ekalesia Katoliko. O se avanoa e le lau maua, ma o se lumana'i fo'i lea o a'u i Niu Ioka."

 

"E tele na'ua nofoaga matagofie ua mae'a ona matou maimoaina, ae maise lava tala o le vavau i lenei fo'i setete ma ona fa'asinomaga, e matua talisapaia lava e tagata o Niu Ioka i matou i mea uma matou te o atu ai e matamata, ma o se fa'alagona lelei lea ia i matou uma lava, o le alofagia o i matou iinei,” o se tala lea a le ali'i faia'oga fesoasoani o Joey Sagapolu.

 

"I le taimi nei ua fa'atasi atu le 'au i le latou Tolauapi i Bethel Training Camp ma ua fiafia tele i le to'afilemu o le togavao lanu lau'ava ma ua leai se pisivale ae ua fa'ato'ato'a lelei o latou mafaufau ma tino i lea ituaiga o nofoaga ua talitutusa lava ma o tatou laufanua lafulemu. O le taimi fo'i lenei e toe maimoa ai i ata tapu'ea i ta'aloga Handball ma toe va'ai ai i mea sese sa faia i le ta'aloga, po'o le a fo'i nisi metotia e fa'asa'o ai nei sasi, ma ia to'aga e ta'a'alo fa'atasi ia maua ni 'ai e manumalo ai,” o se tala lea a Floor.

 

O le aso 4 Oketopa, 2018 e le Au Handball ia Niu Ioka ae malaga i Argentina. O le latou ta'aloga muamua e fetaui ai ma Hungary, o le 'au lea o lo'o umia le siamupini  2017 i lea fa'agatama lea e faia lea fetauiga i le itula e 11:00am taimi a Argentina. Ua fa'ailoa mai, "Amerika Samoa, ua matou sauni mo le ta'aloga!"

 

MAE'A TUFATUFA ISI SIAKI LAFOGA 2017 - $1.5MILIONA LE AOFA’I

 

O le aso Faraile na te'a nei na toe tufatufaina ai siaki o lafoga ua maua a nisi o le mamalu o le au faila lafoga ma faila lafoga mai ia Mati 27 e o'o ia Me 3, 2018.

 

O le aofaiga o nei siaki e $1.5miliona. Mai lea aofaiga, e $758,782 lafoga lotoifale ae $838,225 lafoga maua mo fanau iti, lea o lo’o fa’atupeina e le malo fetarale.

 

Mo nisi fa’amatalaga i le tulaga o lenei mataupu valaau le Ofisa o Lafoga i le 633-4181.

 

E SILI LE MANUIA O LE NA TE FOA'I, NAI LO LE NA TE TALIA!

 

Ua matauina le agalelei o le tele o pisinisi ma fa'alapotopotoga tumaoti i a latou foai tupe tuuina atu i le Hope House, o lo'o tausia ai matua matutua ma nisi o e gasegase tumau e ao ina tausia fa'apitoa.

 

O nei foa'i ua faia lava i le agalelei ma le alofa e fa'asoa atu i nisi o lo'o tausia fa'apitoa i le Maota o Fa'amoemoega!

 

O se tasi o foa’i, e $2,000 mai le Matson Shipping sa tuuina atu ia Bishop Peter Brown ma totino o le komiti fa’afoe a le Hope House i le vaiaso ua te’a.

 

O lenei fo'i meaalofa ua taua'aoina i le vaitau taimi tonu o lo'o ua pisi ai fo'i le pulega a le Hope House e fa'atautaia le latou Ta'amilosaga Tapolo fa'aletausaga e fa'atupe le fa’afoeina o le Hope House

 

O le masina ua te’a sa faia ai le foa’i e $1,000 mai le National Pacific Insurance. E ese mai lea sa latou fa'atinoa fo'i se galuega alofa o le fa'amamaina lea o le togala'au fuala'au 'aina o le nofoaga lea i Fatuoaiga. Fa'afetai tele mo le agalelei, e faamanuia sa'o lava le Atua ia i latou e foa'i ma le loto alofa.