Ads by Google Ads by Google

Tala I Vaifanua

SI'ITIA KONESULA AUSEUGAEFA POLOMA KOMITI - KONESULA O SAMOA I AUSETALIA

 

Ua mae'a ona fa'ailoa mai o le a si'itia ese atu le susuga le Konesula o Samoa i Amerika Samoa, Auseugaefa Mafaitu'uga Tuvaifale Va'asatia Fa'atili Poloma Komiti mai lona lea tofiga, ae avea ma Konesula o Samoa lava i Ausetalia.

 

O lea ua fa'atulaga e amata o ia i lona tofiga fou lea ia Oketopa 15, 2018, i Sydney Ausetalia.

 

E talu mai le tausaga e 1987, sa amatalia ai ona galue Poloma i faiva fa'atama o le Malo i Mataupu Fai i le va o Samoa ma isi malo i le va i fafo. O ana a'oa'oga fo'i ua talafeagai lelei ai ma ona faiva, aua o lo'o ua ia umia le fa'ailoga BA-Public Administration & Political Science mai le Iunivesite o le Pasefika i Saute i le tausaga e 1986.

 

Sa amata lana tautua o le Konesula i Amerika Samoa ia Mati 2015.

 

I lona vaitau, sa iloga lona va'ai toto'a fo'i i aiaiga e talafeagai mo tagata uma o lona malo o lo'o fa'auia lona ofisa i mataupu tau Tusi Folau Samoa, fa'afouga o tusi folau, o pepa malaga o isi tagata mai atunu'u eseese o le Lalolagi sa mafai ona talosagaina ai, feso'ota'iga tau le vaomalo eseese e aofia ai Saina, Korea, Filipaina ma isi malo tetele atoa ai ma le atuvasa Pasefika.

 

O le a tu'ua nei Auseugaefa lea auaunaga, ae o le a suia mai ai le afioga Fonoti Manogiamanu Etuale Ioane, o se tasi o uso matua o le susuga le ali'i fauva'a o Maselino Ioane.

 

O Fonoti Ioane sa galue fo'i i le tofiga ua suia atu i ai Auseugaefa i Sydney, Ausetalia.

 

I lana nofoa'iga, ua amata fautuaina ai Auseugaefa le tele tagata o Samoa o lo'o mana'omia ona fa'aleleia o latou tusi folau, fautuaina fo'i i mataupu tau femalaga'iga i isi malo e ese mai Amerika Samoa, ma ua iloga fo'i lona vave fa'ailoa ma fa'amamalu o tulafono tau femalaga'iga mo tagata o isi malo ma le tatou teritori.

 

Fa'afetaia fo'i lana afioga le Konesula Auseugaefa Komiti mo le tautua ua au fo'i mo tagata o lona malo o aumau iinei. Ia manuia lava ou faiva i Ausetalia.

 

TOTOGIA E LE MEDICAID - MEA E FA'AAOGAINA I E I AI GASEGASE TUMAU

 

Ua fa'ailoa mai e le Ofisa Tutotonu o le Medicaid ma le Medicare ua talia mai le talosaga a le Medicaid Amerika Samoa ina ia fa'ataga ona totogia e le Medicaid mea uma e fa'aaoga e i latou ua i ai manu'a tumau o le tino, pe afai ua mae'a fa'atonu mai e foma'i mo i latou ia fa'aaogaina.

 

O nei mea uma mo e i ai gasegase tumau o le tino e aofia ai: Vae Fa'apipi'i, Uoka, Nofoa Fa'ata'avalevale; crutches, moega fa'apitoa ma le tele o sapalai o mea e fa'aaoga i le tausiga fa'apitoa o i latou i o latou aiga, po'o nofoaga fa'apitoa o tausia ai. O nei mea uma ua fa'aigoaina DMEPOS, ae mana'omia lava le saini a le foma'i ua fa'atonuina fo'i nei mea e fia fa'aaogaina e gasegase tumau nei.

 

Ua mautinoa o le a fa'aleleia atili le tautuaina o nei ituaiga o gasegase i totonu o le teritori, aua o le a maua e i latou ia mea uma, ona ua fesoasoani mai le Medicaid e totogia. Manatua o le a mafai ona toe maua lima ma vae o i latou ua aveesea nei totoga ona o gasegase po'o laveaga. Ua fa'ailoa mai fo'i e aofia ai fo'i ma masini CPAP.

 

O le afuaga ona talosaga le Ofisa autu o le Medicaid mo lea si'itaga o le tautua o tatou tagata gasegase, ona ua fa'amuamua e le afioga Kovana Lolo Moliga lea tulaga, ma ua fa'ataoto ai se fuafuaga lelei, ina ia tima'ia nisi si'itaga o tautua mo tagata lautele e ala i le tausiga o latou soifua maloloina ma fa'ataugofie ia i latou talavai.

 

O lea ua ausia fo'i e le Ofisa fa'alotoifale o le Medicaid nei la'asaga e tolu ua mae'a fa'atulagaina: Ua tatala atu nei talavai e le totogia mo le lautele i falema'i fa'aitumalo uma i le teritori, aua ua totogia e le Medicaid nei talavai uma.

 

Lona lua ua mafai ona matala le avanoa e auina atu tatou gasegase mo togafitiga i Niu Sila ma e taugofie mo tatou tagata ma le polokalama fo'i a le Medicaid. O lea ua toe gafatia fo'i ona totogia ma mea e fa'aaoga e fa'aleleia atili ai le soifua o i latou ua soifua ma manu'aga tumau o le tino po'o le mafaufau, aemaise o matua matutua.

 

Afai e fia i ai nisi fesili ona vala'au lea i le numera 699-4777.

 

NISI O FA'AFITAULI I FESO'OTA'IGA O ALAATA MA TELEFONI A LE BLUE SKY

 

Ua fa'ailoa mai e le Bluesky Communications o lo ua fa'amaonia lava le tele o fa'asea fo'i o lo'o fofogaina mai e le mamalu lautele o le atunu'u lea o lo'o vala'au mai ma fa'ailoa mai. O le tulaga o alaata o le televise keipo lea  sa tele ina motusia mai i pa'aga ua mae'a totogia a latou pili i le itu i sisifo o le motu ua afua mai lea i se fa'aletonu i le notu o lo'o fa'auia mai ai ata i lea itu i sisifo o le motu.

 

O le Notu (Node) ua faailoa mai o le uaea lea e mafai ona ia fa'afeso'ota'ia le alaata, e tali tutusa lava ma se laina e fesoota'i e fa'aoso mai le ata. O le tele o fa'asea sa fofogaina ma fa'auia fo'i i le Ofisa autu o le Bluesky, ona o ata e motumotu ma e le manino ae tele ina fa'apoloka mai i luga o le televise, po'o le motusia atoatoa lava.

 

Ua mae'a la ona taumafai le vasega o Inisinia o feso'ota'iga o alaata a le Televise Keipo ma ua fa'ailoa mai le fa'aletonu e fa'apea, "O le faaletonu lea ua mafua mai ona o le feso'ota'iga tau eletise o notu lea e i Leone, e mafai ai ona fa'auia feso'ota'iga uma i isi uma afioaga i le itu i sisifo o le motu. O lona uiga tonu lava, o lo ua fa'aletonu le fesoota'iga fa'aeletoronisi ma ua fa'aitiitia ai le malosi o le notu ua le au lelei ai i nisi vaega uma e tautuaina e lea notu."

 

O le galuega ua mae'a faia nei i lea fa'aletonu, ua matua ave'esea atoa lava lea notu ma ua toe suia atoa mea uma e le au inisinia ina ia mautinoa ua faaleleia atoa le tautuaina o i latou uma sa matauina o faaletonu maimoaga e afua i lea notu.

 

E le gata i lea ae sa fa'auia fo'i se fa'asalalauga fa'alaua'itele ina ia fa'ailoa ia i latou uma o totogia Televise Keipo i lea itu o Leone, Vailoa ma Lepuapua ma Malaeloa, ina ia nofouta i le fa'aletonu o le a i ai i a latou so'otaga o televise ona o lea galuega ua fa'atautaia nei, mo se lelei atili o le tautua i le lumana'i.

 

Ua fa'ailoa mai fo'i e le'i a'afia uma i latou o lo'o tautuaina e le Televise Keipo i lea vaitaimi atoa na fa'aleleia ai le so'otaga o laina o alaata. I le taimi nei, ua mae'a galuega lipea uma sa fa'atautaia a latou inisinia, ma ua tatau la ona lelei atoatoa le tautua i nei lava afio'aga.