Ads by Google Ads by Google

Tala I Vaifanua


Tausala Tauva, Christine Dutrete (itu tauagavale). [ata: Leua Aiono Frost]

Tausala Tauva, Edwina Laina Lilomaiava Tanielu (ogatotonu). [ata: Leua Aiono rost]

Tausala Tauva, Talileleia Ifoitaua Fiatama'ita'i Tasi (itu tauagavale). [ata: Leua Aiono Frost]

Tausala Tauva, Brittney Unasa Galo (ogatotonu). [ata: Leua Aiono Frost]

Tausala Tauva, Magalita Philomena Johnson (itu tauagavale). [ata: Leua Aiono Frost]

5 TAMA'ITA'I SAUNI TAUVA TAUSALA LALELEI O AMERIKA SAMOA

 

E toalima tama'ita'i ua mae'a fa'aulu o latou suafa i le tauvaga tausala e sailia ai le Tausala Lalelei o Amerika Samoa 2018-2019. Ua fa'atulaga lea tauvaga ia Oketopa 5, 2018 i le Gov. Rex Lee Auditorium i Utulei. O i latou nei o le a tauva:

 

• Edwina Laina Lilomaiava Tanielu, 22 tausaga o le soifua mai le afio'aga o Tafuna ma Iliili. O ia o lo'o sapaia e le Kamupani a le Western Union;

 

• Christine Duterte, e 21 ona tausaga mai le afio'aga o Pavaiai ma o lo'o sapaia o ia e le Shan J Trymes ma le Kamupani a Pilimai;

 

• Talileleia Ifoitaua Fiatama'ita'i Tasi, 23 ona tausaga mai Amouli, ma e sapaia e le TNT Recycling. O ia o se tama'ita'i faia'oga i le Nuuuli VocTech High;

 

• Brittney Unasa Galo, e 19 ona tausaga mai le afioaga o Mesepa, sapaia o ia e lona Aiga ma ana uo mamae; ma

 

• Magalita Philomena Johnson mai Vaitogi e 24 ona tausaga ma o lo'o sapaia o ia e ona matua ma lona Aiga Potopoto.

 

O le afiafi o le aso Lulu na fa'ato'a fa'atasia uma ai nei tausala tauva, o latou pa'aga e sapaia latou taumafaiga ma nai o latou aiga ina ia fa'alauiloa tulafono ma aiaiga uma o le tauvaga, ina ia manino mea o le tauvaga.

 

I lenei tausaga ua fa'ailoa mai e lima vaega o le Tauvaga Tausala o le a fa'amasinoina ai le au tauva lenei ma ua fa'atulaga e muamua lava le Siva Samoa ae siva lelei i le Puletasi ua tapena mai e le MASI.

 

E muamua lava fo'i le Siva Samoa i vaega uma o le tauvaga, e soso'o lava ma le fa'aaliga o lo'o ua fa'atulaga e fa'alauiloa mai ai sui tauva i le amataga o le Tauvaga Tausala.

 

O le Ofu Taele e saunia i le 3 Iata o se i'e e le motumotu ae soso'o lava, e le fa'aaogaina fo'i ni fa'amau, ae fa'aaoga i ai le talenia o i latou e tapenaina tausala ta'itasi e saia ai lea ie e maua ai le Ofu Taele tauva mo sui ta'itasi.

 

O le vaega tolu o le tauvaga o le Taleni ma ua le fa'atagaina fo'i nisi e fesoasoani ia te oe, pe fa'aaogaina nisi o mea ilaila i le taleni. Le fa'aaogaina ni La'au po'o ni fao ma laupapa e tuitui. O le a taumafai le tausala e fa'aaoga patino mai lau taleni e te agava'a ai.

 

Ua fautuaina fo'i, pe afai e taina atu lau pese ae ua le talafeaga le nota ma le mea o i lou iloa e lelei ai lou leo, taofi loa lava ae aua e te usuina pea lau pese a'o fa'aletonu masini fa'aleotele leo, po'o le taina fo'i o le piano, mea fa'apena. Afai e te pese pea, o le a fa'amasinoina loa ma oe.

 

Vaega lona fa o le Inspired Traditional Wear - O lona uiga o se Ofu fa'aSamoa ua sili atu ona e fiafia e fa'aalia ma ua ave atoa i ai le tele o measina a le atunu'u ma ua sili atu lona matagofie.

 

O le toe vaega loa o le Fesili ma Tali e lima i ai vaega o lenei tauvaga ma o le a fa'amasinoina ai.

 

Ua fa'atulaga le polokalama o le tauvaga ina ia na'o le tolu ma le 'afa itula le umi.

 

O lo'o i ai fo'i fa'ailoga fa'apitoa, e le aofia i le tu'ufa'atasiga o togi e malo ai le tausala i le tauvaga.

 

Fa’ailoa fa’apitoa e aofia ai “Miss Photogenic”, po'o le sui e lalelei tele pe a tapu'e ona ata.  O le isi fa'ailoga fa'apitoa o le "Miss Personality" po'o le tama'ita'i Tausa'afia ona Uiga i le taimi atoa na tapena mai mai lenei fa'amoemoe ma taimi sa feoa'i fa'atasi uma ai tausala lalelei tauva.

 

Fa'ailoga a le MASI ua fa'atulaga e i ai le latou Fa'aaliga Fa'apitoa e fa'atautaia i le Maliu Mai Beach Resort i le afiafi o le aso To'ona'i nei, Setema 22, 2018 ina ia tapena ai lea faailoga. O le aofaiga o le seleni e maua ai, o le a fa'aalu lea mo lea fa'ailoga, ma e fuafua fo'i le sui tauva e manumalo i lea fa'ailoga i le aofa'iga o lana seleni na tu'ufa'atasia i lea po.

 

E i ai le Fa'aaliga o Ta'avale Teuteuina e solo mai fo'i i le NAPA i Tafuna se'ia pa'ia le taulaga i Fagatogo ma fa'asolo atu aga'i i Aua ona toe taliu mai lea ma fa'amae'a mai i le Maketi i Fagatogo. O ituaiga o ta'avale e fa'aaogaina ai, o Pikiapu F150, sa le tele atu nai lo lena ituaiga o ta'avale. O le taavale teuteuina e manumalo, e maua le fa'ailoga fa'apitoa.

 

Mo le tauvaga i lea po, e to'alima Fa'amasino o le a fa'amasinoina le tauvaga ma le sini o le tauvaga i lenei tausaga, "Fa'atauaina o le Matagofie o le Atumotu o le Pasefika" - (Celebrations of the Pacific Islands Beauty).

 

O le aso 29 Setema ua fa'atulaga mo le isi fa'atasiga atoa a le MASI ma tausala ma latou aiga, e fai'aiga fa'atasi i le Tradewinds Hotel.

 

FAIA GALUEGA LIPEA MA FA'AMAUTU MALUMALU EFKAS I FAGATOGO

 

O le malumalu o le Ekalesia Fa'apotopotoga Kerisiano i Amerika Samoa i Fagatogo ua toe amatalia nei ona galuega toe fa'aleleia o mea ua fa'aletonu, e aofia ai na'o nisi o vaega o ona teuteuga ma le fale logo ae maise o lona atoapa taualuga.

 

O lea ua mae'a ai ona fa'aiugafonoina e le Komiti fa'afoe o galuega atina'e a le Ekalesia, ma e amatalia lea galuega i le aso ananafi.

 

O le susuga le Ta'ita'ifono Puna'oa Daniel Tofiga lea sa auai ina ia amatalia lea galuega fa'atasi ai ma nisi o sui o le Komiti, e aofia ai Tiakono Lautoa , Tiakono Taesaliali'i Samuelu ma susuga i A'oa'o Agili Fuifatu, Aoao Fualau Mata, Aoao Toeseinu'upotopoto George Asalele ma nisi lava o i latou e nafa fo'i ma le malumalu le susuga Taualai Tinae.

 

I le tala fa'asolopito o lea malumalu o le tausaga e 1933 na fa'ataoto ai lona ma'a ma o le afioga le Kovana G.B. Landenberger sa auai ma ia taua'aoina lea ma'a tulimanu o lea malumalu ia Mati 25, 1933. O le Faife'au sa galulue i le Ekalesia i lena tausaga o le susuga Rev. Afele Levi ma le faletua. O le tufuga sa ia fausia le malumalu i lea taimi o August "Gus" Coen.

 

O lea malumalu na fa'ato'a mae'a fausia ia Mati 25, 1949 ma sa auai fo'i le afioga le Kovana ia Vernon Huber lea sa ia ootia le lipine.

 

O le susuga Rev. Fiti Sunia ma le Faletua sa galulue ai o le Faife'au i le Ekalesia i lenei tausaga. A'o le Tufuga o Noa Tafaovale Ainuu.

 

Peita'i na toe faia galuega toe fa'aleleia i le malumalu ia Mati 29, 1992 ma toe fa'aulufaleina ai, ia Iulai 8, 1994. O lea sainoga sa ta'ita'ia lea e le Taitaifono o le EFKAS Fonotele Rev. Enoka Alesana a'o le Faife'au i lena tausaga o le susuga Rev. Ned E. Ripley, o le Tufuga sa fa'atautaia le galuega o Noa Iopu Malaki.

 

O le galuega toe fa'aleleia o le malumalu i lenei tausaga ua fa'atautaia lea e le Kamupani ua malo lana ofo Ray Malari Construction. Ua fa'akonekarateina mo le 3 masina e faia ai.