TAUALOA TAUTUA TAGATA FAIGALUEGA - M&O MATAGALUEGA GALUEGA LAUTELE

O le aoauli o le aso Faraile na te'a nei sa fa'atasia ai le afioga le Lt. Kovana Lemanu Peleti Mauga, le Fa'atonusili o Galuega Faleosina Faiai Voigt ma leVaega a le Maintenance & Operations (M&O) a le Public Works i lumafale o le Fale Mata'aga Fou o lo'o fausia i Fagatogo, le sauniga e taualua ai tautua matavela a sui e to'alima o le Matagaluega.

O i latou nei e to'atasi ua Litaea i le atoaga o le 20 tausaga o le tautua i le M&0 le susuga Opetaia Alesana Pone, ma ua le auai lea sui, ona ua mae'a avea ona aso malolo ua litaea ma ua i ai nei i Samoa i lea aso.

O le isi sui sa fa'amau fa'ailoga le atoaga o le 30 tausaga o lana tautua ma o lo'o avea fo'i ma fa'amoemoega o le Au Kamuta a le Matagalueg i le galuega lea o lo'o latou fa'atinoa, o le susuga lea a Vavao Togi. O lo'o avea o ia ma ta'ita'i fo'i o le galuega faufale i le Falemata'aga o lo'o fa'aauau nei. E le o manatu Togi e malolo, e fa'aauau pea lava lana tautua.

O le isi to'atolu o lo ua atoa nei le ta'i 20 tausaga o le tautua ma ua aofia ai le susuga le Faife'au a'o le tama e faigaluega fo'i i le M&O a le Public Works i le Matata tau Palama. O lo'o pule ai lenei foi faife'au i le vaega lea o le galuega i le falemata'aga: Peretania Tualaulelei.

O le isi sui ua atoa fo'i le 20 tausaga o lana tautua i le Taleni Tau Kamuta o Ite Matagia. O se tasi fo'i e fa'amoemoeina i le latou lea vaega.

O le susuga Sarasopa Una ua taualoa fo'i lana tautua ua atoa le 20 tausaga o faufale, fau auala, ma ua fa'amoemoeina fo'i o ia i lona lea faiva.

O le sui ua le maua nei ae ua mae'a litaea ua tusia fo'i lona suafa i luga o le Keke fa'amanuia mo i latou uma ua taualoa le latou tautua le susuga Opetaia A. Pone.

O le sauniga mamalu sa ta'ita'ia e le susuga le Faife'au EFKAS i Matuu ma Faganeanea Rev. Asiata ma sa ia fa'amalo ai ia i latou uma o galulue i nei tiute i le  Matagaluega, aua e le ni tiute faigofie.

Sa ia si'i mai fo'i se upu fa'amalosi mai le Tusi Pa'ia, le Nofoaiga Tupu i lona Mataupu na momo'o ai Tavita le Tupu o Isaraelu i le fia inu i se vai mai le Vaieli i le faitoto'a o Petele'ema.

"O le tofi o le ta'ita'i o le mana'o i mea e sili ona faigata, ae o le tofi o le vaega au a Isaraelu, o le fa'atino e ala i a latou tautua ma faiva o galulue ai. E le'i fa'afiti se fitafita lava e tasi o Isaraelu, sa latou o ma tau ma 'au mai le vai, aua o lo'o siomia e le vaega au a Filisitia Petele'ema i lena vaitau,” o se fa'amatalaga uiga a le ta'ita'i o le sauniga.

"O outou o tagata asu vai mo le ta'ita'i, ua momo'o ia i mea e faigata ona fa'atino, ae le fo'i le aufaigaluega, e tu'u atoa i ai lo latou malosi ma le iloa, e fa'atino ai mea o nanau i ai le loto o le ta'ita'i o le atunu'u. Fa'afetai mo lo outou talimana'o ma le tiga,” o le isi lea toe fa'afetai a Rev. Asiata.

Na tula'i Lemanu Peleti Mauga, ma ia toe fa'afetaia le fatuaiga tausi a le matagaluega, lea afai e toe saili ane i fa'amaumauga, o latou faiva ua mafai ai ona tatou feoa'i fiafia i alatele, ua mafai ai ona fa'atutuina fale tetele ma le matagofie mo ofisa uma o le malo, ua fa'afaigofie ai feoa'iga ma femalaga'iga i Uafu ma Malaeva'alele.

“O ai na fa'atinoa na faiva? O ai na tiga e tau asu a'e lea vai e tali ai le galala o ta'ita'i na moe miti ma latou manatu e fa'atutu nei galuega lelei uma? O outou na ua atoa nei le ta'i 40, 30, 20 tausaga o le tautua. Fa'afetai mo outou ma lo outou fatu ma le loto i le galuega atina'e.”

I le vagana fo'i a le tama'ita'i Fa'atonu sili o galuega Faleosina Voight, sa ia fa'apea ai, "E ui i so matou mana'o, ae a le tonu i o outou finagalo ma loto ina ia fa'atino ai, e fai vavale mana'oga o le Malo i ana galuega atina'e. Afai fo'i e i ai se isi e va'ai maulalo ia te outou ma o outou faiva, lea ua mua'i fa'ailo e le ta'ita'i o le Malo o latou fanoga, e fa'aea e le Atua le tagata i ona faiva sa faia ma le fa'amaoni. Fa'afetai lo outou talimana'o le leoa, e faia ma le onosa'i o outou faiva i aso uma. Fa'afetai."

Na tufatufaina fo'i o latou fa'ailoga ma ato o meaalofa, ae o lo'o fa'agasolo mai a latou fa'amanuiaga tau le seleni mo lenei aso. O i latou uma nei o nisi ua taualoa a latou tautua, o penina tautele nei a le Matagaluega, aua ua iloga o latou faiva, ua fa'amauina a latou tautua. O le 'aiga sa feagai ai ma fa'amanuia ai loa ma le latou keke e fa'asuamalie atili ai le aso.

Na faia fo'i fa'aaloaloga ona o malo fa'aaloalogia i le susuga le Faife'au Rev. Asiata, afioga le Lutena Kovana ma le susuga le Faife'au galue i le matata Palama o le galuega Peretania Tualaulelei.

FA'AMAMALU LE SA AFIOAGA O VAITOGI

O le fa’aiuga o le vaiaso, i le aso 15 ma le aso 16 o Setema, aso Toana’i ma le aso Sa, sa fa’amamaluina ai le Sa a le afio'aga o Vaitogi, e pei ona faia i tausaga ta'itasi i lenei vaitau.

O le 24 itula atoatoa lava sa le fa'atagaina ai ona solia lea afio'aga e so'o se tasi, ae alo fo'i Vaitogi i le latou sauniga fa'apitoa e molita'i ai o latou mana'o, e si'itia fo'i le fa'afetaia ma ia fa'amanuina fo'i le suafa o le Atua Soifua.

O lenei Sa o tapu a le afio'aga talu mai le silia ma le 200 tausaga ua mavae, lea sa matua lofia ai le afio'aga i se Mu Tele, ma sa faigata tele ona tineia. Na matua fa'ataumaoia atoa fa'ato'aga ma fale nofo o le afio'aga i lea mu, peita'i, ua saunia lea aso fa'afetai fa'apitoa, ona ua toe fa'amanuia mai le Atua i le tele ma le anoanoa'i i manuia i le afio'aga ma ona tagata o soifua ma nonofo mau ai.

O le fa'amanatuga, ona sa na'o le tatalo atu o ta'ita'i ma tama o le afio'aga i le Atua, toto mai leuaga tetele ma ua pe a'e ai le afi na sasao. E o'o mai pea i le aso, o lo'o avea pea ma mau e teu mau i agaga o tagata uma o le afio'aga o Vaitogi, lea aso o talosaga e fa'amauina ai le alofa o le Atua na fa'asaoina ai le soifua o i latou uma mai lena afi saua.

"I fa'amanu atu i le Atua ma le agaga fa'afetai, ma ia tatalo fo'i mo lana fa'amagaloga o sese i aso faiso'o,” o se tima'i lea mai susuga i fa'afeagaiga taulagi i le afio'aga, ia manatua mai e i latou uma o tama fanau a Vaitogi o le a tatalo mamao mai.