14 FAIA'OGA TAUVA FAIA'OGA O LE TERITORI 2018-2019

E to'a 14 faia'oga mai a'oga o le teritori sa fa'aulu fa'amaumauga ina ia tauva ai mo le sailiga o le "Faia'oga o le Teritori  Tausaga 2018-19. O i latou na fa'aulu e to'a 16, peita'i e le'i pasia talosaga a le to'alua o faia'oga ma totoe mai ai na o le 14 - o i latou ia na manumalo mai latou a'oga e avea ma faia'oga o le tausaga a'oga lenei 2018-19.

O faiaoga nei: Setefano Umaga, Afonotele Elementary; Pola Malosi, Aua Elementary; Agnes Tipi, Coleman Elementary; Vinnie Siofaga Afoa, Matafao Elementary; Fuaimamao Mageo, Samoana High; Miracle Sene, Manulele Tausala Elementary; Josephine Tufele. Lupelele Elementary; Sina Mata'afa Alapati, Siliaga; Edward James Desiderio, Nuuuli VocTech; Jordanna Maga. Tafuna High; Talau'u Utuone,  Lauli'i Elementary; Elaine Avia, Leone High; Rosalino Aitui, Alataua 2 Elementary; ma Uluiva Tuialu'uluu Tauanu'u, Fitiuta Elementary.

O i latou uma ia na toe filifilia mai ai le to'aiva mai Lekeona e tauva ai mo le to'a lima e sailia ai le faia'oga o le tausaga: Malosi; Tipi; Afoa; Sene; Tufele; Maga; Utuone; Avia ma Tauanu'u.

Ma o le to’alima e tauva mo le sailiga o le Faia'oga o le Teritori Tausaga 2018-19: Tauanu'u mai Fitiuta Elementary; Avia mai Lekeona i Sisifo; Maga mai le MidWest; Afoa mai le Central Lekeona, ma Utuone mai le Lekeona i Sasae.

Ua ma’ea tofia se Komiti fa’apitoa mo le fa'amasinoina o galuega fa'atino ma fa'amaumauga a faia’oga na tauva ae maise i latou e to’a lima o le a filifili ai le faiaoga o le teritory - lea e faia i le vaiaso Setema 24-27, 2018.

SEMINA O TIMA'IGA TAU LE OLAGA FA'AIPOIPO MA FAIAIGA

O le toe Semina na fa'atautaia e le susuga Adrean Commadeur, o se ali'i tusitala i tusi fa'akerisiano, ma o se tasi fo'i na soifua a'e i Holland i vaitau o le amataga o le Taua lona lua o le lalolagi, a'o pule saua mai ai Adolf Hitler ma lana faigamalo o le NAZI i Siamani.

Na tu'ua e i latou ma ona matua Holland ma fa'amautu i Ausetalia, o iina sa fa'ato'a maua ai e ia le so'otaga ma le Catholic Charismatic Renewal na ua mae'a maua lona fa'ailoga i Mataupu Silisili i le Iunivesite o Melbourne, fa'atasi ma le isi ona fa'ailoga i le Criminology i le Melepone.

Na avea o ia ma sui e faufautua i le fanau solitulafono e fa'aaogaina ai lona silafia i nei fo'i matata na maua ai lona tusi pasi mai lea Iunivesite mo le 22 o tausaga o lona soifua galue ai i Ausetalia.

"I le tausaga e 1971, ua maua'a lo'u fiafia e tatala o'u lagona ona o le Catholic Charismatic Renewal, o i'ina na amata ai ona galue le Agaga o le Atua i lo'u tagata ma ua ou lagona ua ou sa'oloto mai le tele o omiga sa ou natia ma lagona i totonu ia te a'u,” o sana ta'utinoga lea e fa'amalamalama atili ai le mataupu, o le fa'aali o lagona ma ia maua le loto fa'amagalo.

O lana tusi muamua na fa'atauina i le tele o faletusi i Ausetalia, Filipaina, Papua Niu Kini ma Niu Sila o le "The Spirit of the Church"  i le 1992. Ona soso'o lea ma isi ana tusi e valu ae tomuli ai i lana tusi "In Touch with Heaven," i le 2017.

O lo'o avea pea o ia ma Faia'oga i le tele o mataupu silisili i Puleaga eseese a le ekalesia Katoliko ae maise o Semina e vala'auina ai o ia e pei ona faia nei e le Pule'aga Samoa Pago Pago, ina ia fa'asoa mai lona iloa, i tulaga tau le Mafutaga Fa'aleaiga ua Fa'aipoipo, ma ala e mafai ai ona fa'afualoa le mafutaga i le va o pa'aga mafana e to'alua.

I lana folasaga sa ia pa'ia ai le fa'aiuga a Ausetalia, e tusa o le Fa'aipoipoga. Ua suia nei mai le mea sa sau a'i, na fa'aupuina, "O le fa'aipoipoga i le va o le Tane ma le Fafine, peita'i ua fa'amau nei; O le fa'aipoipoga i le va o tagata e to'alua, ua le fa'amamafaina le ituaiga, po'o se tane po'o se fafine, ae ua mafai ona fafine ma le fafine, tane ma le tane, po'o le tane ma le fafine."

Sa fa'ailoa e Commaduer, "Ua tele lena suiga ua fa'amauina fa'aletulafono i Ausetalia, ma ua iloga ai, ua le toe na'o le fa'akerisiano ua fa'amamafaina nei, ae ua sofa'i e Satani lena fo'i tulafono tamau fa'akerisiano sa fa'atautaia mai ai faigamalo. O lea faiga o faiga fa'apolokiki o lenei vaitau. Peita'i ua malamalama Kerisiano i la tatou mau, ia le maluelue ai lo tatou iloa ma la tatou mataupu tamau."

I le polokalama na fa'asolo o lana semina, sa mua'i tu'uina mai se suega mo i latou na vala'aulia fa'apitoa, o Tiakono ma o latou faletua, o so'o se talavou na misia le semina mo talavou i le po o le aso Gafua, ma nisi o ulugali'i o lo'o feagai ma fa'afitauli o mafutaga tete'a.

O lea su'ega sa aumaia ai fesili tau le Tusi Pa'ia e fa'atatau i le fa'aipoipoga ma mafutaga mafana i le alofa, faamaoni ma le talitonu a'ia'i i lau pa'aga.

Ua fesiligia i mafutaga e 4 e matele ina avea ma mea e tete'a ai ulugali'i. O ia mea ua lisia, mulilua o se tasi o pa'aga po'o i la'ua uma; fa'aaogaina o tupe maua; leai se fefa'amagaloa'i ma le leai se mafutaga vavalalata fa'aleulugali'i.

Ua fesiligia fo'i, po'o a mea e tolu e mana'omia e le Ekalesia ina ia mautinoa ai, ua fa'aipoipoina se ulugali'i? O nei mea e tolu: Mana'o ma le mautinoa e fa'atasia oulua i le alofa moni; O lo ua mausali lou taofi, o lau mafutaga lea e tumau; ia iloa o le isi olataga fou lea ua amatalia e oulua.

Po'o a mea e fa e mana'omia ona ia te oulua uma o e mana'o e fa'aipoipo, e mautinoa ai e umi le lua mafutaga fa'aleulugali'i?. "Alofa moni o le tasi i le tasi; Mau Talitonuina oe i mea uma i lo oulua va; Fa'aaloalo i lau manamea; Fa'amaoni e o'o lava i mea itiiti, ia e iloa ona fa'amaulalo i lau pa'aga."

Sa fa'aalia fa'amaumauga o le aofai o fa'aipoipoga tumau mo le na'o le 10 -14 tausaga le umi ona tete'a lea. O le aotelega o le faitau aofai o tagata Amerika uma e fa'aipoipo lelei e 50%, ae o le tausaga 1976 sa faitauina ai e 63% o i latou ua fa'aipoipo. O lona uiga ua pa'u maumalo i le 13 % i le tausaga 2014.

I le fa'atausiusiuga o le semina, sa faau'uina ai uma Tiakono ma faletua ae maise le mamalu sa aofia i lea semina taua, ina ia avea ma se mea faigaluega, pe afai e te va'aia ni ulugali'i o lo'o femisa'i ma ua tauau ina motusia le mafutaga.

"O i tatou uma o lo ua mae'a tu'uina i ai e le Atua le manuia, ina ia atoatoa ai lona mamalu i le lalolagi nei. Ia outou mafuta i le alofa ma le fa'amaoni, ia fa'apalepale le tasi i le tasi i le alofa, ma ia outou tutumau i le malamalama o lo tatou Atua, o ia e alofa tele mai." O toe upu ia ona ma’ea lea o le toe semina i Fatuoaiga Hall i le afiafi.