Ads by Google Ads by Google

Tala I Vaifanua

FA'AMAMA FALEA'OGA & AUTAFA O ALATELE MA AFIO'AGA

 

Ua fa'asaga le Malo i ona matagaluega ta'itasi ina ia fa'atino le fa'amama autafa o alatele, e fa'asolo mai fo'i i lumafale o afio'aga ta'itasi atoa ai ma matafaga, ona o lo ua loma i lenei vaiaso le asiasiga a le afioga le Failautusi o le Initeria, Ryan Zinke. O le aso Tofi lea ua fuafua e to'ai taunu'u mai ai i le itula e 7:30 i le taeao, ae o le a toe tu'uva'a ese atu i le itula e 2:00 i le aoauli o lea lava aso.

 

Peita'i, o le fa'amama a le malo ua aotelega uma matagaluega ma ua fa'apea fo'i ona fa'alauiloa mai mo le mamalu lautele o afioaga tu matafaga ma lumafale i le alatele a le Malo.

 

I le tulaga o falea'oga ma le Polokalama a le Adopt a School, o le tele o galuega sa fa'atino e toe fa'amama ma fa'aleleia nisi o mea ua fa'aleagaina i falea'oga ma lotoa o laumua eseese sa nafa lea ma matagaluega ta'itasi, ma sa fa'atino le tele o galuega i le aso To'ona'i ma le aso Malolo i le aso Gafua.

 

O le a'oga tulaga muamua i Kanana Fou e aofia ai ma le ECE ma K5, sa matua mafuli atu i ai le Pago West Stake o le Ekalesia a Iesu Keriso o le Au Pa'ia o Aso e Gata Ai.

 

E tusa ma le to'a 80 sui totino sa maua atu ua amata galulue mai i le valiga o falea'oga, suiga fo'i o meavalavala o fa'amalama o falea'oga, ma le to'atele o tina e veleina o togala'aua ma tapena le otaota i autafa ma totonu o potu a'oga i lea Laumua.

 

Na fa'ailoa mai e sui o le Komiti Fa'afoe o le Mafutaga a Tina lea e fa'atautaia a'oga uma i Kanana Fou, o lo'o auau fa'atasi le pa'ia o le Ekalesia ma le Matagaluega o le Tinei Afi a le tatou Malo, i lea galuega fa'amama.

 

I le Laumua i Tafuna High,  sa galulue i ai le Pago Central Stake lea e aofia ai Ottoville, Tafuna Makeke uma ma Mesepa. I lenei tausaga, ua matauina ua tu'u mai lava i le toe vaiaso amata a'oga nei galuega alofa uma a Matagaluega ta'itasi.

 

Ina ua fesiligia se tasi o faia'oga i se tasi o a'oga maualuga i le teritori, ona ua va'aia lava le tetele o le vao i le lotoa, ae ua fa'ailoa mai, "O lo ua manatu fo'i e matou te toe galulue fa'atasi i ai ma le Matagaluega lea ua atofa mai mo i matou e le polokalama Fa'amama a le Kovana, peita'i o lo ua fa'atuai lava ona maua se tala pe toe soso'o pe leai lea polokalama fesoasoani mai mo i matou."

 

Ona o lea sa toe saunoa lava Kovana Lolo Moliga, e fa'aauau lea galuega lelei aua fanau ia mama ma lelei mea e amatalia ai le tausaga a'oga fou, o lea ua toe va'aia ai le galulue fa'atasi o matagaluega uma mo a latou a'oga ua mae'a fa'atulaga e fesoasoani i ai.

 

Fa'afetai i le Ekalesia aua o lo ua latou le va'ai i se isi itu, ae ua taga'i i le lelei lautele o a'oa'oga a le fanau, ua latou tali fo'i e tusa o le mana'omia i Kanana Fou Elementary.

 

O le faletua ia Taula Niualama Taifane, o le teutupe a le Mafutaga a Tina, sa ia fa'ailoa mai le agaga fa'afetai o le latou Komiti Fa'afoe, "O le fa'afetai e matua fa'ailoa atu aua e le na'o ni nai sui na malaga mai ma galulue punoua'i i galuega fa'aleleia o falea'oga ma le lotoa atoa i Kanana Fou Elementary. Fa'afetai e leai fo'i se mea e taui ai le afu pa'u ona o le fa'amoemoe maualuga ia lelei le amataga o a'oga ale fanau lea.”

 

FA'ALEAGA LE TOGALA'AU LOTOA A LE VA TAFUNA

 

O le togala'au fua manogi sa mua'i galulue i ai le vasega o Aiga ma Pelega a Fitafita uma ua maliliu a le atunu’u, ua fa'ailoa mai ua fa'aleagaina. O lona a'afiaga fo'i, ua tolopo ai le galuega sa fa'atulaga e faia lea i lea togala'au e fa'alautele ma toe fa'amatagofie atili i le aso malolo i le Gafua na te'a nei.

 

"Ua fa'ailoa atu i ala fa'ata'alise o feso'ota'iga nei a le facebook ina ia e le mao a'e i le galuega sa tu'upo e tatou te pu'eata ai ao fa'atino galuega lelei uma e fa'alautele ma fa'amatagofie atili le togala'au i le Ma'a Fa'amanatu o Fitafita o Taua a le tatou Malo ua mau mai i ti'asa."

 

"Ona o lo ua fa'aleagaina nei la'au uma sa totoina, ua faia ai fo'i se inugapia tele, ma fa'aleaga ai le tele o mea na totoina, ma ua avea ma se nofoaga e le fa'ailoa ai se agaga fa'amafanafana i pagatia o pelega o totoe a nai nei uso a fitafita, ae ua avea ma se mea e fa'aosofia ai lagona o le gaumata'u,” o se tala lea a le tama'itai so'oupu a le Support Group, o tina ma fanau, o aiga o fitafita ua maliliu, Dr Julia Levi Foifua.

 

E le gata la ia i latou o aiga o fitafita maliliu ae o le vaega fo'i a le ASCC Land Grant Program, lea e foa'ia maia le tele o la'au ua mae'a totoina i le togala'au, ae o lea ua fa'aleagaina atoa lava.

 

Ua le gata i le togala'au, ae ua fa'aleagaina ai ma laulau ma nofoa sa mae'a fa'atutuina ai i lea itu o le laufanua o le VA i Tafuna.

 

Ua mae'a fo'i la ona fa'ailoa atu e Dr Levi Foifua lea mataupu faigata i le tama'ita'i fa'atonu o Vetereni i Amerika Samoa Rosie Lancaster, ina ia fa'autagia fo'i lea ituaiga o aga ua alia'i mai i le nofoaga a Fitafita Tuai i Tafuna.

 

"Ua matou toe taumafai e fa'aleleia mea ua fa'aleagaina, ma e le fo'i le matou mau, e ao ina fa'aauau galuega lelei, ae talosia ina ia mafai ona mataituina e le lautele nei ituaiga o aga fa'alemata'u, a va'a'ia, e mafai ona tapu'e ata ma fa'auia mai i le Ofisa o Vetereni po'o le Ofisa fo'i o le Kovana Sili lea e fa'auluulu i ai le Ofisa o Vetereni,” o sana toe tima'i mai lea i le mamalu lautele.

 

O le a toe fa'alauiloa atu fo'i se isi taimi mo lea galuega fa'aauau ina ia manumalo pea mea lelei e ao ina tatou faia.

 

FA'AOPOOPO TAUTUA A LE FALEMA'I MO FITAFITA TUAI

 

O le asiasiga na te'a atu a le vasega o Foma'i Fa'apitoa mo Fiatafita Tuai i le latou Falema'i i Tafuna, na matua fa'atinoina uma ai isi tautua sa le masani ona mafai ona faia i fitafita tuai o lo'o gasolo atu i le tatou falema'i o le VA i Tafuna.

 

Peita'i ua fa'ailoa mai e le tama'ita'i Sui Pule Sili o le Pacific Island Health Care Center, Dr Kathy Ryder, "Ua fa'aopoopo mai isi tautua sa le masani ona fa'auia mai mo tatou Fitafita Tuai i Amerika Samoa nei ma Apia, Samoa fo'i, peita'i o lea ua fa'agasolo mai lava ona fa'aopoopo ma fa'alautele atili le tautuaina o le soifua maloloina o fitafita iinei, e le o toe taofiofia lava se auaunaga i le taimi nei."

 

O talavai na tatala i lea fo'i asiasiga mai a Foma'i mo Vetereni ua aofia ai ma le siakiga o gasegase tau tama'ita'i o so'o se ituaiga, e aofia ai fo'i ma siakiga o le Fatu, ma gasegase tau le Mafaufau.

 

Na matua fa'atumulia fo'i lea talavai, aua ua fa'alogoina ua fa'alautele le auaunaga tau talavai mo le soifua maloloina, ma sa to'atele i latou na malaga mai Samoa mo lea talavai a Fitafita Tuai.

 

Sa maua fo'i le avanoa o le Faipule i le Konekeresi Aumua Amata e feiloa'i ma feutaga'i ma nei ali'i ma tama'ita'i foma'i fa'apitoa a le Militeri mo ana fitafita tuai, sa malaga fa'apitoa mai, faatasi fo'i ma ana talanoaga i Fitafita Tuai sa auai ane e va'ai foma'i.