Ads by Google Ads by Google

Tala I Vaifanua


O se vaaiga i faiaoga i le fa’atasiga a le ofisa o aoga i le aso Gafua. I latou pito i luma, o faiaoga mai le World Teach. [ata: Leua Aiono Frost]

FEILOAIGA AMATA AI TAUSAGA A'OGA 2018-19 - TAUTUA PUNOUAI

 

I tausaga a'oga 2018-19, na poto ai le Matagaluega o A'oga i le vasega o Faia'oga faatasi ma e o galulue i tautua eseese a le matagaluega.

 

Saunoa le afioga  le kovana sili, Lolo Moliga ma ia tima'ia faia'oga, "Ia tatou galulue ponua'i e a'oa'o fanau uma a le atunu'u, aua o lo tatou lumana'i manuia lea. O outou a'ao ua fa'amatu'u atu i ai lenei faiva, ia outou faia ma le fa'amaoni tele, atoa ma lou outou naunau ia fa'aosofia i aso uma, ia tele ni i'a o le tatou faiva!"

 

Sa ia saunoa patino i le vasega o ave pasi a le matagaluega o aoga, "O outou o lo'o nafa ma aseta sili ona taua ma fa'apelepele i ai matua, o a latou fanau. O le aumai i le a'oga ma le toe fa'afo'i atu i o latou fale, o la outou matupalapala tau'ave lea i aso ta'itasi.”

 

"O le tele o isi tautua e feso'ota'i ma le mautinoa e fa'atautaia lelei a'oa'oga a le fanau, i le tapenaga o meataumafa mo le fanau a'oga, o le fa'amamaina o mea uma i totonu o a'oga ta'itasi, fa'apea ma le faamautinoa o lo'o ua fa'atulaga ma fa'atautaia sa'o a'oa'oga a le fanau a'oga i aso ta'itasi e le pulega ma le aufaigaluega, e avatu lava le fa'afetai. Fa'afetai mo la outou vaega."

 

O nisi o tautua sa lisia e aofia ai le World Teach lea e maua ai lava isi faia'oga i potu a'oga. O le vaega a le ERATE o lo'o fa'amoemoe tele i ai ala o feso'ota'iga ina ia tapena fanau ia maua'a i metotia fa'aonaponei. Polokalama o Mea'ai a Fanau A'oga ma le latou fo'i tautua i le vasega o le pulega se'ia o'o i Kuka ma Kiliva o mea'ai ua mae'a fa'avela fa'apea fo'i mea faimea'ai e ao ina fa'ao'o i Umukuka o a'oga eseese e amata mai le ECE se'ia o'o i a'oga maualuluga. O leoleo o a'oga ma le vasega o e faigaluega e fa'amama ma fa'amatagofie lotoa uma o laumua eseese o le teritori.

 

"Fa'afetai mo la outou vaega, ia fa'amanuia le Atua ia te outou, ae ia sili ona fa'ae'e manuia i fanau ia e fa'alautele o latou mafaufau, ia goto a'oa'oga ma ia fa'aaogaina tatau e i latou i le lumanai. O i latou lava le taui o tatou galuega uma o lo'o nopia'i ai.”

 

"O nei lava e amata ai ona e fa'ataua lou avea ma faia'oga! O le mea lava e va'aia e le fanau a'oga o e faia faia'oga, o le mea fo'i lea e latou te faia,” o le isi lea tala tu'usa'o a le Kovana i faiaoga.

 

"Pe a tatou galulue fa'atasi uma, i a tatou pito la'au tau'ave ina ia mautinoa o lo'o ua aoao tutusa uma fanau a le atunu'u, ua avea lea ma tatou pisinisi faitele! Ioe o le tatou Sa lava e fautele, aua ua i ai lo tatou loto gatasi ia fa'aleleia a'ia'i le a'oa'oina o fanau,” o sana toe upu lea.

 

Saunoa le fa'atonusili o a'oga, Dr Ruth Matagi-Tofiga, ma ia fa'afetaia ai le tima'iga ma le fa'amalosi'au a le Kovana. "Ua matou iloa lou naunau i le matagaluega lenei ma ona faiva, aua o le lumana'i lea o Amerika Samoa e fa'afailele ma a'oa'o leleia e i matou, fa'afetai i  lou titi faitama i fanau ia, ae maise o le vasega o faia'oga ma taiulu o a'oga ta'itasi i o latou pulega."

 

Sa fa'aauau lana tautalaga, "Afai tatou te tautua punoua'i fa'atasi e fa'ataunu'u o tatou faiva, e mautinoa lava, e ausia matati'a uma ua manatu i ai le tatou ta'ita'i. "I lenei tausaga ua mafuli le matagaluega ina ia tapena mai so'o se ituaiga o fonotaga fa'alea'oa'oga mo faia'oga uma ina ia fa'aosofia le naunau ma le fiafia e a'oa'o fanau. Manatu o le a tatou faifaiva fa'atasi ma tu'utu'u le upega i le loloto, e tele ai i'a."

 

Sa fa'alauiloa le Faia'oga o le Tausaga, le tamaita'i o Rosalee Tela mai le Nu’uuli Poly Tech High, ma le Pule A'oga o le tausaga, Martha Sagapolutele mai Manulelel Tausala Elementary.

 

AOGA SAO FA'ASAMOA INITIATIVE 2018: MO FANAU AMERIKA SAMOA

 

I lenei tausaga e le gata i le to'asefulu na filifilia mo le fa'aaliga taleni pese i le afiafi a tamali'i le vasega o le fanau ua latou maua sootaga ma taimi e talanoa ma galulue vavalalata ai ma sui iloga na malaga mai e fa'amasino ma fautuaina fanau e fiafia i le pese.

 

O lo ua fa'alauiloa le tu'utoina mai o latou taimi ma taleni, ae maise fo'i o latou so'otaga ma isi e mafai ai ona tutulimatagau e le fanau se manuia mo i latou i le lumana'i, e ala i a latou taleni o le pese ma le fa'afiafia i fa'aaliga na faia i le po o le aso To'ona'i na tea nei i le Fale Laumei.

 

Ina ua maua se avanoa ma le ali'i pese lauiloa John Payne, sa ia fa'ailoa ai, "E le o se tala e mama ia i matou ona avatu le ofo ua taoto nei mo fanau uma a Amerika Samoa e fia saili lona lumana'i i le musika ma pesega, ua ou mautinoa nei, e matua tele le taleni i Samoa. O tagata pepese tagata Samoa, e afua mai lava i le laiti mai!"

 

O se tala a le tama'ita'i o Margot Bingham, o ia o le tama'ita'i e faia ona ata tifaga ma e i ai ata o lo'o fa'asolo mai le televise o lo'o sau ai o ia, ae ina ua maimoa i le fa'afiafiaga a tama'ita'i o le Taupou Manaia, sa ia fai mai, "E matua lalelei, popoto e sisiva, ma le talenia tele o tupulaga laiti o Amerika Samoa i le soifua fa'afiafia. E to'a lelei le pupula, leai ma se fefe, ae leai fo'i se taga e sasi. Tele na'ua le taleni i fanau a Samoa."

 

E le'i leva ae soso'o ane ma le tala e tusa o le ausiva fou fo'i a latou taga ma ituaiga sikaili ua a'e mai ai Le Tiumasalasala. O iina sa fa'ailoa mai ai e le ali'i o Andy Stein, "Oka Oka, e mafai uma ona o atu le ausiva lenei ma manumalo mai Niu Ioka." O nei lava tala fa'amama'i, ae o lo'o afifi mai ai se fe'au taua, "E talenia fanau a Samoa i so'o se faiva.”

 

I le taimi na fa'afofogaina ai pese a fanau na tauva, e tagi ma ata, e fa'ataio le vala'au a le tama'ita'i o Delia Stein ma na tima'iga e matua fa'ailoa ai, ua mausali lona manatu, o iinei o le a tamau fo'i e le Orphan Starfish Foundation i ana nofoaga e tolu lea ua fuafua e fa'atula'ia ai, e aofia ai ma le Pacific Island Foundation ma le tasi i le Manu'atele, ae tasi fo'i po'o Pago Pago e fa'atuina ai mo le fanau i le falelima i sasa'e.

 

"O i latou uma lava ua manumalo,  aua fo'i nei fa'apea se isi, o fa'atauagavale i matou i le fa'amasinoina o lenei fa'aaliga. O se mea sili ona faigata, lea ua o'o mai i ai le tatou fa'aaliga i le taimi nei,” o se tala lea a Stein na fa'ailoa mai.

 

"Tau ina ia iloa e le fanau uma na tauva, o le latou lumanai ma i matou, e matou te le tu'ua, e matou te i ai pea ina ia maua so latou sao matagofie e fa'aauau ai le latou taumafaiga, aua lava ne'i fa'avaivai,” o le tima'i mai lea a Margot Beingham.

 

Imeli ma sui na malaga mai e maua uma o latou tala'aga i le ArteAmor.com ma le Orphanstarfishfoundation.com.