FA'AIU VAIASO TAGATA MATUTUA I UTULEI

O le vaiaso atoa ua te’a na fa’ailoga ma fa'ataua ai e le atunu'u o tatou matua matutua, na fa'amae'aina lea i le fa'atasiga i le malae o le Suigaula a le Atuvasa i Utulei, lea na va'aia ai fo'i le fiafia o i latou e sausaunoa ma talia meaalofa fa'apitoa sa tolaulauina mo nisi o i latou ua loa ona tautua i le atunu'u, ae o lo'o soifua mai pea.

Na tatala mea uma i le solo fa'aaloalo na auai i ai tagata matutua mai le Fale Laumei se'ia o'o mai i le Malae i Utulei i lea taeao.

O le sauniga lotu mo le fa'atasiga na tula'i ai le susuga le Faife'au EFKAS i Faga'alu Rev. Lalomauga Pa'au, ae o vi'iga o lea sauniga sa fofogaina lea e le aufaipese a Samoana High School.

Na saunoa le afioga le Kovana sili Lolo Matalasi Moliga e tusa o le taua o tama ma tina matutua i so'o se atunu'u. "O outou ua loa ona outou iloa le anoanoa'i o mea e ao ina fa'asoa atu i fanau talavou, ma ua taumafai i latou e pu'epu'emaua na manuia. O tomai eseese i le aganu'u ma agaifanua ta'itasi, a outou le fa'asoa mai, e gaogao tupulaga a taeao o le atunu'u. Fa'afetai lea i lenei polokalama ua mafai ona outou o atu i a'oga, fa'aoa fanau talavou ina ia tatou uma lava avanoa e tufa atu ai lo tatou iloa i fanau o tau atia'e ma fatufatu o latou tomai eseese mo le lumana'i."

E ese mai lea sa ia fa'ailoa fo'i, "I so'o se malo, o tagata matutua o ala o manuia sasa'a mai a le Atua i totonu o latou aiga. O le tausiga ma tautiga o fanau e tausia lelei outou, o ala na o manuia ua mae'a tamau e le Atua mo i latou i le lumana'i."

Sa faia faiga siva fa'aleitumalo, afua mai le falelima i sasa'e ma fa'asolo mai ai i le Manu'atele. O siva nei sa tova ai loa le taua'aoina o meaalofa fa'apitoa i sui sili ona matutua o aofia i le polokalama a le TAOA.

O le fa'ailoga sa tapena e le Faipule o Amerika Samoa i le Konekeresi Aumua Amata na taua'aoina i se tasi o matua sili ona matua i le polokalama a le TAOA, ma ua fa'ailoa mai o le Tama Matua, le Fa'afeaigaiga Malolo Manumalo o Ta'ai Lemana. O ia ua loa ona avea ma Fa'afeagaiga i le Ekalesia Metotisi. O tausaga o lona soifua e 98.

O le fa'ailoga na tapena e le Peresetene o le Rotary Club of Pago Pago, na taua'aoina lea i le Tina Matua o lo'o galue pea i le polokalama a le SCSEP i totonu o le TAOA, le tina o Hana Thompson.

O le fa'ailoga lona tolu na tapena e le Kovana Sili ma na taua'ao i le ali'i Foma'i Nifo o Stanley Gurr - o se tasi ua sili ona matua ma ua leva fo'i lana tautua i le Malo o Amerika Samoa, ae o lo'o soifua mai pea. Na auai mai lona faletua o Rose Gurr ma se tasi o le fanau, e la te taliaina le fa'ailoga mo le tama o le aiga.

O le fa'ailoga lona fa na tapena e le Lion's Club President Lisa Tuato'o, ma sa tamau lea fa'ailoga e taua'aoina i le tofa le To'oto'o Fofo I. F. Sunia, o se tasi ua iloga lana tautua i le atunu'u, ae maise lava i lona sao e taofiofi mai le aganu'u, tu ma agaifanua a Samoa, e ala i ona faiva sa galue ai i le Malo, ae ese ai fo'i o ana galuega tau tusitusiga i tusi e fa'atatau i le Agunu'u a Samoa ma le Gagana Samoa.

Ona sa fa'agasegasea le tama matua, o lea sa o'o atu ai lava le Peresetene o le Liona i le Falema'i e fa'ao'o lea fa'ailoga.

I le fa'atausi'usi'uga o le aso fa'apitoa mo Matua Matutua o le atunu'u, sa latou foa'ia ai se meaalofa mo le Kovana Sili ma le faletua. O le tanoa mo le anofale o le tofa le To'oto'o ma le tausi, a'o le fue ma le to'oto'o mo lona tofi fa'afailauga o le gagana.

Ina ua mae'a ona faia lea o le tausamiga tele, ma ta'ape ai le mamalu na aofia, ina ua maea se upu faapitoa mai le fa'atonusili o le TAOA, le tina o Evelyn Satele.

O lana fa'afetai sa ia molita'i i le fa'auluuluga o le Malo ma uso a fa'atonu o matagaluega ta'itasi o le Malo, ona ole fesoasoani e maua pea mo lana matagaluega mai ia te'i latou, "Aua o i matou i le TAOA, o auro ma ma'a taua nei o le Malo Amerika Samoa, matou te tausia ma fa'apelepeleina!"

IOE CEO LBJ - MAUA 7 AFIFI I AI AISA MELI A LE FALEMA'I

Ina ua fesiligia le CEO o le falema'i tele i Faga'alu, Faumuina John Faumuina pe moni na maua le 'aisa i afifi e fitu i le meli a le falema'i, ae tali o ia, "E moni lava!"

O afifi nei e fitu, e eseese vaega o le falema'i na fa'ato'ai mai ai le meliga, Tafuna Health Center, Nursing Divison, Amouli Community Health Center ma le matagaluega o le Soifua Maloloina.

Peita'i, ua mae'a taua'aoina nei mea uma i le vasega o Leoleo Su'esu'e i fuala'au fa'asaina ma vaila'au o'ona, a le Ofisa o Leoleo.

O se mea e ofo ai, ona ua fa'amatala Faumuina, "O nei afifi sa fa'auia ane i le Matagaluega o le Procurement a le LBJ ma fa'ao'o atu i le Vaega o Tausima'i a le falemai, peita'i, e toe fa'afo'i ane e le vasega o Tausima'i lea pusa i le vaega a le Procurement a le falema'i, ae fai mai e latou te leiloa lea afifi."

O iina loa sa fa'aoo ane ai le mataupu i le Ofisa o le CEO a le falema'i ina ia taga'i toto'a i le fa'atauga sa fia fa'ao'o i le Nursing Department. Ua amata fo'i ona masalomia e i latou lea ituaiga afifi e le'i faia se oka fa'apea, ae te'i lava ua meli mai.

Ina ua fa'ao'o i le vaega o leoleo lea mataupu, ua sailia e moni e fitu afifi o lo'o ua meli mai i vaega eseese o le falema'i, ae o lo'o i ai vaila'au fa'asaina o le aisa.

O lo ua fa'ailoa fo'i e Faumuina, e faia se laua fonotaga ma le Kovana e tusa o lenei mataupu, ma ua fa'ailoa mai, "O le tau aofai o le 'aisa mai nei afifi e fitu ua maua nei e tusa lea ma le $420,000 pe a fa'atauina."

I le falema'i lava, ua fa'ailoa mai ai e se tasi o tina matua, "O le pepe a la'u tama o lo'o taofia, ua fa aso talu ona le mafai ona moe, ae ua maua ane e sa'o lava la'u masalosaloga, ua fa'ainu i le vai suamalie o aofia ai le 'aisa. Ua mae'a faia tui o le pepe ua maua le pasene o le 'aisa i lona toto.”

"O lo ua taofia nei i le pilkiaki se'i iloa po'o le a le aso e moe ai,” o le fa'amatalaga lea a le tina matua, ma ua mana'o e fa'asalauina aua o ia te ia le va'ava'aiga ma le tausiga o le fanau a lana tama lea.

Ma ua taoto atu i le vaega o leoleo lenei mataupu.