Ads by Google Ads by Google

Tala I Vaifanua

lALO O AMERIKA SAMOA FA'AMANUIAINA TAUMAFAI I GALUEGA I FAFO:

 

O se tala fiafia mai nisi o fanau sa nofo tatalo ai aiga ma le tatou Malo ona o latou faiva saili tomai fa'apitoa ma le malosi atoatoa e avea ai ma Fitafita a le US Army, ua fa'ailoa mai ua pasia lelei nei latou a'oa'oga AIT.

 

O le tama'ita'i talavou o Pvt. Esther Posala, o se tasi sa avea ma Electronic Layout Specialist a le tatou Nusipepa nei, Samoa News, ua ia pasia lelei le AIT ina ua mae'a maua lona BCT i le tolu masina ua tuana'i. I le taimi nei sa a'oa'oina fa'atasi ai i latou e to'atolu i le MOS po'o le ituaiga galuega i le USArmy. 92M Motuary Affairs Specialist. [Tagata suesue fa'apitoa i tino maliliu.]  O Esther o se alo e fa'asino ia Iava ma Rosalia Posala o Malaeloa ma Faleapuna o Samoa.

 

O le isi na latou to'atolu o le tama'ita'i o SPC Alexandria Tuiasosopo, o se alo e fa'asino ia Tipeni ma Maria Tuiasosopo o Malaeloa.

 

O le toatolu ai o i latou nei o le ali'i o Pvt. Jayden To'oto'o Tanape mai Waianae Hawaii ma o ia o se alo e fa'asino ia Chyann To'oto'o Tanape ma Jon Tanape-Yeagero o Waianae, Hawaii.

 

Peita'i mai le Daly City Police Department i Kalefonia, ua fa'aeaina ai se tasi o alo o le atunu'u, Sgt Joshua Siua Moala. O loo ua talia nei lona fa'ailoga ua si'itia i ai lona tulaga Satini. O lo'o ua fa'afiafiaina fo'i lea itu o Kalefonia ona o le auaunaga a lea alo o le atunu'u ma e fa'aipoipo atu fo'o ia i e tama'ita'i o Rara Lutu Moala mai le afioaga o Fagatogo.

 

Fa'amalo le tatuua i nei alo o le atunu'u, fa'apea fo'i le soifua tausinio i mea lelei e ta'uleleia ai le igoa pele o le tatou malo, ae maise o matua ma aiga. Ia tumau i le fa'amaoni ma le soifua taumafai e faia le auaunaga sili, e vi'ia ai le Atua i mea uma tou te faia.

 

 

 

POLOKALAMA MO TAGATA FAIGALUEGA 2018

 

Ua fa'ailoa mai e le fa'atonusili o le Matagaluega o Tagata Faigaluega, Eseneiaso Liu, sa fai le aso fa'apitoa mo tagata faigaluega uma i totunu o Amerika Samo i le Veterans Memorial Stadium i le taeao o le aso Faraile na te'a nei.

 

O le lona ono lenei o tausaga o lea polokalama, Workforce Day, lea sa amata mai i le 2013 i le amataga o le nofaiga a Kovana Lolo Moliga.

 

O le susuga Patele Kelemete Pua'auli  mai le Pulega Koluse Pa'ia i Leone, o le a taoto i ai le amatalia o le fa'amoemoe i se sauniga lotu mamalu, ae ua tofia fa'apitoa le tama'ita'i o Lydia Faleafine o le Ofisa o le Initeria i le teritori, mo le lauga fa’apitoa o le aso, ae maise le saunoaga fa’apitoa a le kovana.

 

E faia fo'i le tula'i fa'aaloalo e taualoa ai le auaunaga matavela a nisi o le aufaigaluega a le Malo ua maliliu i le va o Setema 2017 e oo mai i lenei vaitau.

 

Ua tofia le toe saunoaga e tulei ai le afioga le Tama'ita'i o le Ao, le Peresetene o le Senate Gaoteote Palaie. O pese ma vi'iga o lea sauniga mamalu o le a taoto lea i le Matagaluega o A'oga ma o le a faia ai ma sina fa'afiafiaga la'ititi e avea ma latou sao i lenei tausaga.

 

O le a tu'u le avanoa lelei i le vasega o pisinisi, kamupani ma isi fo'i fa'alapotopotoga eseese i le atunu'u o le a auai, ina ia solo fa'aaloalo muamua mai i matagaluega ma Ofisa ta'itasi o le Malo o Amerika Samoa i le toe solo ma mae'a ai lea aso tu'upoina.

 

FAIA LE SEMINA FA'APITOA MO LE "OLAGA FA'AIPOIPO!"

 

O lo ua fa'atulaga nei se semina e aoga mo le tupulaga talavou e le'i fai aiga, i latou fo'i ua amatalia aiga ma ua iloga e mana'omia nai fautuaga ina ia fa'aleleia atili le so'otaga fa'aulugali'i, fa'atasi ai ma nisi o lo'o ua tete'a ma ua manatu e tatau lava ona  toe soso'o aiga, a'o a fo'i ni ala e mafai ai ona toe fo'i le mafutaga i se lelei na sau a'i, ma sili atu fo'i.

 

"I so'o se mea i lou soifua, e ao ina tele se taimi e sailia ai sou malamalamaga lelei i ai, ua fa'apea fo'i se mafutaga ua e manatu e ao ina e fa'aumiumi ai, ma sailia ai sou lumana'i fiafia, ma ia le motusia se mafutaga e tuga tele ai lou fatu pe afai ae toe motusia. O le ala lea, a'o le'i mua'i e faia ni fa'ai'uga tau lou fatu ma sou olaga fiafia, e tatau ona e mua'i sailiili matagi i ala uma e mafai ai ona taofiofia mai oulua ma lau pa'aga, lau manamea ina ia le motusia lava,” o se tala lea sa fa'aataata mai ai le uiga tonu o le semina o le soifua fa'aipoipo lea ua mae'a fa'atulaga e fa'ataunu'u i le afiafi o le aso Tofi ma le aso Faraile Aukuso 30, & 31, 2018 i le Lee Auditorium, 6:30pam - 9:00pm, i Utulei.

 

O le fa'aulutala o lenei semina ua fa'ailoa mai, "Semina: Olaga Fa'aipoipo!" ma ua fa'atautaia lea e le fa'alapotopotoga ua fa'aigoaina i latou, "Aiga Uma ia Keriso!"

 

Mo le fanau talavou ua matutua ma ua lagona fo'i e i latou le alofa fa'atagata matua e amatalia ai se aiga, ua aoga ia i latou lenei semina, e fa'alogo ai i folasaga, o manatu e tusa o le soifua fa'aipoipo, o lu'iga e ono o'o mai ona o le mafutaga vavalalata ma lau pa'aga, le la'ei e te la'eia i aso uma e te lua fa'atasi ai o se ulugali'i.

 

O le vasega o i latou ua motusia mafutaga ma ua tete'a, e aoga fo'i ia te'i latou lea semina, aua o le a toe fatufatu lagona lelei, ma toe fa'aosofia manatu lelei, atonu o fautuaga ma timaiga o le a e maua i lea semina, e toe gafatia ona soso'o ai le mafutaga mafana i le alofa ma le fa'amaoni, ae maua tonu ai le agaga o le fa'amagalo.

 

O lo ua i ai fofoga fa'apitoa o le semina lenei, Pr Manase Kolicusoa o le Asia Pacific Regional Director mo le Aiga ia Keriso ma le susuga fo'i le Faife'au Barry Forsgren.

 

O le semina lenei o le a fa'atautaia, e le o fa'atutu ina ia o mai ai na'i sui o lea fo'i ekalesia, ae ua vala'auina so'o se tasi lava e manatu e fia auai e fa'afofoga, utuina lau kate i upu ma fautuaga lelei e fatufatu ai le mafutaga fa'aleulugali'i, ma iloa lelei, o mea uma lava, e ao ina afifi ma fa'amaopoopo lelei ona o le Alofa.