Ads by Google Ads by Google

Tala I Vaifanua


O le mae'a ai lea o le sauniga mamalu, ma ua fa'asolo atu i latou uma na aofia e fa'atalofa ma fa'amanuia toe fa'amavae atu i lana susuga le Faife'au Samoa Faletoi Uso ma le Faletua o Violina Uso. O i latou uma fo'i nei sa pa'au atu ua mafai ona maua i lea taimi mo lenei ata. [ata: Leua Aiono Frost]

"TUSI FA'AMAVAE REV FALETOI USO - EKALESIA I VAILOA" FILIPI 4

 

"O lenei o'u uso e, o e ou te alofa ma naunau i ai, o lo'u fiafia ma lo'u pale, le au pele, ia fa'apea ona tumau outou i le Ali'i.... Ia outou olioli i le Ali'i e le aunoa, ou te toe fai atu, ia outou olioli."

 

O le tusi a Paulo i le Ekalesia i Filipi i lona mataupu e fa, na si'itia atoa mo le toe lauga a le tama o le Ekalesia ua atoa le 46 tausaga o lana auaunaga i le Atua e ala i lona fa'anofonu'u ma tausi le Ekalesia a le EFKAS i Vailoa.

 

Sa ia fa'atinoa fo'i lana toe Fa'amanatuga, o lona toe tula'i fo'i lea e tima'i i lana ekalesia i amio e talafeagai ma le tagata o le Aiga o le Atua: Le Au Uso e, o le toe upu lenei, o mea uma ua moni, o mea uma ua ta'uleleia, o mea uma ua toni, o mea uma ua mama, o mea uma ua matagofie, ma mea uma ua logoleleia, afai fo'i o se isi amio lelei, o se tasi mea e vi'ia, ia outou manatunatu i ia lava mea."

 

I lea lava fo'i sauniga, sa tutula'i le tina mo lona sao i le latou fa'afetai ma le fanau i le afio'aga sa soifua a'e ai i latou, ma le Ekalesia sa latou fa'afailele ia i latou uma e o'o mai ina matutua ma ua faia fo'i aiga o nisi o i latou.

 

I le sauniga sa fa'atasi atu fo'i ma le Ekalesia Katoliko i Vailoatai.

 

I le laua to'ai mai ina ua vala'auina e to'atasi lava si o laua alo ulumatua o Tanielu ua maua, peita'i ua toe taliu i latou, ae ua to'a 13 i latou ua faitauina lelei ma ua fa'afetaia i le tele o aiga, sa latou fa'afaileleia le fanau.

 

O lana fa'afetai sa ia tolaulau uma ai suafa o tina matutua ua leva ona mapu mai i ti'asa, o i latou sa fesoasoani ia te ia i le galuega fa'apea le tausiga o le fanau a'o laiti se'ia o'o ina matutua nei. E tofu lava lana fanau ma le tina e fiafia i ai, ma aga'i i ai, e tafafao ma momoe ai i le tele i taimi.

 

"Fa'afetai i lo outou alolofa ia i ma'ua ma le fanau. Fa'amagalo mai i matou ma le fanau, aua e mautinoa lava, e i ai mea sa matou leaga ai, ma lape ai le mafutaga, aua e sala lava i le sasi tagata uma i lenei soifuaga."

 

O toe upu mavae a le tina o le galuega i lana mafutaga, "Vailoa ma la'u mafutaga pele, ou te alu aua e usitaia le fa'atautaiga o le galuega ua tatou galulue ai nei, ae o lo'u fatu o lo'o ia te outou ma le galuega a le Atua. Ia outou faia mea uma lava ma le olioli ma le ta'uleleia. O mea ua lelei, ma ua malie i fofoga o Ie Atua."

 

O le 'auga o lana toe Upu, sa ia fa'amanatu ai, "O Aseta tumau, e fiu gofie, e le fa'avaivai, ae fa'amalolosi ma fai mea tetele. E ta'uleleia ma e tumau e le ma suia. Le galuega o le a tu'u atu ia te outou, ia outou faia i nisi atu fa'afeagaiga soloa'i mai, ia sili atu i mea ua outou faia ia te'i ma'ua ma le fanau, aua ua outou masani i le fai mea lelei ma le ta'uleleia. Vailoa, ua e masani i mea lelei, aua ua fa'amanuia fo'i le Atua ia te outou i mea silisili ona lelei i le tino ae maise i la le agaga!"

 

O le to'ona'i na soso'o ai, sa mafuli i ai le Mafutaga a Tina, ma e ui ina to'atele, ae sa tofusia i latou uma na auai i le la'oa'i.

 

O fa'aaloaloga a le Ekalesia ina ia mavae ai ma lana auauna, sa fai lava se faigata ona tulei saunoa i ai fofoga fetalai o le afio'aga. Peita'i na tofusia uma le Ekalesia Katoliko, le pa'ia fo'i o le afio'aga i lona tala na atoa i le afio le afioga le Alo o Salamasina Satele Galu Sr, ma ua fa'apea fo'i ona fa'aso'o fa'aaloaloga i le pa'ia o aiga na lua i le tama o le galuega ma le faletua.

 

Na tofu sua fa'aaloaloga ae maise fo'i o le tatalaina o le feagaiga na osia i le 46 ai lenei o tausaga talu ona molita'i mai lana 'au'auna e galulue i le Ekalesia. Na fetu'una'i lava, peita'i na tula'i le sui o aiga na lua, le susuga le Fa'afeagaiga mai Niu Sila na ia fa'apupula le ie o le fa'amagaloina o ni lape o le Faife'au ma le Faletua ae maise le fanau. Na tete'e aua ua finagalo Fa'aua'a Kateferu ma le afioga Satele, "E le fa'amasinoina le Faife'au i lana galuega, o le matupalapala lea o le Atua, ae o lea fo'i e fa'afualoa le soifua o le Tama, e le tatau ai ona taoto lea ie i le afio'aga po'o le ekalesia."

 

Peita'i na tula'i Rev. Uso ma ia fa'ailoa, "E le faigata ona ou fa'apea atu, Vailoa, la'u ekalesia, o le ie lea ou taoto malolo ai i Vailoa, pe a o'o mai le vala'au pa'ia! Ia taoto le ie i la'u ekalesia, ae leai so tatou e le agasala, e tofu i tatou uma ma sasi i luma o le Atua, e mautinoa fo'i e tele o'u fa'aletonu. A o'o mai ona po e malolo, ou te sau fiafia ou te moe i la'u ekalesia na amata ai le soifua tautua, ua i'u ai fo'i le auaunaga i lo'u Atua."

 

Ona matua fa'afiafiaina ai lea o finagalo o itu na lua e tusa o lea mavaega, ma taoto le ie o le fa'amagalo i le Ekalesia, ma ta'ape ai le fuamanusina, ua fiafia i latou uma, ae fa'anoanoa ona o le mafuataga mafana o le a motusia.

 

22  FAIAOAGA A LE WORLD TEACH GALULUE MO LE ASDOE:

 

I lenei tausaga aoga fou a le malo, ua atoa le 22 o faia'oga ua mae'a fa'aa'oa'o fa'amasani i le faia'oga i potu a'oga i le tatou matagaluega o A'oga, ma sa auai foi i latou i le fa'atasiga e tatala ai lenei tausaga a'oga fou ua savalia, lea sa faia i le Faleta'alo o le aoga maualuga a Tafuna, i le taeao o le aso Gafua na te'a nei.

 

O i latou e to'a 22 ua mae'a fo'i ona fa'atulaga mo a'oga e galulue ai. O i latou nei e aofia ai: Sarah Wells ma Sammi Matsunami e faia'oga i Olosega Elementary. Tasi Lovel e faia'oga i Samoana High a'o Jake Honkler e faia'oga i le Manu'a High School.

 

O Allee Knofczynski faia'oga i Pavaiai Elementary a'o Arisa Marx ua filifilia e faia'oga i Samoana High. O Michelle Fasano ua fa'atulaga e faia'oga i Siliaga Elementary i Aoloau, a'o Allyson Gilbert e faia'oga i le Samoana High, a'o Rachel Goldin e avea ma faia'oga i le a'oga i Lupelele Elementary i Iliili.

 

Ua mautu mai fo'i o Joshua Goldin e faia'oga i le Nuuuli Voctech High, a'o Eshani Pandyn i Leone High. O Christopher Youngauist e la te to'alua i Leone, a'o Nicholas Brady i Tafuna High School.

 

O Bailey Kadran e faia'oga i Pavaiai Elementary, ae a'e le tama'ota'i o Cheyenne Rodriguez i Leone Midkiff Elementary. O Luke Williams i Leone High, a'o Samantha Bongorno i Tafuna High.

 

O Jenny Kilbride i Siliaga Elementary a'o Meghan Kelly i Lupelele Elementary, a'o Matt Boden i Manu'a High. O Quinn Holland i Manu'a High a’o Bobby Vickers i Samoana High.