Tala I Vaifanua
A'OA'O TAGATA FAIGALUEGA POLOKALAMA MEA'AI FANAU A'OGA I MEA'AI PALENI
I le aso atoa ananafi sa fa'atautaia ai le polokalama e aoao ma fa'amautu atili ai le tomai o i latou e tapenaina, kuka ma tufatufa mea'ai i fanau a'oga, e ala i le polokalama o Mea Taumafa a le Fanau A'oga po'o le School Lunch Program, [SLP].
O i latou ua fa'asoa mai lo latou iloa ma a latou suesuega i mea'ai paleni e ao ina taumafa ai fanau a'o laiti ma tuputupu o latou tino, o le Institute of Child Nutrition (ICN) mai le Iunvieste o Mississippi. O i latou na o lo ua latou sailiili ituaiga mea'ai eseese ma lo latou aoga, tu'ufa'atasia semina matagofie mo le fa'alauiloaga o nei taumafa eseese ma latou toe saunia ala e fa'alauiloa atu, e pei la o a'oa'oga fa'apitoa nei.
O le tama'ita'i o Jamie Stamey, o se tasi iloga o le ICN, na ia fa'alauiloa le ala o le latou tapenaga o mea'ai paleni mo le fanauiti se'ia o'o ina talavou i latou uma.
E tolu vaega o lea a'oa'oga ua tapena mai e Stamey, "E muamua lava ona fa'amanino atili le tulaga o le teuina o taumafa, kukaina o taumafa ma lo latou tapenapenaga a mama mea uma, ala ua le maua ai e le au suesue nisi o fa'aletonu i tapenaga o mea'ai a le fanau a'oga, faapea fo'i ma ala o lo'o faia e aufai'oa ina ia fa'asese ai lau fa'atauga o mea taumafa lelei, ae mulimuli i ala e mafai ai ona umi le aoga o nei mea taumafa po'o mea e gaosia ai mea'ai paleni lelei mo le soifua maloloina o fanau talavou."
Ua tu'uina mai le ala o feso'ota'iga a le ICN mo le silafia a le mamalu lautele o Kuka o le Polokalama fa'apea ma le latou fa'auluuluga e le tamaita'i fa'atonu sili o le Polokalama ICN Dr. Aleshia Hall-Campbell, pe afai lava e i ai se fa'afesili po'o se isi ala e mafai ona fesoasoani mai ai i le LBJ po'o le WIC ina ia mautinoa fo'i o alagatutusa lelei lea polokalama ma le tausiga fo'i o fanau i mea taumafa a le SLP pe a o'o ina ulufale le fanau i a'oga.
O latou laina feso'ota'iga tafa'ilagi "helpdesk@theicn.org." ae o le Uepesite a le ICN i le Iunivesite o Mississippi o le www.theicn.org, mo ni fa'afesili e ese mai le a'oa'oga fa'apitoa ua faia nei mo le aufaigaleuga. O le ICN o lo ua mae'a sapaia e le USDA and Nutrition Service, ma o le latou fa'atupega fo'i e ala mai i lea vaega o le fetarale.
TOGALA'AU FUAFUA TOTOINA LOTOA MA'A FA'AMANATU FITAFITA MALILIU
O le nofoaga o lo'o fa'atuina ai le Ma'a Fa'amanatu o Fitafita o Taua ua maliliu i Tafuna, lea fo'i e fa'atuina ai ma le latou Ofisa Autu e tautuaina ai Fitafita Tuai ma Fitafita Tiute fo'i i lenei vaitau, ua fuafuaina e totoina se latou togala'au o fugala'au manogi ma le matagofie, ina ia fa'afo'ia le fiafia i loto ma agaga o i latou e asia lea ma'a fa'amanatu, i so'o se taimi.
"O lea poloketi na mua'i mafaufauina e le faletua o le Afioga le Lutena Kovana Lemanu Peleti Mauga ua maliu Pohakalani Mauga ma le tina o le atunu'u, Cynthia Malala Moliga,” o se fa'apupulaga lea a le tama'ita'i o Dr. Julia Levi Foifua.
“Peita'i ua fa'ailoa mai o le aso 3 Setema, 2018, o le aso malolo foi mo tagata faigaluega uma lava i galuega leipa, o le a tu'u ai lea galuega lelei i lona fa'atinoga e tatau ai, ma ua matua sauia fo'i tina uma o le Survivors Outreach Services latou te fa'atinoa lea poloketi lelei ma le aoga,” o se tala lea a Levi-Foifua.
O tina i le Survivors Outreach Serices (SOS), o tina nei o aiga ua maliu se tasi o fanau sa fitafita, po'o le tama fo'i o aiga sa fitafita, o latou pelega nei e fiafia ai i latou e asia lea nofoaga, ae ua manatu fo'i i latou e aoga tele lea galuega lelei e avea ma vaifofo i o latou lagona o'otia ma loto nutimomoia i le motusia o le mafutaga mafana a'o fa'ataunuu tiute na tauto ai. Ua le gata la i tina ae ua fa'ailoa mai, e auai uma ma fanau ma aiga i lea taumafaiga.
O la'au uma e faaaogaina mo lea poloketi, ua foa'ia e le ASCC Land Grant Program, ma o le a aofia ai Lemanu i le totoina o nei la'au. Ua ofo mai fo'i tina o le SOS, e tele fo'i latou la'au fuamanogi ma le matagofie o le a fa'auia mo lea galuega ina ia mae'a ane ua matagofie mea uma.
O i latou ua aofia i lenei polokalama mo le aso Gafua a sau nei e aofia ai: Le matagaluega o Paka ma Malaeta'alo; Veterans Affairs ASCC Land Grant; Public Works; American Samoa Alliance ma le KVZKTV.
TALANOAINA ESEESEGA AUINA O MA'I I AMERIKA MA NIU SILA
Ua iloga mai e i ai le eseesega i le togafitiga ma isi tautua e mafai ona faia i gasegase e auina atu i Niu Sila ae totogia e le Medicaid Office ae ese foi mo i latou e auina atu i falema’i i Amerika.
Fa'ailoa mai e le Medicaid Officer Sandra King Young, "O le eseesega e i ai le sui faapitoa i Niu Sila e mafai ona ia fa'agaoioia uma le va'aiga o gasegase ma le tautuaina o i latou e gasolo atu mo togafitiga. O la sui ua fa'akonekarate i le maliliega e fa'aaoga le Medicaid e totogia ai togafitiga ae ia fa'afaigofie atili le feuiuia'iga ma togafitiga ma taimi e faia ai talavai atoa ma nai fautuaga i mea e mana'omia e gasegase e gasolo i Niu SIla lea la e matua eseese ai fo'i le o'o atu o gasegase mai Amerika Samoa i Niu SIla."
"Lona lua o le tulaga tau le totogi o talavai, e taugofie tele Niu SIla pe afai e fa'atusalia i le totogi o talavai i Falema'i i Amerika. E fa'apena fo'i ma le totogi o pasese, e taugofie mamao fo'i le pasese mo Niu Sila aua e latalata mai, ma e fai si maulalo o le tau o le tala a NZ nai lo le tatou tala, ae o lea e tutusa lava le tatou tupe ma Amerika,” o lana toe fa'apupulaga lea e tusa o le eseesega o nei tautua e lua mo gasegase ua agava'a i le Medicare.
O le faigata lea e feagai nei ma gasegase e auina atu i Amerika, e na'o le totogi o le pasese. E leai fo'i se tasi o fa'afaigaluega mai e va'aia ma feso'ota'i gasegase e malaga i Amerika mo talavai.
I le taimi nei ua atoa le 70 o i latou ua auina atu i Niu SIla mo talavai ae totogia e le Ofisa o le Medicaid.