Ads by Google Ads by Google

Tala I Vaifanua

SEMINA MO FAIA'OGA - FA'ALELEIA ATILI AI FAIA'OGA POTU AOGA

 

Ua mae'a ona fa'alauiloa le Semina fa'apitoa "Professional Learning Community" lea e fa'atautaia e le Matagaluega o A'oga i lona vaega a le Teacher Quality ma le polokalama o le Solution Tree.

 

Ua fa'amalosia faia'oga uma ina ia auai, e sailiilia ala e fa'aleleia atili ai le tomai fa'afaia'oga i potu a'oga, ae silisili fo'i ona e maua'a i ala e mafai ona fa'aosofia ai le fanau a'oga e fiafia e fa'alogo ma fa'aa'oa'o i au a'oa'oga i taimi uma.

 

Ua fa'atulaga aso e lua mo lenei semina, lea ua muamua ai ona tu'ufa'atasia faia'oga o a'oga maualuluga fa'atasi ma faia'oga ECE i le aso Lulu i le Fale Laumei i Utulei, ae mulimuli i le aso Tofi i le vasega o faia'oga elementary uma lava ma faia'oga o le Special Education.

 

E amatalia i le itula e 7:30 i le taeao ae fa'ato'a mae'a vasega i le itula e 4:00 i le afiafi. O lo ua fa'alauiloa fo'i e i ai fa'amanuiaga e mafai ona agava'a ai faia'oga e auai, ina ia fa'aaoga mea e te maua mai ai i lea aoaoga fa'apitoa i le fa'atautaiga o au vasega i lou potu a'oga.

 

Peita'i o le isi lava mea taua tele mo faia'oga e auai i lenei semina, o le so'ofa'atasi lea ma isi faia'oga i nisi vasega o isi setete ma teritori ina ia fefa'asoa'i o outou lagona i le fa'atautaiga o vasega ta'itasi i au mataupu o a'oa'o ai, po'o ni fa'afesili fo'i o e mana'omia ai se fesoasoani, ae agava'a ai nisi faia'oga i fafo atu o le tatou atunu'u.

 

"Fa'aauupegaina oe le faia'oga, ina ia e gafatia ona a'oa'o le vasega atoa ua atofa ia te oe i lau mataupu o e faia'oga ai. Ma ia e iloa fo'i auala eseese e fa'aosofia ai le lagona fia fa'alogo o le tamaititi i lau a'oa'o atu, pe fa'afiafiaina o latou loto ina ia faigofie ona maua'a le a'oa'oga o lo'o e avatua ia i latou i taimi o au vasega,” o se tala lea a le tama'ita'i o lo'o nafa ma le tu'ufa'atasia o lea semina a le Vaega a le Teacher Quality.

 

Peita'i, e ui i le to'atele fo'i o sui agava'a o le tatou Matagaluega o A'oga e fai o latou sao i lenei Semina, ae ua i ai le sui fa'apitoa mai fafo mo lea a'oa'oga, le susuga Marcus Johnson.

 

MANUMALO AUFAIPESE LEONE & ASILI, FIAFIA MO LE TINA MARIA-KATOLIKO

 

I le fiafia na fa'atulaga a le Ekalesia Katoliko e fa'amanatuina aloa'ia ai le Tina Pa'ia o Maria le tina o Iesu, na fa'atautaia ai le tauvaga pese mai aufaipese a sone ta'itasi e fitu a le Pule'aga Samoa Pago Pago. O le aso To'ona'i na te'a nei sa faia ai lea fa'atasiga i Fatuoaiga Hall.

 

O le i'uga o lea tauvaga pese, ua sola le Aufaipese Tu'ufa'atasi a Leone Koluse Pa'ia ma Asili ma le manumalo i le usuina o le Pese - Ave Maria i le Gagana Samoa. O le tala mai, e le'i faigofie lava lea tauvaga pese, aua e tau fai lelei uma fo'i tapenaga a Matagaluega e fitu sa fa'atauva i lea fa'atasiga.

 

O le fanoga na mafua ai lea fo'i tauvaga, ua manatu le afioga Epikopo Peter Brown ina ia aoao mai uma lava tagata lelei le musika e ta'ita'i mai latou aufaipese, ae usuina le pese e fa'ataua ai pea le Tina Pa'ia o Maria.

 

O sui na fa'amasinoina lea tauvaga matagofie, e aofia ai Tiakono Falaniko  Tamiano mai le Pule'aga Samoa-Apia; Dr Julia Levi Foifua mai le CCJS i Fagatogo; ma Leota Mapusone o se tasi o ta'ita'i pese mai Nuuuli.

 

O le pese fa'atauva o le "Ave Maria" fa'asamoa, na tusia lea e Pr Eneliko Auva'a ae fesoasoani i ai lona uso ta Piano ma e Taimipese fo'i o Lose Auva'a, i lona fa'anotaina.

 

O le tulaga lua o le tauvaga pese lenei o le Pulega lea a Lepua ma Leloaloa mai le sone i sasa'e, ae tulaga tolu ai le Aufaipese tu'ufa'atasi a Alao, Lauli'i ma Sailele e malaga mai fo'i le sone a sasa'e.

 

Sa auai i lea fa’atasiga, le afioga le Faipule i Uosigitone Aumua Amata ma le Tausala Lalelei o le Pasefika ma Amerika Samoa Ms Matauaina Toomalatai, fa'apea fo'i le mamalu lautele i le aufaigaluega pa'ia a lea fo'i Ekalesia tele i le atunu'u.

 

O se tasi lea o taimi ua vaaia ai le matua fa'atumulia o le Hall tele i Fatuoaiga, ona ua poto fo'i aufaipese ma latou tapua'iga i totonu ma fafo o lea Maota.

 

MAOTA FA'AMAUTU I AI SUESUEGA MA GALUEGA FESO'OTA'I I MANU'A

 

O lo ua manatu ni ali'i faipisinisi o le atunu'u o le a latou tutu fa'atasi e fa'atulaga se fale fou i Manu'a e mafai ona fa'aaogaina mo galuega suesue eseese tau le Siosiomaga i le Manu'atele.

 

O lea fale o le a auga lea ina ia fa'amautu i ai i latou e fia fa'atautaia su'esu'ega i so'o se vaega o le Si'omaga, ae maise lava ia i latou e malaga mamao mai fafo mo suesuega i le gataifale, i le amu o a'au ma i'a ae maise fo'i o sailiiliga i le vaomatua ma ona sosia i la'au ma manu uma o lo'o ofaga ai.

 

O i latou nei ua manatu ina ia fa'atula'ia lea ituaiga o tautua i le Manu'atele, o le vasega o aufaipisinisi  i le teritori - American Samoa Chamber of Commerce.

 

O le latou Taitaifono o tula'i mai lenei tausaga, John Wasko, sa tula'i ma fa'ailoa lo latou lea taofi i le fonotaga a le US Coral Reef Task Force lea sa tatou talimalo ai i le vaiaso ua te'a. "Ona ua iloga mai le to'atele o fanau a'oga, polofesa mai Iunivesite i fafo e aga'i mai ma solo atu i Manu'atele mo a latou suesuega i le gataifale ma le vaomatua, o lea ua manatu ai nisi o le aufaipisinisi i le tatou nei malo, e fausia se fale e mafai ona tu'ufa'atasia uma i ai a latou tapenaga nei, ia fa'afaigofie o latou faiva i fanua ma ia mafai fo'i ona latou nonofo lelei ai ma tausia lelei lo latou soifua maloloina i le fale o le a fa'atuina."

 

O lo ua fa'ailoa fo'i, o le a lava se seleni e mafai ona maua mai nei tagata uma e alaala ma fa'aaoga i le taimi atoa o latou suesuega, o le a toe fa'aaogaina e atina'e atili ai nisi galuega i le Manu'atele.