Ads by Google Ads by Google

Tala I Vaifanua


O se va'aiga i alo e to'alima o Samoa, o Toa fo'i o le atunu'u, ua fa'aulufaleina i le polokalama e sailia ai tofiga Sgt Major po'o le E9 i Fort Bliss Texas: MSG Falemali'i Tualamali'i; SMG Paul Tuimavave; CSM Nuuese Passi o le fa'atonu o le polokalama; MSG Pete T Leao; MSG Amasia Pousima ma Joshua Kazaka. [ata: foa'i]

5 TOA O SAMOA ULUFALE I LE SGT.MAJOR ACADEMY FORT BLISS

 

O se tala fiafia mai le setete o Texas ona ua mafai ona filifilia le to'alima o nisi o alo o le atunu'u o tautua i le USArmy, ma ua mae'a atoa le ulua'i vaiaso o le latou a'oa'oga fa'apitoa mo tofiga Sergeant Major i Fort Bliss, Texas.

 

O le fa’atonu o lea aoaoga o le susuga CSM Nuuese Passi, o se tasi o alo fo'i o le tatou atunu'u, i le Army.

 

O i latou e to'alima e aofia ai:

 

• MSG Falemali'i Tualamali'i mai Vailima, Samoa ma Nuuuli Amerika Samoa. Sa aoga ma fa’au’u mai i Avele College i Samoa.

 

• MSG Paul Tuimavave mai Futiga ma na fa'au'u mai le a'oga a Marist Brothers i Amerika Samoa.

 

• MSG Pete. T Leao mai le afio'aga o Afao, sa fa'au'u mai o ia i le Damien High School i Honolulu ma ulufale i le USArmy.

 

• MSG Amasia Pousima mai Afono, na fa'au'u mai Samoana High.

 

• Joshua Kazaka mai Tafuna ma na fa'au'u mai Leone High School ma ulufale ai i le US Army.

 

Fa'amalo tauivi ma o lo'o tapua'ia o outou faiva e le pa'ia o tou matua ma aiga, ekalesia ma le Malo atoa, aua o outou lava o le malosi o le nu'u. Fa'afetai mo la outou tautua!

 

E ONO FA'ATUAI TOE TALIU MAI FANAU TINEAFI A LE NPS

 

E pei ona lau silafia e le atunu'u, e to’a 17 alo o Amerika Samoa mai le National Park of American Samoa, i le Setete o Kalefonia ina ia tineia le afi o lo'o sasao i Redding.

 

Ma sa fa’amoemoe o le aso 3 Setema e toa foi mai ai i latou, ae o lea ua logotala le ali'i Pule o le Paka, Scott Birch, e tauau e fa'aumiumi atu le taimi e malaga ai i latou mo ia faiva i Kalefonia.

 

"Ona o le tulaga o i ai nei le sasao a le afi i le vaomatua i Kalefonia, e le o fa'aitiitia, e tauau e i ai se toe soso'oga o le taimi e nonofo ai i latou nei ma fa'atino pea tiute se'ia mae'a,” o se tala mai lea a Birch.

 

Ua tele fo'i o latou ata ma fa'amatalaga ua fa'alauiloa mai i nai o latou aiga e ala i tala tusia i nusipepa ma fa'asalalauga fo'i i luga o leitio, ona e faigaluega malosi ma le fiafia i latou ma pepese. A o fo'i e fa'atau, e o fa'atasi ma fai mai a latou tala i luga o fe'au fa'avave a le facebook ma le messenger e alolofa mai i nai o latou matua ma aiga.

 

O lo'o malolosi lava i latou ma e le o i ai se tasi o i latou o afaina e o'o mai i le taimi nei. Ua manatu fo'i Birch ina ia fa'alauiloa atu lea tala, ia nofo tatalo pea pelega a i latou, ia alofagia e le Atua o latou tiute faigata i na nofoaga o lo'o mu atoa o latou vaomatua.

 

SIAKIA E LE HRSA TATOU FALEMAI FA'AITUMALO

 

I le vaiaso ua te'a na asiasi mai ai sui a le Health Resources Administration [HRSA] a le US Department of Health and Human Service ina ia asia a tatou falema'i Fa'aitumalo a Leone, Tafuna, Amouli ma Fagaalu ona o lo'o pili atu le vasega o talavai uma e faia ai i le Medicaid, e pei ona faia fua ai nei talavai uma lava i nei Falema'i Fa'itumalo.

 

E le o se mea e fou pe atugaluga ai fo'i le atunu'u i lea tulaga, ae maise ai o le pulega ma le aufaigaluega a le tatou Matagaluega o le Soifua Maloloina, o le fa'atautaiga lava lea e masani ai le Matagaluega o Soifua o le Malo Tele ina ia mautinoa o pilia sa'o le Medicaid i le ituaiga tautua o lo'o gafatia ona faia mo le mamalu lautele mai nei falema'i fa'aitumalo.

 

E to'afitu la sui sa malaga fa'apitoa mai mo le latou sailiiliga lenei, a mae'a ona latou saunia lea o se lipoti talafeagai ma le tulaga o latou va'aia o fa'atautaia ai talavai a le mamalu lautele, le tulaga o togafitiga o lo'o taua'aoina atu, le nofoaga fo'i ma lona agava'a i le tautuaina o le mamalu lautele, ae maise o le tulaga tau tomai o foma'i ma o latou agava'a o i ai, ma le aofai fo'i o le aufaigaluega o fa'atinoa nei tautua uma.

 

O le matua faafetaia lava e le mamalu lautele le totogia e le Medicaid o pili o latou talavai, ma o se fa'amama avega lea i le to'atele o matua ma aiga, aua e taugata fo'i lea tautua pe afai e totogia mai le taga ae toe totogia ma vaila'au po'o fuala'au pe a mae'a siakiga a foma'i.

 

"E talosia ae pasia lelei tatou falema'i, o se mea lelei le aveesea atu o le pili o siakiga a foma'i e le Medicaid, ae a le pasia, o lona uiga ua toe fo'i i tatou e totogi le siaki a le foma'i fa'atasi ai ma pili o fuala'au ma vaila'au mo vaifofo o gasegase. Ua manaia lava le sefe lea e alu ai i lenei vaitaimi,” o se tala lea a se tasi o tina sa malaga atu e faia talavai a le fanau o le a a'e i a'oga maualuluga i le teritori.

 

E le'i mafai ona talanoa mai nisi o nei sui na malaga mai, ona o lo'o ua latou fa'ailoa mai, e tatau muamua ona fa'auia se latou talosaga pe mafai ona talanoa mai i le au fa'asalalau e tusa o le latou galuega o fai nei i falema'i fa'aitumalo iinei. O lea fa'atagaga e aumai sa'o mai le latou Ofisa Ulu i Uosigitone.

 

Peita'i ua fa'ailoa mai e se tasi o le DOH, e le o popole i latou, o le galuega lava e ao ina faia, e fa'amaoniga o tautua o lo'o ofoina atu i tagata, agava'a o e o fa'atinoa nei tautua, ma le tulaga lelei fo'i o le maota gasegase fa'aitumalo mo le tautuaina o le mamalu lautele, lea e tatau ona siakia fo'i e le fetarale.

 

8.2 MALOSI O LE MAFUI'E, AE LE’I FA'AOSOFIA SE GALULOLO

 

O le mafuie na fa’alogoina i Fiti ma Tonga i lona malosi e 8.2, ae le’i tulai mai ai se galulolo i le fa’aiuga o le vaiaso ua te’a.

 

O se lipoti mai le Ofisa Va'ai Tau o Fiti, ua fa'ailoa ai, e fai si loloto na'ua o le afuaga o lea mafui'e, ua mafua ai ona leai ni a'afiaga tele i Tonga ma Fiti.

 

O lo ua fa'ailoa mai e i ai mea na fa'aleagaina i Tonga, ae le tele se afaina o lipotia mai ae na matua tetele luluga o lea mafui'e i Fiti ae leai fo'i ni lipoti mai o ni mea ua fa'aleagaina ai.

 

Ina ua fesiligia le TEMCO ma le Ofisa o Vaai Tau i Tafuna, ae fa'ailoa mai, "O lo ua fa'amauina lea mafui'e, peita'i e le'i malosi tele lona luluga ina ia fa'aosofia ai se Tsunami, ae fa'afetaia o le loloto o le alititai na matua'ina mai ai lea mafui'e, lea ua tatou saogalemu lava!"