Ads by Google Ads by Google

Tala I Vaifanua

FA'APA'IA FALE MO TAUTUA O UTA HAWAIIAN AIR TAFUNA AIRPORT

 

O le aoauli o le aso Tofi na te'a nei, Aukuso 16, na fa'apa'ia ai e le susuga le Faife'au Hawaii, Kahu Richard Kamanu, le fale mo tautua o uta ma oloa (cargo) a le Hawaiian Airlines.

 

I lea sauniga sa o'o mai lava le susuga le Fa'afeagaiga Hawaii, "Kahu" i le latou fo'i gagana, ina ia fa'atautaia lea sauniga ina ai saogalemu galuega uma e fa'atino ai, ma ia fa'amanuia fo'i le Atua i tagata faigaluega a le Hawaiian Airlines ma le fa'atinoga o le tautua mo Amerika Samoa.

 

Sa malaga fa’atasi mai Honolulu, le susuga Kahu Richard Kamanu ma nisi o sui sinia o le Hawaiian Air e aofia ai le peresitene o le kamupani, Peter Ingram.

 

I se fa'amatalaga a Kamanu, sa ia fa'ailoa ai, "Ona o lea ua suia le fa'apa'iaga o mea uma e fia fa'apa'ia a'o le'i fa'aaogaina e le Hawaiian Airlines, ua outou matauina ai, ua o'o mai lava lo'u sui mo le fa'amoemoe, ae o lo'o to'atele fo'i Faife'au agava'a i Amerika Samoa nei. O le afuaga o lea faiga fou, ona ua manatu le Kamupani ia fa'ataua le avea ai o lenei Kamupani ma Avefu'a a le Malo Fa'asetete o Hawaii. O lo'o fa'ailo i le igoa o lenei Kamupani lea mau, ma ua alagatatau ona tapena mea uma e aga i le Kamupani lenei e tatau ona mua'i fa'ataua ai le Fa'a-Hawaii o ana sauniga uma. Ua i ai nei lenei fa'apa'iaga."

 

Sa toe fa'aopoopo mai Kamanu, "E le o se mau la a tagatanu'u o Hawaii, ae o le fanoga ua fa'ao'o atu ia i matou ina ia tapena mai, ua suia nei le fa'atautaiga a le Hawaiian Airlines o a latou sauniga uma fa'apenei, ua manatu ina ia faia tatalo siitia i le Atua ma fa'ailo fo'i le fa'a- Hawaii i aga uma o le tapenaga o sauniga a le Kamupani, ona o lo'o tau'avea le igoa o le Setete o Hawaii."

 

"O lea faiga fou, ua fa'afetaia e i matou le lautele o tagata Hawaii uma, aua, ua fa'ailo ma fa'ataua e le Hawaiian Airlines tu ma agaifanua a Hawaii si o matou fo'i malo pele” o sana tala lea ma le fiafia e fa'amautu ai i agaga o i latou na auai ma fa'afofogaina lana tuleiga, e tusa o le manulauti fou ua fa'aa'e e le Hawaiian Airline, ma ua amatalia i lenei tausaga.

 

Ua le gata ia Ingram, ae o nisi o sui sinia o le Hawaiian Airlines sa malaga mai Honolulu, e aofia ai Brent Ovebeek, Ann Botticelli ma Debbie Nakanelua-Richards.

 

O le pule o le Hawaiian Airlines i Pago Pago, Tuli Fruean sa auai i le fa’apaiaga o le fale fa’apea foi ma le Lutena Kovana, Lemanu Peleti Mauga ae maise le Faipule i le Konekeresi a le Malo Tele Aumua Amata.

 

I lea sauniga sa sausauina le fale i le vaisa, ma faia le tatalo i le gagana Hawaii, mae'a loa ona soso'o lea ma le motusia lea o le Ula Laumaile, ua fa'aigoaina e Hawaii o le “mailelei” o le lipine lea e ootia ma fa'aaoga e Hawaii e tatala ai nofoaga fou.

 

I le faitoto'a o lea Ofisa o Cargo na tautau ai le Ula Laumeli, ina ia motusia fa'atasi e Ingram ma Fruean. O le pito na motu ese mai, e ta'ai ma o le a fa'ata'atia pea i luga o lana kesi mo se taimi umi e fa'asalala lona manogi ina ia fa'ate'a ai nisi o faiga tuai ae fa'atula'ia faiga fou.

 

Na fa'afetaia e Lemanu ia Kamanu mo lona sao ae maise o lana fa'amalamalamaga o i latou uma na auai, "O se sauniga mamalu sauniga e faia ia o'o i le Atua i le agaga fa'afetai ma le fa'amanu i le tele o manuia o maua e o tatou tagata i Amerika Samoa, ona o le fa'atinoga o tiute o le Hawaiian Airlines ma le fa'amaoni. Fa'afetai mo le fa'apupulaga o lenei suiga fou, o se suiga fo'i e ao ina mitamita ai tagatanu'u uma o Hawaii, aua ua fa'amaonia le latou tautua ua au, tautua tuavae ma le tautua matavela i tagata femalaga'i, e le gata ia Amerika Samoa, ae o isi tagata uma ua fa'aaogaina lea Kamupani Va'alele agava'a tele, e femalaga'iga ai."

 

Na fa'aluaina fo'i lea fa'afetai e Aumua, aua sa ia fa'ailoa, "O le setete lava ia o Hawaii e muamua lava sofa'i atu i ni o matou mana'oga tupito, e o'o fo'i i fesoasoani e fia maua mo i matou iinei, e va'ava'alua o matou faiva tauanau i le Malo Tele i ni fesoasoani e o outou sui o tutu mai i le Konekeresi, fa'afetai tele e o'o fo'i i lenei tautua. Matou te iloa lelei e mamafa tele i matou, ma a matou uta fela'ua'i, ae le 'alo ai le tautua a le Hawaiian Air. Fa'afetai tele."

 

E tusa ai le taugata o pasese lea e matele ina faitioina ai le Hawaiian Airlines, ae ua fa'ailoa mai e Ingram, "Ua le 'alo i le ataata o le la'au, ua iloga e taugata pasese, ae ua le faigofie fo'i le tau ua si'itia i ai le kesi o va'alele, ma ua fa'afaigata ai ona tu'u tele mai i lalo pasese. Ae o lo'o matou vagaia lava lea mataupu i so'o se taimi e fono ai le matou laulauafono, ma e taumafai lava le mea sili ina ia gafatia e le mamalu lautele le tau o pasese.”

 

I le malaga a le Hawaiian Air i le po o le aso Tofi, na matua fa'atumulia ai i a latou malo fa'aaloalogia na malaga mai mo lenei sauniga mamalu, ae sa toe taliu ai fo'i ma le usugafono a le US Coral Reef Task Force.

 

FA'AAUAU FA'AITITIA PEA FAITAU AOFAI O AMERIKA SAMOA

 

O le lipoti a le Matagaluega o Fefa’atauaiga a Amerika Samoa o lo’o fa’ailoa ai le fa'aauau pea ona fa'aitiitia le aofa’i o tagata i le teritori i lenei vaitau. I le ogatotonu o le 2018 ua na'o le 59,600 tagata ma ua matauina e tusa ma le 700 le aofai ua fa'aitiitia ai nai lo le faitauga mai ia Iulai 1, 2017.

 

O lea faitauga fa'atusatusa ua tapena mai lea i le fa'apalenia o fua fa'atatau i le aotelega o pepe fananau mai, le aotelega o e ua maliliu, nisi ua malaga i fafo ma le toe fo'i mai, nisi fo'i o malaga mai i totonu ma toe fo'i a'o isi ua nonofo mau mai lenei tausaga atoa.

 

Ua matele fo'i le fua fa'atatau i le aotelega o e ua soifua mai i lenei tausaga atoa ua pa'u mai i le na'o le 977, ae si'itia le aotelega o maliu i le 311 i lenei tausaga.

 

Ua matauina le to'atele o tagata ua malaga i fafo ma alaala tumau ai. Ua faafaigata teisi lava ona fua patino lelei le tulaga o tagata malaga i fafo ma le toe taliu mai ona e le o lava fa'amaumauga e mautinoa ai lea tulaga, peita'i i le fuafuaga ua tulai mai nei, e tusa ma le 2,000 tagata ua malaga i fafo, ma ua le toe fo'i vave mai, ae ua silia ma le tausaga ua le toe taliu mai lava.

 

Mai lea aotelega e 59,600 i totonu o Amerika Samoa ia Iulai 1, 2018, ua maua mai le aotelega o tama'ita'i e 30,288 ae o ali'i ua na'o le 29.312.

 

O le augatupulaga lava o lo'o to'atele iinei o le vaitauaga 25-64 tausaga le matutua e 26,448 le aofa'i, ona soso'o lea mai augatupulaga e 6-14 tausaga le matutua e 10,441 tagata, ae mulimuli mai ai le 14-18 tausaga le matutua e na'o le 5,552 tagata.