Ads by Google Ads by Google

Tala I Vaifanua


Kovana Itumalo Faleima i Sisifo, Fuamatu J.V. Fuamatul [ata: Leua Aiono Frost]

TASI LE TAOFIGA O "IETOGA PO'O LALAGA LAITI" - ITUMALO ALATAUA

 

Ua fa’alauiloa e le afioga i le Kovana Itumalo Falelima i SIsifo, Fuamatu J.V. Fuamatu, mo le silafia e le atunu’u, le taofiga a se vaega o le Falelima i sasa'e, ua le toe talia ai ni ietoga laiti ta'i sefulu i le ta'aiga, po'o taui lalaga laiti, ae o le a tu'u le fa'amamalu i le vasega o Ietoga tetele.

 

"E le'i faigofie lenei fo'i mataupu sa faauia lava finagalo o le mamalu lautele o le itumalo i le Alataua, le itumalo fo'i o Fofo ma le falelima atoa i sisifo, peita'i ua tasi moemoe nei le tofa fa'aalia, ua sasa'a le fafao ma ua soalaupule ai le itumalo o Alataua, ua tatau ma onomea ona faia lea suiga i totonu o le itumalo ma fa'alavelave uma e ono toe fa'aaogaina ai measina nei a Samoa,” se folasaga lea a Fuamatu.

 

Mai le tapenaga a le afioga le Kovana Itumalo, sa ia fa'ailoa ai i le vasega o Fa'asuaga, Pulenu'u ma Leoleo i le latou fonotaga i le Ofisa o Mataupu Tau Samoa, o le latou tiute togia ia o atu i tua i o latou afio'aga ma fa'ailoa atu lea fanoga ua a'e i fa'asuaga ma le Kovana Itumalo i Sisifo, pe o le a se taofi o le mamalu lautele.

 

Peita'i i le aso na poto ai le itumalo o le Alataua, na toe fa'aa'e ane ai loa le mataupu lea ma ua tasi moemoe ai le taofimau a le Itumalo o le Alataua, ia taofia loa le toe fa'aaogaina o ietoga laiti nei, ae fa'amamalu atili Ietoga tetele ma lo latou taua le 'avea i le agaifanua a Samoa.

 

Ina ua fesiligia se afuaga tonu o le taofia o lea fo'i taumafaiga sa sau a'i le atunu'u ma ana fa'aaloaloga fa'atamali'i, ae fa'ailoa mai e Fuamatu, "I le iloilo toto'a atu i ai i taofi, ua avea lea tauitoga ma ala ua le fa'amaoni ma le faimealelei ai le to'atele. O nisi ua faalagi mai lava le sefulu toga o taui fa'atasi, ae tatala atu e leaga faia lava ietoga o pito i totonu, e le atoa fo'i se 10 i le tele o taui, ae o nisi lava ua afifi ai atigi pusa e fa'amamafa ai e foliga o atoa toga. Ioe ua le siakia lava e aiga fa'ato'a aumaia ai i lumamea i fa'alavelave. Ae sili fo'i le fa'aaoga ia na'o ia tetele, e va'ai atu lava o ta'i mai ma o le mea lava lena ua aumai tonu mo oe."

 

O le itumalo fo'i o Fofo, ua fa'ailoa mai ua amatalia ai lea fo'i taofi. O lona uiga o le fa'atofunaga o lo'o ua taumafai i ai le Falelima i Sisifo, ia taumafai ona aotelega le itumalo i lea taofi, ma ia fa'afaigofie atili ai mea uma e faia i le itumalo e fa'aaogaina ai "Ie o le Malo."

 

Ua auai fo'i le afio'aga o Pago Pago i lea taofi, o le tausaga e 2017 na fa'atulaga e fa'aaogaina uma ai ie toga laiti i mea e manana'o aiga ma le afio'aga e faia i ai, ae o'o loa i le 2018, ona taofia loa lea ona toe fa'aaogaina "Lalaga taui ta'i 10" i se fa'alavelave.

 

Peita'i o le itumalo o le Ituau Malosi, e latou te le toe fa'aaogaina ai ta'ui ietoga laiti nei ise fa'alavelave. Ua va'aia ma ua tofo fo'i i ai isi afio'aga ma itumalo i le suamalie ma le faigofie o lea fo'i faiga, fa'afetai ua apo fo'i mea lelei fa'aleaganu'u i lea tulaga.

 

MALIU FAIPISINISI GEORGE REID - CLOVIS COMMUNITY MEDICAL CENTER

 

O le aso 31 Iulai, 2018 na tu’umalo ai tama faipisinisi ia George Reid i le Clovis Community Center i Kalefonia.  O Reid e pulea le Shoe Tree.

 

O le aso o lona maliu, o le aso tonu foi lea na fa'aipoipo ai ma Bobbie, July 31, 1971.

 

I ona toe taimi i lona moega i Clovis Community Medical Center sa mafuta pea ma Bobbie Reid, lona atali'i o Tyrone ma lona to'alua Renisha Reid ma le tama'ita'i o Sandi. E maliu o ia ua atoa le 72 tausaga o lona soifua.

 

Na fa'ailoa mai e Bobbie, na amata ese fa'alagona a George i lona tino ia Setema 2016, peita'i fa'ato'a tu'ua e i la'ua Amerika Samoa ia Ianuari 2017, ma saili togafiti loa i falema'i i Amerika ma sa fa'amautu i Clovis Community Medical Center. Na tuua lava e i la'ua le pisinisi ma le la'ua fale i Vaitogi e va'aia lava e le aufaigaluega, aua ua mau fa'atuatuaina e i la'ua i latou i mea uma.

 

I le amataga o le Shoe Tree a George ma Bobbie Reid, na faatuina i le 1975. Mai le amagata o lea faleoloa o se'evae sa tatala lava i le Nuuuli Shopping Center ona i ai lea o le isi ona lala i le GHC Reid i Fagatogo, ma toe fa'atuina lea tasi i Gataivai ae mulimuli ai loa fa'amautu le faleoloa fogafalelua i Nuuuli.

 

I molimau a le aufaigaluega a le Shoe Tree, sa fa'aalia ai e i latou, "E pei lava i matou uma o ni fanau ia George ma Bobbie, e mau fa'atuatuaina le matou galulue fa'amaoni e i la'ua ma fa'atino galuega uma tau le pisinisi, o le ala fo'i lea e le to'atele ai ni tagata faigaluega i le matou faleoloa."

 

"O le mafuaga fo'i lea e le popole lava George ma Bobbie pe a o'o ina malaga i fafo mo tafaoga pe o ni fa'alavelave ma le la'ua si'igama'i fo'i lenei ua fai si umi. E fa'amatu'u mai lava le pisinisi e matou te galulue i ai ma le fa'amaoni,” o se tala lea a se tasi o le aufaigaluega.

 

I se molimau a Bobbie e tusa o lana pele, sa ia fa'ailoa mai ai, "E le tau faamatalaina le olaga o George, ua masani lava tagata uma i ona uiga, o ona uiga fo'i ia e tusa o le mafutaga. E le so'ona fa'aalia sona taofi i se mea, e le mana'o fo'i e lalamua sona manatu, ae o ona uiga fa'agalogata ia i le mafutaga, ae fiafia lona olaga ma ana uo mamae ma i matou le aiga."

 

"E alofa tele George i lona nu'u o Pago Pago, e matauina e tagata uma latou te iloa o ia i lena mea. Lona lua e alofa i lona aiga ia matou ma le fanau ae maise o ona uso ma tuafafine ma latou aiga ma fanau. E le mamao lava George ma i latou uma na, e le tu'ua fo'i e ia se mea i nai ona tei pe latou mana'omia i se mea mai ia te ia. E ese mai lena, o George o se tasi e galue malosi i mea ua ia naunau e fa'atino ma ia mautu lelei."

 

E to'atele pelega a lona aiga ua malaga fa'apitoa atu e asia o ia talu ona fa'ataotolia lona gasegase lenei, ma ua fa'afetaia e le tina o le aiga lea fo'i avanoa lelei, e latou te talanoa fiafia ai ma George a'o le'i afenoa lana malaga i lenei lalolagi.

 

Peita'i o se tasi o ana uo mamae o Vaito'a Hans Langkilde, o tagata lava ua masani uma ai tagata e tatau lava ona i ai fa'atasi pe a o'o i tafaoga o le afiafi.

 

"O ma'ua lava e tali foliga o le 'auuso i le ma'ua lava mafutaga ma George, afai e va'aia le auai o le tasi i se mea e fai, ua iloa lelei e le to'atele, e toeititi fo'i va'aia le i ai o le tasi. E tele mea e tutusa ai ma manatu i mea e tutupu ma e fefa'aalia'i ai ma'ua manatu ae le anoanoa fua e le to'atele,” o se tala le a Vaitoa.

 

Ua fa'atulaga le toe sauniga o George Henry Charles Reid e faia i le aso 18 Aukuso i le Ekalesia o le Au Pa'ia o Aso e Gata Ai i Clovis, Kalefonia.

 

O lo'o ua soifua mai pea Bobbie Reid ma le fanau e to'atolu ma fanau a fanau e to'a ono.