Ads by Google Ads by Google

Tala I Vaifanua

SIITIA PASESE O FEMALAGA'IGA VA O SAMOA E LUA

 

I lenei vaitaimi o lo'o matele ina femalagai tagata e tafafao i Samoa i le tu'uaga o a'oga, ua fa'ailoa mai ai fo'i le si'itaga o pasese o kamupani va'alele o lo'o tautuaina lea vainu'u, Pago Pago i Apia ma toe taliu mai.

 

O le pasese sa sau a'i e $155 i le malaga i Apia ma toe fo'i mai, a le Samoa Airways, peita'i ua si'itia nei i le $165. Ua o'o fo'i i le pasese e malaga ai i Manu'a i le kamupani va'alele a le Samoa Airways, ua faimalaga fo'i i le $165 i le malaga i Manu'a ma toe taliu mai.

 

Ina ua fesiligia fo'i le kamupani va'alele a le Talofa Airways, ae fa'ailoa mai o le latou pasese fo'i lea ua si'i i ai i le taimi nei e $165 i le malaga ma toe taliu mai i Pago Pago.

 

Peita'i, ua i ai lava pasese fa'akonekarate mo Ekalesia ma Pisinisi po'o sui taito'atasi fo'i e avea lava le Samoa Airways po'o le Polenisia lea, e faaitiitia teisi fo'i latou pasese e malaga ai.

 

Ina ua fesiligia i le tulaga ua si'itia ai le totogi o pasese nei, ae fa'ailoa mai, "Ua si'itia fo'i le totogi o le kesi o va'alele ma le tautua fo'i latou i nofoaga e fa'aaogaina i totonu o malaeva'alele, ma ua alagatatau ai le si'itia lea ua fa'ae'e nei.

 

Ua tulata fo'i i vaitau e toe a'e ai a'oga, o le a toe taliu mai fo'i le fanau sa tafafao i Aiga i Samoa, ma toe taliu fo'i nisi i le Manu'atele mo a'oga pe a a'e i le isi tolu vaiaso o lumana'i. Tau ina ia fa'asoasoa lelei i ai le seleni fa'asoa a aiga i lea si'itaga o pasese mo femalaga'iga i le ea.

 

SENATOA FAIIVAE A. GODINET - AVE MA SUI TAITAIFONO OFC

 

O le fonotaga mulimuli nei a le Oceania Football Confederation i Rusia, i le masina na te'a nei, ua mae'a filifilia ai nei le afioga Senatoa Faiivae Iuli Godinet e avea ma Sui Taitaifono i lenei tausaga.

 

O le afioga fo'i le Maluolefale o lo'o tutula'i mai i le tofiga Peresetene o le Football Federation of American Samoa po'o le Asosi Soka lea i Amerika Samoa.

 

"O se fa'aeaga sili lea ua tofia i ai lo'u nei sui fa'atauva'a, e lagona fo'i le fiafia ona ua suia se tulaga e tautua ai ma fa'alauiloa ai pea le malo ou te alu atu ai, o Amerika Samoa.”

 

Ua fai fo'i si leva talu ona avea Faiivae Godinet ma totino o le Komiti Fa'afoe a le OFC, ae o lea la ua amata ona o'o atu o ia i le avea ai ma Sui Taitaifono i lenei tausaga. O lona tofiga o le Peresetene o le Asosi Football i Amerika Samoa na amata mai i le tausaga 2008.

 

O lo ua avea Faiivae ma Peresetene umi tele lana tautua i sui totino uma o le OFC, lea e tusa ma le 11 sui o aofia ai. O lo'o avea fo'i o ia ma sui totino o le FIFA Associations Committee lea e to'a 211 o latou totino, e suia atu latou Asosi Soka.

 

O le afioga Senatoa Faiivae mai le itumalo o Fofo o le ta'ita'ifono lea o le Senate Education Committee, e ta'ita'ifono fo'i o ia i le Komiti Fa'afoe a le ASTCA, Taitaifono i le ASG Financial Aid Board, ma o le Peresetene fo'i o le American Samoa Humanities Council Board.

 

I lana ekalesia o tautua ai i le Atua, Ekalesia Katoliko o lo'o avea o ia ma Taitaifono o le Pule'aga, Taitaifono o le Koalisi a le Itumalo o Fofo lea e taumafai atili ina ia fa'asao mai le fanau mai a'afiaga o vaila'au o'ona ma fuala'au fa'asaina i le atunu'u.

 

ASIASI MAI PULE SILI STAR KIST MO FONOTAGA & LE MALO

 

O le susuga le ali'i pule sili o le Star Kist CEO Andrew Choe na o'o mai i le aso Tofi na te'a nei, ina ia fono ma sui mamalu o le tatou malo, ona toe tu'uva'a ese atu ai lea.

 

Na fa'ailoa e le tama'ita'i so'oupu a le StarKist Michelle Faist, "Ou te fa'ailoa atu o lo'o ua i ai nei le ali'i CEO o le StarKist i Amerika Samoa, ma e tele o mea na o'o mai e fa'atino iinei, o ana fonotaga taua ma sui mamalu o le faigamalo a Amerika Samoa."

 

Na fa'atautaia ana fonotaga ma le susuga le Kovana sili Lolo Moliga ma le Sui Kovana Lemanu Peleti Mauga i le Potu Fono o le Ofisa o le Kovana i Utulei ma ua toe taliu ese atu o ia ma le manuia.

 

O mataupu sa talanoaina o le tulaga o le siomaga ma mea nei ua mana'omia ona fa'aleleia atili o le fale'ia i Satala ina ia o gatasi ma fa'atulagaga a le Feterale i Kamupani Gaosi mea taumafa i ona talafatai po'o atumotu o lo'o pulea e le Malo Tele.

 

O le pili fo'i lea na sala ai le StarKist ona o mea e le'i fa'aleleia ma ua fa'amaonia fo'i ni fa'aletonu tau le siosiomaga o le atunu'u, lea na maua ai e Amerika Samoa le $2.6 miliona. Ua iloga mai ua saili mai le pulega o lea Kamupani I'a i se fesoasoani mai le faigamalo ina ia pasia lea vaega o aiaiga e mafai ai pea ona fa'atautaia galuega a le Star Kist i le tatou atunu'u.