Ads by Google Ads by Google

Tala I Vaifanua

FA'APUPULA SUIGA FUAFUA O LE FA'AVAE O LE ‘OVER OVERRIDE’

 

Na tula'i le susuga Tapa'au Dr Daniel Aga i luma o le Ofisa o Mataupu Tau Samoa ma lona pulega, le afioga le Maoputasi Mauga Asuega, ae maise pulenu’u ma leoleo nu’u, e fa'apupula atili suiga o le fa’avae i le “vote overide”, lea o le a tuuina atu e faia i ai se fa’aiuga a le au palota i le palotaga tele ia Novema 2018.

 

O le lona lima ai lea ona avatu lea mataupu i le au palota, ae na teena lava.

 

Saunoa Tapaau, "O le suiga o le Faavae e afua lea ona o lo'o ta'oto le tulafono, e i ai le malosi'aga o le Kovana e fa'aigoa o le ‘Saini e Tete'e ai’ (veto) i se tulafono e pasia e le Fono.”

 

Ae i lalo o le fa’avae, o lo’o i le Failautusi o le Initeria le malosiaga e faia ai se suiga i le fa’aiuga tete’e a le kovana - po’o le veto override.

 

O le talosaga lea e tuuina atu i le au palota, ina ia tuuina atu lea malosi i le Fono Faitulafono mo le ‘veto override” ae le o le Failautusi o le Initeria.

 

O nisi o fesili sa tula’i mai i lenei fonotaga ananafi, o le tulaga tonu o galuega uma e fa'amatu'u atu i le Fono Faitulafono, pe ua agatonu uma a latou galuega? Ua matua ea le Fono Faitulafono a Amerika Samoa, aua o lea o le a fa'amatu'u atu i o latou a'ao le malosi o le fa'atautaiga o le malo atoa, i lenei mataupu ‘veto override’?

 

O le isi fesili tele e tula'i mai, "O feso'ota'i lelei le Fono Faitulafono ma o tatou tagatanu'u lautele? O latou fa'alogo i fitaituga o le lautele o le atunu'u? O le a le isi mau e ao ina mautu lelei, ma iloga ona fa'agaganaina o se mafutaga vavalalata ma feso'ota'i."

 

Ona o le totogi o tagata uma e faigaluega i le fono ma o lo'o avea ma faipule atoa ma senatoa e totogia i tupe o lafoga a tagatanu'u, e tatau lava na faia le tiute o le fono faitulafono e tautua ona tagatanu'u. O le isi lea so'otaga e taua ona manino lelei. Aua e leai ma se paketi a le Fono o se tupe e fa'aagaaga mai le paketi mai le malo tele.

 

O le talanoaina fo'i o le aveesea o le malosi'aga a le Kovana e na te te'ena ai se pili ua ia silafia e le tusa ona fa'atautaia ai le malo ma ua le pasia ai se tulafono sa aiaia ma pasia e le fono faitulafono, ua toe moni ai le faaupuga masani ona taulagi ai le faigamalo a Amerika Samoa, o le faigamalo fa'atafatolu e manino ai le siakiga lelei o galuega fa'apaleni e le isi vaega o le tasi vaega o lana faigamalo fa'ateritori o Amerika.

 

Ua fa'ailoa e Tapa'au, "O le a le muta ai iinei lenei galuega tima'i i le mamalu lautele ina ia mautu ma silafia lelei e le atunu'u le uiga tonu o lenei suiga e tu'u atu i le palotaga e fa'ailoa mai ai se taofi. O le taumafaiga ia manino mea uma, a'o le'i faia lau filifiliga e tonu i lou taofi."

 

SIITIA TOTOGI PILI SUAVAI TAUMAFA & SUAVAI LAFOA'I A LE ASPA

 

Ua matauina nei le si'itaga ua fa'ae'e e le ASPA i le totogi o le Suavai Taumafa ma le Suavai Lafoa'i atoa ai ma le totogi mo galuega e fa'amama ai le suavai taumafa.

 

Ua ma’ea fa'asalalau fa'alaua'itele e le ASPA lea si'itaga e ala i le fa'asalalauga i le Samoa News, ma ua fa'ailoa ai, e si'itia le totogi o lenei tautua lautele e tusa ai o le tulafono ua mae'a pasia ma fa'atulaga e tatau ona fa'ae'e ia Iuni 20, 2015.

 

Na i ai le isi si'itaga i le masina o Novema 2016, peita'i na o le suavai lafoa'i ma le aoina o le Lapisi. Sa i ai fo'i le si'itaga na fa'ae'e ia Oketopa 2017, peita'i na toe tolopoina mai e le Komiti fa'afoe o le ASPA se'ia fa'ae'e i se taimi mulimuli mai.

 

Ona o lea ua mae'a ona iloilo toto'a e le Komiti Fa'afoe o le ASPA nei si'itaga uma, ona fa'atulaga ai loa si'itia le totogi o le suavai taumafa ma suavai lafoa'i fa'atasi ai ma le totogi o galuega fa'amama mo fa'atanoa o le suavai ma punaovai ina ia fa'aatunu'u loa i le masina o Iulai 2018, ae amata totogi i le masina o Aukuso 2018, lea ua tatou to'ai taunu'u mai nei i ai.

 

O le si'itaga ua fa'atulaga e ta'i $14.62 le totogi mo aiga ta'itasi i le $14.91 lea o le a i ai ia Aukuso, ae o Oketopa e toe si'itia ai i le $15.21 mo aiga lava.

 

O lo ua siitia fo'i le totogi o le suavai mai le $2.81 sa i ai i le $2.87sene i le 10,000 kalone e faaaoga e le aiga, ae o le masina o Oketopa o le a toe si'itia ai i le $2.92 i le 10,000 kalone.

 

Mo le suavai lafoa'i ua fa'ailoa mai o le a si'itia mai le $20.05 sa i ai i le $23.56 mo aiga e amata mai i le masina o Iulai ae totogia e tagata i le masina o Aukuso 2018. Ae toe si'itia fo'i i le masina o Oketopa 2018 i le $24.97.

 

I le aoina o le Lapisi mai aiga lea o le a si'itia mai le $11.98 sa i ai i le $12.57 i pili totogia e aiga i le masina o Aokuso 2018, ae leai se isi si'itaga ua fa'ailoa mai mo lea tautua i le masina o Oketopa 2018.

 

15.7% FA'AITIITIA AI LE AOFAI O PISINISI I LE TERITORI

 

Ua fa'ailoa mai i fa'amaumauga o fuainumera i le atunu'u, ua fa'aitiitia le a'ofai o pisinisi i le 15.7% pe a tu'u i fa'amaumauga i le kuata lona lua o le tausaga a le Matagaluega o Fefa'ataua'iga.

 

O le aofai o pisinisi sa i ai e 2,453 pisinisi sa talosaga latou laisene ma taua'aoina atu e le Revenue Branch o le Ofisa o Tupe a le tatou Malo.

 

Mai lea faitauga, ua fa'amauina ai le fa'aitiitia o le aofai o pisinisi e tusa ma le 15.7% e na talosaga ma taua'ao aloa'ia latou laisene pisinisi i le tasuaga 2017. E tusa lea ma le 458pisinisi na fa'atautaia latou pisinisi i le tausaga 2017 ae ua le toe fa'afouina latou laisene pisinisi i le tausaga nei.

 

I se va'aiga lautele fo'i i lea lava tulaga, e talu mai le tausaga e 2014, ua iloga ai, o lo'o fa'asolo mai lava le tulaga fa'aitiitia pea o aofaiga o pisinisi e toe fa'afouina latou laisene e fa'atautaia ai pisinisi i tausaga ta'itasi.

 

Ua matauina fo'i, talu mai le si'itaga o le totogi mo Laisene Pisinisi ua atili ai ona tele pisinisi e le'i toe fa'afouina laisene mo a latou tautua.

 

E ese mai lea, ae o lo'o i ai fo'i le mau o lo'o fa'asagasaga mai i le si'itaga o le totogi maulalo, lea na tolopo mai se'ia fa'aa'e lea tulaga i le masina o Setema 2018.

 

"O lo'o fa'aauau pea ona feutaga'i le Malo ma le vasega o au faipisinisi ina ia fa'atulaga lelei se si'itaga o totogi maulalo e ao ina si'itia i ai, ae le o le si'itia a'ia'i lea i le fa'atulagaga ua taua'aoina mai e le Malo Tele, aua e le o taitai lava le tamaoa'iga fa'alotoifale i le tamaoaiga o malo fa'asetete i fafo,” o se manatu faamauina lea ua lisia mai i le lipoti a le DOC.