Ads by Google Ads by Google

Tala I Vaifanua


[ata: SN]

 

28 MASINA FA'ATO'A FALELAUSI TINO MALIU

 

Ua fa'afetaia e le CEO o le falema'i tele i Faga'alu se avanoa ua fa'atagaina e le afioga le Kovana sili e falelauasi ai se tasi ua atoa le 28 masina o taoto pea i le falemaliu, e le'i o'o atu se tasi o aiga po'o uo ma e masani, ina ia latou tanumia.

 

Sa i ai fo'i se isi maliu e le'i mamao atu, fa'aiuga o le tausaga ua te'a, sa agalelei ane fo'i se tasi o Aiga ma latou falelausi se tasi na atoa lelei le ono masina, o lo'o tatalia fo'i nisi o aiga e latou te tanumia.

 

E tusa ai ma se fa'amatalaga a Faumuina John Faumuina, na fa'ao'o ane le tino maliu lea ia Ianuari 13, 2016, ma o se tasi mai fafo, ae ua leai fo'i se tasi ua fa'amauina e ao ina logoina i se taimi e maliu ai lea sui, ma ua le mafai ai ona sailia e le LBJ se tasi e logo i ai ua maliu lea sui.

 

"O se tagata lea ua sili ona umi le taimi o tatalia se tasi e logo atu i ai ua maliu, po'o se tasi fo'i e sau na te avea i tua lona tino ina ia falelauasi. Ua fa'afetaia fo'i le Kovana Sili Lolo Moliga ona ua fa'ataga mai lea avanoa i le Fanuatanu i Satala ina ia lagomau ai lenei sui." O se tala lea a Faumuina John CEO o le falema'i tele i Faga'alu.

 

I le taimi nei, o le tele o le tatou falemaliu e tatau ona ofi i ai na'o le 6 tino maliu, peita'i e 23 tinomaliu ua fa'aofiofi ai nei.

 

O le tala mai a Faumuina i se mafuaga ua tele ai tino maliu i le falemaliu, "O nisi maliu e tatalia le fa'aiuga o suesuega o lo'o faia i le afuaga o fa'alavelave fa'afuasei ua a'afia ai ma maliliu ai, ae o nisi fo'i e tatalia le taimi o tapenaga a aiga mo latou toe sauniga."

 

Pe a o'o ina tumu fa'apea le 'aisa lea e ao ina tu'u ai tatou pelega o maliliu, ona fa'amalosia lea e faia tui mo tino maliu ua le ofi ai lea potu, ma ua avatu fo'i pusa maliu ina ia fa'amoe lelei i ai latou pelega nei e tatalia ai le taimi o latou toe sauniga ma aiga.

 

O le totogi o nei tautua e tutusa lava mo tagata uma, e ta'i $10. i le aso e tasi mo le vaiaso muamua ae a o'o loa i aso e soso'o ane ai, ona ta'i $20. loa lea. O le totogi o le tui e ta'i $300. mo le tagata matua ae $150. mo tamaiti pepe e o'o i le 11 tausaga le matutua.

 

FA'AMALOSI'AU MAI FA'ATONU O AOGA - TO'AGA FAITAU TUSI

 

O se fe'au taua ua tima'i mai ai le fa'atonu sili o aoga a le malo, Dr. Ruth Matagi-Tofiga, i faia'oga uma, a'o ia tatalaina le vaiaso fa'apitoa mo faitauga tusi, ina ia faitau ma le malamalama toto'a le fanau i tala tusia, sa ia augani mai ai, "Ia to'aga e faitau tusi, outou le fanau a'oga, ia outou iloa o le sosia uma o le atamai, e afua mai i le malamalama lelei i tusitusiga ma fa'atonuga ae maise tala'aga ua mae'a aofia i totonu o tala tusia i tusi ua mae'a lomia, ae o lenei vaitau, ua fa'asalalauina i luga o le initeneti, ma ua fa'aigoaina etusi."

 

"E fa'atupu fiafia lou silafia lelei o mea uma ua tusia, ua e silafia ai lagona o le tusitala, po'o le tele fo'i o mea ua aotelega ma ua fa'amatalaina i tusitusiga. E faaosofia ai lou fia iloa atili, ma gaua'i ai lou loto i sailiiliga e fa'alautele ai lou atamai,” o isi lea vaega o le folasaga a le fa’atonusili.

 

I le a'oga tulaga muamua i Matatula  na vala'aulia fa'apitoa Matagi-Tofiga na te tatalaina lea faatasiga. Sa manatu fo'i le fa'atonu i le mafuaga o le tau le toe fiafia o le fanau e faitau tusi ina ia silafia ai le tele o mea o tutupu.

 

Sa ia fa'ailoa, "O isi fo'i mea ua fa'aalu ai le taimi o fanau talavou, o tusitusiga ma maimoaga i luga o ala o feso'ota'iga a le Initeneti, ae ua le fiafia ai i latou e faitau i tusitusiga mo le fa'alauteleina o le atamai ma le silafia lautele o mea o tutupu i isi atunu'u mamao ma isi fo'i e tulata i ai i tatou."

 

Na ia fa'afetaia le naunauta'iga o faia'oga nei i Matatula ina ia fa'aosofia le faitauga tusi lenei, ma ua latou vala'aulia sui mamalu, ina ia latou fa'asoa i le fanau i le taua tele o le faitau tusi ma le malamalama lelei i tala o e faitau i ai.

 

O le afioga le Faipule Amerika Samoa i le Konekeresi, Aumua Amata Coleman Radewagan sa faitau tusi i se tasi o vasega. O le isi sa faitau tusi ai le Tausala Lalelei o le Pasefika, Matauaina Toomalatai, "Ms SOFIA" Valentana Faumuina ma Wilma Thompson.

 

O i latou sa latou saunoa fa'apitoa i vasega uma nei, ina ia malosi le una'iga, "Ia mafuli le fanau e faitau tusi ma fiafia i ai, ia malamalama toto'a i tusitusiga ua latou faitau i ai i le gagana Peretania."

 

"Fanau talavou, aloalo ese mai le fiafia tele i ta'aloga i luga o masini video, ma i si mea uma e fa'aalu ai lou taimi aoga, ae to'aga ane e faitau tusi e fa'alautele ai lou malamalama ma lau tofa mamao. E te matua a'e, ua fa'amatua muamua e lou faitau tusi ou manatu, ma fa'atumu lou mafaufau i mea lelei, o au fa'ai'uga fo'i ua fa'alauteleina ina ua loloto lou iloa o mea uma, ona o lou to'aga e faitau tusi,” o sana saunoaga taua lea mo le fanau.

 

O le aso le toe aso o lea fa'amoemoe, ma ina ua fesiligia le tatou Sui i le Konekeresi i sona taofi sa fa'aalia i le fanau e tusa o le faitau tusi, ae fa'ailoa fiafia mai e ia, "O le to'aga e faitau tusi o le fagaina fo'i lea o lou mafaufau i mea lelei. O le faitau i tusitusiga, ua pei lava o oe ua e nofo ma fa'atumu lou mafaufau i le atamai, aua nei mama lau va'ai i le iloa faitau ma le malamalama, aua o le fa'alautele lea o lou iloa, o le faitau tusi."

 

O nisi fo'i sa mafai ona tofu sao mo lea fa'amoemoe na aofia i ai le vasega o fanau a'oga e ausia togi maualuluga i mataupu o tau'avea i Fagaitua High, le vasega o faipule me senatoa sa vala'aulia fa'apitoa e faitau mo le fanau i potu a'oga i Matatula.

 

O le aso, lea ua tu'u tasi ai i le vasega o faletua o faiafe'au ina ia latou faitau ai i le fanau a'oga.