Ads by Google Ads by Google

Tala I Vaifanua

FOA'I VASEGA 1988 FA'ASAO HIGH FALE FA'ATALI PASI FA'AILOGA 30YRS

 

Ua mae'a fausia e le vasega o le 1988 A'oga Maualuga a Fa'asao le Fale Fa'atali Pasi mo fanau a'oga a le Fa'asao Marist High i lenei vaitau. O le tau aofai o lea galuega e $10,400 ma sa fausia lea e le Konekarate a le Quality Paint Construction lea e fa'atautaia e le tofa Tupuola Jerry Atuatasi. Mo lenei fa'amoemoe sa malaga mai nisi o sui totino o lea vasega ma o teine tuai fo'i o Fa'asao High.

 

O i latou nei e aofia ai faletua o Faife'au mai Kalefonia e to'alua; Beverly Masunu o le EFKAS mai Monterey,ma Miriama Noa To'o o le UCC. O Gingerlei Sed e malaga mai Virginia ma le tama'ita'i faia'oga na tau'avea mataupu tau Komipiuta i le vasega 9, ae fa’atoa fa’au’u i le 1988, o Diane Blais.

 

O lenei tama'ita'i faia'oga sa ia fa'ailoa mai, "O a'u sa faigaluega e le totogia ma sa amata mai la'u galuega faia'oga i le a'oga maualuga lenei i le vaitau o Katinale Pio Taofinu'u."

 

I lena vaitaimi, e pei ona fa’ailoa mai e Blais, "O le pule aoga o Sisiter Joan, ae sa faia'oga ai le tama'ita'i o Malia Perelini ao talavou lava ma le tina o Mrs Baker sa faia'oga i le Gagana Samoa."

 

Mai le to'a 66 o i latou na fa'au'u i le 1988, e to'alua ua maliliu.

 

O le galuega i fale fa’atali pasi na i ai le komiti fa'apitoa mo le poloketi, lea na amata ia Iulai 23, 2018 ae mae'a lelei ia August 1. Ma ua foa'i ai nei loa i le susuga le ali'i Pule A'oga Kamo Koloi, fa'atasi ai ma le ali'i Felela ua la'ua to'alua i le Pulega Bro. Chris Poppelwell.

 

O le tausi o Katerina Timu Elisara sa fai ma fofoga e fa'afeiloa'ia le mamalu na auai, mai le latou vasega se'ia o'o i a latou malo fa'aaloalogia i le susuga Patele Kelemete sa o'o atu mo le sauniga e tatala ai lea galuega mo le fa'aaogaina e le fanau aoga i lenei vaitau, le taupulega fo'i o le a'oga i Fa'asao Malisi i Faia'oga sa auai ma le ali'i pule, ae maise le Konekarate sa latou fausia le galuega matagofie.

 

Na auai le to'atele o le to'a 20 na foa'i mo le fa'amoemoe ae maise le tama'ita'i Fa'amasino GwenTauiliili Langkilde, o le sa togisilia i le vasega fa'ai'uaso 1988, o le auuso masaga ia Omega ma Alefa Magalei, ua tofu fo'i ma le aiga i lenei vaitau aua ua atoa le 30 tausaga talu ona tu'ua le Laumua i Fa'asao.

 

Fa'ailoa e le tama'ita'i faia'oga o Diane Blais, "Ou te toe sau fo'i aua ua atoa fo'i i ai ma lo'u 70 tausaga."

 

TUSIPASI 18 SUI AGAVA'A TAUSIGA TAGATA MATUTUA & GASEGASE

 

E to’a 18 sui sa a'otauina i le tausiga fa'apitoa o gasegase i tua i aiga po'o nofoaga fa'apitoa fo'i e pei o le Hope House, ua taua'aoina i ai tusi pasi, ua atoa lelei le 400 itula o kosi sa fa'atautaia ina ia mautinoa ua mautu o latou tomai mo'omia mo le tausiga o gasegae tumau o le tino gagau, ma tagata matutua ua loa le soifua.

 

E lua vaega fa'apitoa o lea vasega, o i latou sa faigaluega pea ma a'o'oga i le Hope House ma i latou fo'i sa gasolo atu i itula fa'apitoa mo a'oa'oga ma taumafai ia mautu o latou tomai i le tausiga o gasegase ma tagata matutua, ma sa fa'aaogaina lava le Hope House e avea ma Maota Gasegase e fa'atino ai latou galuega fa'atino ma a'oga o tomai nei.

 

O i latou sa taua'aoina tusi pasi fa'atasi ai ma latou $100 ma pepa e talafua ai oloa i le faleoloa o Forsgren i le Laufou Shopping Center.

 

O nisi fo'i sa fa'amanuiaina i ni tusi pasi na saunia e le pulega a le Hope House ona sa fa'afaigalugea atu mo le taimi lenei o tu'uaga o a'oga, e to'afa i latou. O i latou na sa taua'aoina latou tusi pasi ma pepa e talafua ai oloa e tusa ma le $100 i le faleoloa o le Neil’s ACE Home Center i Malaeimi.

 

E pei ona saunoa nisi lautogia o le fa'atasiga i lea taeao, "O le galuega e faia ma le alofa tele, atoa ma le fa'amaoni o lou naunau ia manuia le gasegase po'o le matua o lo'o e fa'afaileleina i ou a'ao."

 

ASIASI AUTALAVOU EFKAS PAVAIAI OFISA O AUMUA AMATA

 

O le aso Lulu na te'a nei sa asia ai e le Autalavou a Pavaiai EFKAS le Ofisa o le Faipule o Amerika Samoa i le Konekeresi, o se vaega o latou galuega fa'ale-autalavou ina ia mautu le iloa lelei e tupulaga talavou, o le latou Faipule ma nisi o mataupu e mafai ona fesoasoani atu ai o ia.

 

I lea taimi e le’i i ai le tofa a Aumua Amata, ona o lo’o i ai o ia i Hawaii i se fa’atasiga a le malo tele i le Hickam Air Force Base, i se sauniga na toe fa'afo'i mai ai e Korea le tele o tino maliliu o fitafita Amerika i le vaitau o le taua i Korea.

 

Peita'i na tutula'i i latou uma ua galulue i le ofisa o Aumua ma fa'alauiloa o latou suafa, ae maise a latou galuega.

 

Saunoa le tama'ita'i failautusi a Aumua, Ola Foster, "O lo ua tatou mautinoa o le Faipule lenei, o le auauna mo tagata uma o Amerika Samoa, e ao ina maua sona avanoa mo le mamalu lautele, peita'i a o'o ina vala'au mai nisi, ua faigata ona maua se avanoa, ona o fonotaga fo'i ma isi ae maise ai o ta'ita'i o le tatou Malo.”

 

Na fa'alauiloa fo'i i ai auaunaga fa'apitoa mo Vetereni, o talosaga mo Visa e ulufale atu ai tagata mai Samoa, Tonga, ma Filipino i Amerika, e mafai fo'i ona fesoasoani le Ofisa o Aumua.

 

Afai fo'i ua talosaga sou tusi folau Amerika, ae ua tuai ona maua mai se tali, ae ua e fia sailia po'o le a le fa'aletonu ua tuai ai, e mafai ona e o'o atu i le Ofisa o Aumua mo se fesoasoani.

 

Sa i ai se avanoa na tu'uina i le alo o Amerika Samoa na talia lana talosaga sa fa'auia i le Ofisa o Aumua e ulufale ai i le West Point Military Academy. O ia lea o Seung Ju Myung mai Nuuuli. Ose fiafiaga tele ia te ia, ona ua avea o ia ma se tasi o alo o Amerika Samoa e ulufale i le West Point ma ua finau nei o ia mo se lelei o Amerika Samoa.

 

"Ou te le talia se fa'amatalaga e fa'ailoa mai ai ia te a'u, e le o a'u o se Amerika Samoa ona o ou matua o Korea. Ua ou iloa na ou fanau iinei, aua e i ai so'u sao e ao ina faia mo le atunu'u ua ou fanau ai. O a'u e avea ma se auli e fa'amafolafola ni mea e le talafeagai i le va o malo e lua, ua ou naunau e i'u la'u a'oga, ma faia so'u aoga i le malo na ou fanau ai."Ua savalia nei le lua tausaga o lana taumafaiga, ae o se sui muamua fo'i lea ua auina atu e Aumua i le West Point Military Academy.

 

Na tula'i le susuga le Faife'au ia Kilifi Muao ma ia fa'afetaia le Ofisa mamalu ona o le talia leleia o i latou. Ua aoga fo'i le latou asiasiga i le Ocean Center i Utulei ma soso'o ai ma le asiasiga i le Maota o alaala ai le Kovana ae fa'ato'a o'o ane ai i le Ofsia o le Faipule i le Konekeresi ua fa'alautele ai o latou mafaufauga i so'o se mataupu ogaoga e ao ina latou fa'afesiligia ai le fesoasoani atu a le Faipule mo i latou.

 

E le gata i lea, ua latou iloa patino lea tagata ma lea tagata faigaluega i le ofisa o Aumua, e patino i ai le tautua o lo'o mana'omia.