Ads by Google Ads by Google

TATALA VAEGA FOU CARL'S JR - PLAY GROUND & PARTY ROOM


Tama'ita'i o Nialauna Faiumu sa ia paluina le Ava ae agaia e taulelea faigaluega a le Carls Jr Amerika Samoa, mo le ava fa'atupu o feiloa'iga i le sauniga e tatala aloa'ia ai le potu ta'alo mo fanau, a le Carl’s Jr., i le Laufou Shopping Center. [ata: Leua Aiono Frost]

O le taua'aoina atu lea o le meaalofa a le Carl's Jr ma le aufaigaluega i Amerika Samoa nei mo le susuga le Sui Peresetene o le Carl's Junior - Asia Pacific Region, Brad Sommer, i le ava fa'atupu mo le feiloa'iga i le taeao ananafi. [ata: Leua Aiono Frost]
Tala I Vaifanua

O le taeao ananafi na fa'atasi atu ai le Pulega a le Kamupani a le Forsgren Laufou i Nuuuli fa'apea ma le Carl's Jr e aloa'ia le latou galuega ua mae'a ona fa'atino nei, ina ia tapena se potu fa'apitoa mo ni fiafia fa'aleaiga, fa'atula'i ai ma se potu ta'alo mo le fanau i le Carl’s Jr.

Saunoa le susuga ia Phil Love, Marketing Manager o le Carl's Junior, "O lenei vaega e tusa ma le afa miliona le tau aofa'i na toe fa'aleleia atoa ai lea itu o le pisinisi, suia atoa le fausaga ma talepe i lalo puipui sima, ae toe fa'atulaga lelei le taualuga ma le fola atoa ai ma fa'atula'ia ai o meafale fou ma meata'alo mo le fanau. E le gata i lea ua suia fo'i totonu o le fale'aiga atoa i le Laufou Shopping Center."

Ua fa'ailoa mai e Barry Forsgren, "O lea aotelega o nofoa i totonu o le faleaiga ua fa'aavanoa lava mo fa'amoemoe o aiga, aua e tapenapena matua mo a latou malo fa'aaloalogia, ae o le fanau lava ia e fiafia ma mafai ona fa'afilemu pe a maua le avanoa e ta'a'alo ai lava i latou i le itu o mea ta'alo ua saunia. Ona o le agaga lava o lea itu o Aiga, o lea fo'i ua valia ai ata e fa'afiafia atili ai le fanau laiti ma e pei lava ua i ai i latou i totonu o le sami lanumoana pe o'o mai ae va'aia puipui nei ua i ai ata o amu, i'a ma le i'a lauiloa o Nimo."

Mo le sauniga lea ua fa'ato'a o'o mai ai fo'i se malaga pu'upu'u a le Sui Peresetene o le Asia Pacific a le Carl's Jr Aoao, Brad Sommer, lea e alaala tumau i Sigapore.

Na muamua lava faia le ava fa'atupu o feiloa'iga, ma sa fa'atino lava e le aufaigaluega ma le taupulega a le Carls Jr Amerika Samoa. Na tapena fo'i i latou mo fa'afiafiaga o mauluulu ma le sasa fa'apea le siva fa'ataupati a taulele'a Samoa ina ia fa'ailo fo'i nei tu ma agaifanua i le latou malo fa'aaloalogia.

Sa auai fa'atasi le susuga le Faife'au Faipisinisi Andy Forsgren ma le faletua Leone i lea fa'atasiga matagofie. O i latou fo'i na toto'o i le Keke o le fa'amoemoe o le tina o Leone ma Barry fa'apea ma Sommer.

Saunoa Sommer, "Ou te fa'ailoa atu lou fiafia, o le taimi muamua lenei ua ou o'o mai ai i Amerika Samoa, o le ulua'i Carl's Jr ua fa'atuina i se atumotu o le Pasefika e ese mai ia Ausetalia ma Niu Sila. Ua iloga le matagofie o lenei taumafaiga, ua fa'afiafiaina fo'i le Carl's Jr Aoao aua o lo'o fa'amanuia le Atua i le fa'atautaiga o lenei pisinisi iinei, ma lauolaola ma aoga e toe fa'afo'i se manuia ua latou maua i le atunu'u i ala ua fa'atulaga e le pulega ma le aufaigaluega. E le gata i lea, ua aoga e tautuaina tagata uma o Amerika Samoa.”

"O le taumafaiga lea ua fa'ato'a tatala nei, o se taumafaiga e tatau lava ona fa'amuamua, aua e auga auaunaga uma ia fa'afiafiaina aiga. Fa'afetai i le manatu o le pulega a le Carls Jr i Amerika Samoa ina ia fa'alautele le auaunaga, ia matua fiafia le fanau laiti, aua a fiafia tamaiti, ua fa'afaigofie uma lava mea i matua. Ia manuia ma ia aoga lenei faleta'alo mo tamaiti o Amerika Samoa."

I le Carl's Jr i Amerika Samoa ua pulea e le tina o Sefulu Fagalolo, Pule o Fefa'ataua'iga ua tula'i mai Phil Love ma e to'a sefulu a latou Pule i Sifi ae o le atoaga o tagata faigaluega e to'a 55 i latou. I le tala mai a Love, e tauau e toe tatala ni avanoa se to'a 10 ona o lea ua tatala le isi vaega fou o le fale'aiga ma e atoa i ai le 65 o tagata i se taimi e le o toe mamao.

I se tala a Brad Sommer e tusa o fale'aiga uma o le Carl's Jr. i le lalolagi ua toeitiiti lava atoa le 4,000, ae o fale'aiga lava latou ua i lalo o lana va'ava'aiga e tusa le ma le 82 i latou i Asia ma le Pasefika, ae na'o Amerika Samoa lava ua le malo fa'aatumotu ua fa'atuina ai le latou nei lala.

I le aga'i i luma o le taumafaiga, ua manatu o ia e fa'atula'ia i Samoa ma Fiti nisi fale'aiga, ae o le taimi nei, ua fa'asolo fa'atutu lava Carls Jr i Ausetalia, lea e na'o le 6 ua mae'a fa'atutuina. I Niu Sila ua mae'a fa'atutuina ai le 20 aua na muamua latou fa'atutuina fale'aiga i Niu Sila ae tomuli ai ia Ausetalia.

SEMINA SAUNIA MO TAIMI O FA'ALAVELAVE FA'AFUASE'I

O le semina na fa'atautaia e le UCEDD [University Center for Ecellence on Developmental Disabilities] a le tatou Kolisi Tu'ufa'atasi, ae ua mae'a fo'i ona pasia lelei e le Matagaluega o le Puipuiga o le Saogalemu Fa'alotoifale [ASHS], na fa'atautaia mo le fa aso, Iulai 30 - Aukuso 2 i le Tradewinds Hotel.

I lea fonotaga fa'aleaoaoga sa vala'auina fa'apitoa sui iloga, e ao ina toe tima'ia ma fa'amautu atili le fa'atautaiga o latou tiute, pe a o'o i taimi e lutia fa'afuase'ia le atunu'u i ni fa'alavelave fa'anatura pe o mea fo'i e tutupu mai ona o ni faiga fa'aterarisi.

E to'atolu sui mai Iunivesite i fafo na fa’afoeina lenei fa’atasiga.

O le tama'ita'i o Caroline Hackerott, Assistant Professor & Graduate Program Director Arkansas Tech University, ua atoa le 25 tausaga o ia fa'atulagaina kosi e tauavea e nisi ua manatu ina ia galulue i le iloiloga o fa'alavelave fa'afuase'i ma o latou a'afiaga i le soifua o tagata ua a'afia ai, ma ua auai fo'i o ia i le fa'atulagaga o nei kosi e sailia ai fa'ailoga maualuluga o i latou e tapena mo na matafaioi e tua i ai atunu'u ma setete i le tulaga o faalavelave fa'afuasei. O i latou nei e aoga latou suesuega ma fa'amaumauga e tapena ai lipoti taua'ao mo faigamalo e pasia mai ai e le Peresetene sana ioega e fesoasoani mai le FEMA.

Peita'i o lana fo'i itu, e mafai ai ona fa'afoea lelei se taumafaiga a le nu'u po'o le atunu'u ua a'afia ina ia fesoasoani e tula'i atu e toe fa'aleleia le soifua lautele o tagata na a'afia i se faalavelave, a'o le'i o'o mai se fesoasoani a le Malo tele.

O le sui lona lua o le susuga Steve Recca - Director University & Agency Partnership Initiative Center for Homeland Defense & Security, ma le lona tolu o le tama'ita'i o Becky Rouse, Associate Professor of Homeland Security & Director of Institute for Human Security Marina University.

I lenei fonotaga e mautinoa lava le fa'aaupegaina o nei sui sa auai, ina ia mautu lo latou iloa ma tomai mo fa'aiuga e faia i taimi e luluti mai ai faaletonu fa'anatura ma a'afia ai le atunu'u. Ua latou faailoa mai fo'i avanoa lelei e mafai ona talosaga atu ai nisi o alo o le atunu'u ia sailia tusi pasi maualuluga e aoga atili mo le galuega tautua o tatou tagata i taimi fa'aletonu fa'anatura.

Na tele fetufaiga sa fa'atino, ma latou toe tutula'i i latou e fa'ailoa ala e fa'atino ai fesoasoani, ina ia le soona nunumi ma vevesi tagata uma i le taimi e tutupu ai ni fa'alavelave fa'afuase'i. O le ki muamua lava e ao ina fa'ailoa i tagata uma o a'afia, "Aua le vevesi vale, fa'ato'ato'a mai ma mafaufau lelei! O le faiga o tonu e ao ina faia ae taga'i i le galu, ia se'e tuavao fo'i pe afai ua ia tei tatou tomai, ae tu'u le fa'atuatuaga i le fanau ua mae'a a'otauina mo nei tiute, ae o le mea sili lava e ao ina mua'i iloa e i latou ua tu'uina i ai le faiva, fesili mulimai ia muamai, pe afai e tau fai tutusa o oulua tulaga o i ai i le faiva o fa'atautaia nei."

O se tasi lea o fautuaga sa fa'afofogaina i lea semina aoga.