Ads by Google Ads by Google

Tala I Vaifanua

JODEY MUA'AVA MAI UAROTA MUAMUA PAVAIAI - MAUA LANA EAGLE

 

O le ali'i talavou o Jodey Mua'ava mai le Troop 292 a le Sikauti Uarota Pava'ia'i Muamua, ua mae'a lelei lana poloketi e agava'a ai o ia mo lona fa'ailoga o le Aeto i faapinega tau polokalama fa'a-siakuti.

 

O le fa'ailoga o le Aeto, o le fa'ailoga pito i maoa'e lea i le Polokalama a le Sikauti lea e matele ina fa'atino e Auatama ma Auateine mai le Ekalesia A Iesu o le Au Pa'ia o aso e Gata ai.

 

O lana galuega ua agava'a ai mo lea fa'ailoga, o lona fausia lea o se alasavali fa'asima lelei ina ia mafai ona fa'afaigofie ona feoa'i le fanau e le atoatoa le malosi o le tino poo le mafaufau, i o latou nofoa fa'ata'avalevale.

 

O le a'oga i Pavaiai o lo'o aofia ai fo'i ma fanau e mana'omia ona feoa'i i nofoa faata'avalevale. O le mae'a ai o lana galuega fa'atino lenei, ua fa'afaigofie atili ai ona feoa'i mai nei fanau mai potu a'oga i le isi potu aoga, fa'apea ai ma le o'o ane i le fale'ai mo le 'aiga i le taeao ma le aoauli i le a'oga lava.

 

O le fa'amalo ua ia ofoina mai i le vasega o ta'ita'i o la na sikauti i Pavaiai 1st Ward, Troop 292 ona o le galuega sa latou fesoasoani i ai, tima'i le ali'i sa saili lona fa'ailoga: Bishop Falesa Fa'asavalu; Peresetene o le PTA Bishop Fogavai ae maise fo'i o matua o le ali'i ua maua nei le sikauti:

 

Ua fa'afetaia fo'i e Jodey Mua'ava le Polokalama o le SPED ma le latou matu'u maia o le a'oga i Pavaiai ina ia fa'atautaia ai lana poloketi.

 

Na talosagaina lava le fa'aaogaina o le lotoa a le a'oga i Pavaiai i le Matagaluega o A'oga mo lenei fa'amoemoe, ma sa umi le taimi o tatalia fo'i le talia mai o lea talosaga, peita'i o le fa'afetai, ona o lea ua mafai ona fa'atino ma ua mae'a lelei lea polokei.

 

Na auai uma aiga o le ali'i o Jodey Mua'ava mo lona fa'amoemoe, ma ua avea fo'i ma fa'amalosi'au ia te ia lana taumafaiga ae ua talia a'o i ai ona matua ma matua o ona matua ae maise sui mamalu mai lana Uarota i Pavaiai Muamua.

 

TUAI MAUA SIAKI A LE FANAU A'OGA I LE ASO FARAILE

 

E ui lava ina tuai, ae na maua lava siaki a le fanau a'oga i le toetoe a ta le 4:00 i le afiafi o le aso Faraile ua te’a. Na tau popole fo'i nai isi matua i le fa'atuai ona o'o atu o le fanau i aiga.

 

O nisi o matua na toe vala'au mai i le Samoa News po'o le a tonu se a'oga o lenei ituaiga faiga ua faia i fanau ae ua atoa lelei le 4 vaiaso o tatalia nei siaki.

 

Toe sau ai ma le isi faitioga, ia ae sau e na'o le $86 po'o le a se mea a lava ai tamaiti, tasi le pea ofuvae ma le mitiafu ae uma le siaki.

 

Sa fa'ailoa e se tasi tina, "Ioe fa'afetaia lava le alu atu i le galuega, ae tele mamao le tupe ua fa'aalu i le pasese ma mea'ai a le fanau i lenei 4 vaiaso ua tuana'i nai lo le tupe ua maua mai."

 

O lenei tausaga e 813 i latou ua fa'afaigaluegaina fa'amasani i Ofisa eseese o le Malo ma pisinisi i le teritori.

 

I le aso Faraile lava, na amata vala'au mai matua i le ta o le 1:30 i le aoauli, ona soso'o lea ma le 2:30 ae toe siaki ane lava latou fanau e le o maua lava. Soso'o lea ma le 3:00 e tatali ai le tufatufaina atu, ae soso'o ma le fai mai o le 3:30pm; ae fa'ato'a tatala mai lava le tufaga o nei siaki i le 3:55pm, ma i'u ai ina ta le 4:00 te'a le fa ae fa'ato'a maua siaki a nai isi tamaiti.

 

E faitio nai isi matua ona e mamao latou afio'aga e tatau ona toe o'o atu ai le fanau ae le'i o'o ane le popole vale i o latou loto ma agaga. "Ana o fanau fo'i a i latou o e maualuluga, ai lava ua leva na o i le fale ua maua siaki." O le isi fa'asea, "E leai se faia'i e mafai ai ona alu ane se isi e fai se tala e fa'anofo filemu ai loto o le fanau ma le vilivili mai i aiga e fa'ailoa mai i ai o le a ma le a la e tupu i o. Se o tagata fo'i ma o latou uiga!"

 

ITU MO PISINISI LAITI MAKETI FAGATOGO: TASI LE PISINISI O I AI

 

Mai le 5 pisinisi sa fa'aaogana lea itu atoa o le Maketi i Fagatogo, ua toe tasi lava le pisinisi laititi tumaoti o lo'o ua fa'aaogaina pea le fesoasoani mai a le Matagaluega o Fefa'ataua'iga i le Maketi i Fagatogo.

 

O le pisinisi lea o totoe ai nei o le "Oh Snaps." Ua fa'ailoa mai fo'i le fa'aaogaina o lenei avanoa e pisinisi laiti, e le tumau ai pisinisi laiti i lea nofoaga, ae na'o se nofoaga e fa'amasani ai tagata i lau ituaiga o pisinisi, o au oloa e fa'atau atu po'o lau ituaiga o tautua, ae tatau ona e fa'asolo e saili se nofoaga tumau mo lau pisi nisi a'o le'i mae'a le lua tausaga.

 

Ua fa'ailoa mai o lo ua fa'atautaia nei ni suiga mo lea itu o le tautua.

 

O pisinisi sa i ai i lea lava nofoaga, e to'atele o i latou sa i ai mai lava i le tausaga 2008, ma e ese mai i pisinisi ua fa'amautu a'ia'i latou nofoaga tumau, ae o pisinisi laiti nei e fa'aletumau le feutaga'iga o le latou lisi mo nei avanoa.

 

TOE FA'AFOI PULEGA FAGATOGO SQUARE I LE AIGA O TEDRECK?

 

O le taimi nei ua fa'ate'ia fo'i le vasega o i latou o lo'o ua fa'amautu atu i le Fale o Pisinisi i le taulaga, "Tedi of Samoa" Fagatogo Square ina ua taulimaina e i latou tusi fa'ailo mai le ali'i Loia o Dave Vargas, ina ia suia atoa le tagata e fa'ao'o i ai a latou pili mo le nofoia o lea fale o pisinisi.

 

O le fale o Pisinisi lenei sa fausia ma pulea mai e Apoua & Bill Tedreck, peita'i e le'i mamao tele atu ae fa'atau ese atu loa i se Aufaipisinisi e fa'aigoaina "Avapui Loa" mai Los Angeles, Kalefonia, o tagatanu'u fo'i o Amerika Samoa.

 

O le susuga Calvin Tagaloa sa avea ma se sui e fa'atautaia lea pisinisi i'inei.

 

I le amataga o le vaiaso ua te'a, sa taua'aoina atu ai loa nei sui mai le susuga le loia o lea fale fa'apisinisi David Vargas i le vasega o pisinisi uma o lo'o fa'amautu ai, e aofia ai le Ofisa o le tatou sui i le Konekeresi Aumua Amata, o le fale'aiga o le Matai Restaurant, ma le Ofisa o Turisi a le tatou Malo,  Swire Shipping; Oxford Pacific ma le Trophies and Things fa'atasi ai ma ni pisinisi sa fa'atautaia e Tagaloa ma le faletua.

 

Ua le mafai ona talia maia e le susuga le ali'i loia ni fa'afesili e tusa o lenei mataupu, peita'i ua fa'ailoa mai, o lo ua fa'atonuina le vasega o e uma o faipisinisi i lea faleopisinisi ina ia taua'aoina peimeni o lisi i le PJK Fish Market i Utulei, ma fa'amautu mai ni a latou lisiti o peimeni ua totogia.