Ads by Google Ads by Google

Tala I Vaifanua

MAEA POLOKALAMA A LE ARTS COUNCIL I LE TAOA:

 

O le Polokalama sa fa'atautaia a le fanau talavou e le Arts Council ma le TAOA ua fa'amae'aina nei ma sa fa'atumulia le fale Samoa i le to'atele o matua ma Tina ma Tama Matutua sa maimoaina a latou siva ma pesega fa'asamoa ae maise o latou galuega sa fa'atinoina i le fa vaiaso sa fa'atautaia ai lea polokalama.

 

O pesega ma ta le Ukulele sa fa'atinoina e i latou ua mafai faia nei faiva, ma sa iloga le matagofie o lea fo'i sao sa aoaoina fa'apitoa e le susuga Paulo Petelo mai Pago Pago.

 

O le vaega o lalagaina o galuega taulima sa fa'atautaia e nisi o tina TAOA ma sa iloga ua matua tele pale ma taulima laufala sa i totonu o ato a le fanau, ina ua mae'a nei le polokalama.

 

O le tulaga o le faigasiva ma pesega sa aoaoina lea a le aufaipese matagofie a le TAOA ma sa fa'afiafiaina fo'i i latou i siva a le fanau ma pesega na fa'atino. O le itu tau taina o fa'atagata ma Upeti Samoa toe faia ma le elei, ua matua manino lea i le toniga sa la'eia e i latou i a latou siva ma pesega.

 

O Upeti Samoa sa taina e i latou ua tufatufaina mai ma ua matagofie pe a fa'aauau e matua ma le fanau lenei fo'i taleni e sailia ai se seleni e tausia ai aiga. O lo ua tapena fo'i ma le suavai, sa auai le fanau matutua i le afa'apulouna o le Suavai ma le tapenaga o mea taumafa Samoa sa latou fa'avelaina ai.

 

O le umu o talo, fa'i, Ulu ma palusami ma le faiai Pilikaki sa tapena lelei aua le fofoga taumafai o tama ma tina matutua fa'apea ma le au vala'aulia.

 

Na maua se avanoa o le tama'ita'i fa'atonu Lauagaia Taufete'e mo sana fa'afetai i le TAOA ae maise le vasega o i latou na fa'asoa mo le fanau o latou tomai i lenei 4 vaiaso ua tuana'i.

 

"O la outou fa'asoa, ua aoga lea mo le fanau o le lumana'i, tau ina ia fesoasoani atu le Atua ia te outou ma fa'aopoopo le malosi e mafuta ai pea ma aiga, ae maise fo'i o avanoa e fefa'asoa'i ai ma tupulaga talavou, ia lava tapena i latou mo le lumana'i, ina ia le valetu'ulima a tatou tu ma agaifanua, a'o tatou galuega alofilima fo'i, o measina a lo tatou atunu'u pele."

 

Na tutula'i fo'i le tama'ita'i fa'atonu o le TAOA, Evelyn Satele ma ia fa'afetaia le avanoa e galulue fa'atasi ai le TAOA, i matua o i ai sosia o Samoa e ao ina fa'asoa, ma le Arts Council, le auga o mea e fa'alautele ma fa'aleleia atili ai le fa'aauauina o nei taleni, ma le latou so'otaga ma lenei fo'i vasega tupulaga talavou ina ia fa'asoa atu i ai tomai nei.

 

"O se avanoa e le tatau ona misia, o se avanoa fo'i e fa'asoa ai le iloa e ao ina fa'aofi i olaga o fanau talavou a Amerika Samoa mo a taeao."

 

O le 'aiga fiafia sa alofaiva i ai le to'atele ina ua mae'a lea fa'atasiga sa maimoaina ma fiafia i ai i latou uma fa'atasi. O le siva afi Samoa sa alo i ai le atali'i o Carneal Satele, sa matua maofa ai le to'atele, aua sa leai se a'oga fa'apea, a'o lenei talavou, ua alu atu e fa'amaimoa le vasega o talavou ma Matua uma na aofia, i se taleni ua mafai ona ia mauaina, sa a'otauina ai o ia e le Lavata'i Brothers.

 

EFKAS & KOMITI E VA'AI TOTO'A FUALA'AU MA VAILA'AU FA'ASAINA

 

Ua i ai se isi suiga tele i Komiti fa'atula'ia e le fonotele lona 32 a le EFKAS, lea ua fa'ailoa mai, o le a nafa ma le va'aiga toto'a i tupulaga uma o le Ekalesia o lo'o ono a'afia i Fuala'au Fa'asaina ma Vaila'au O'ona i totonu o ekalesia ta'itasi a le EFKAS.

 

O le manatu na fa'aa'e mai fa'aiugafono a le Fono a le Au Toeaiina a lea ekalesia, ma ua fa'apasia nei e le Fonotele o se tasi o latou i'ugafono. O le lipoti ua fa'ao'o mai e le Komiti a le Au Toeaiina ua fa'ailoa ai, "Ua tele le a'afiaga o tupulaga talavou ma tama lava fo'i o aiga, i Vaila'au O'ona ma Fuala'au Fa'asaina.”

 

Ua mae'a soalaupule la le Fonotele po'o le a se auala o le a mafai ai ona fesoasoani le Ekalesia i le Malo ina ia fa'afo'ia le fa'afitauli lea i tupulaga ma nisi fo'i lava o matua o aiga, ua a'afia olaga i Vaila'au O'ona ma Fuala'au fa'asaina.

 

O lo ua i ai nei la le Komiti Laititi a Talavou e latou te mataituina lea fa'afitauli ma saunia atoatoa mai se lipoti mo le fonotele ae maise le Komiti a le Au Toeaiina. O i latou nei o le latou faiva, ia fa'ata'atia lelei mai se fuafuaga fa'ata'oto i se auala e mafai ai ona fa'afo'ia le fa'afitauli, pe afai fo'i ua matauina o lo'o ua a'afia nisi o le tupulaga talavou faapea matua o aiga, i lea tuga mata'utia.

 

O le komiti a talavou ua aofia ai le susuga le Taitaifono: Manutafea I. Fano; Sui Taitaifono - Salima Eucharist Reupena. O le failautusi Anoi Gaogao mai le Ekalesia Ierusalema Fou i Hawaii, ma le Teutupe Harriette F. Manase.

 

TAINA LAEI SAMOA TRIXY PETAIA - AVANOA SAUNOA I TALAVOU

 

Ona o le vala'aulia fa'apitoa o le tama'ita'i sa avea ma tausala lalelei o Amerika Samoa i le tausaga 2004-2005 ina ia saunoa fa'apitoa i le Fonotaga Tu'ufa'atasi a Tupulaga 2018, lea sa fa'atautaia i le Fale Ta'alo i Pago Pago ia Iuli 2 & 3, 2018 na toe fa'aosofia atili ai le lagona i lenei tama'ita'i Samoa e na te la'eia ao tapena mo lea fa'amoemoe maualuga.

 

"Ona o le lagona fa'agae'etia, ua toe vala'auina lo'u nei talavou e toe fa'asoa mo tupulaga fo'i o le atunu'u pele, o lea sa fa'aosofia ai se lagona, e ao ina fa'aatoatoaina le tagata i lona la'ei se'ia o'o i ona lagona ma lona fatu, o a'u lava o le Samoa moni,” o se tala lea a Trixy Taua Petaia i le mafuaga ua toe o'o ai i tiga o le au, ona o le naunau i le atoaga o tautua.

 

O le latou faigamalaga na uia mai ai Samoa Tuto'atasi ma o le fa'amoemoe maualuga, ia la'eia le Malu a'o le'i o'o tula'i i luma o tupulaga talavou, ma le o'o mai ai fo'i e toe fa'afo'i se sao i le Laumua sa utuvai ai a'o a'oga i lona atunu'u pele, Fagaitua High, lea sa fa'ailoga le atoaga o le latou 50 tausaga talu ona fa'atula'ia.

 

Na amata lana malofie ma galue ai le tufuga o Ata Scott Suluape ma sa taina lava i le Fale, i le lotoa a le Samoa Tourism Cultural Center. Na ta lava na'o ia, sa leai sana soa.

 

Ina ua mae'a sa ia tu'uina sina taimi e malolo ai, fa'ato'a fa'aauau mai ai le malaga mo Amerika Samoa nei.

 

O lo'o alaala o ia i le Setete o Uosigitone ma o lo'o galue fo'i i se galuega i lena a'ai e aoga tele e fesaosoani ai i tagata uma e aofia ai ma tagata o si ona Malo e gasolo atu i lea a'ai.

 

Ina ua ia la'eia lana malofie, sa ia fa'ailoa mai, "O lea fa'ato'a ou fa'aatoaina le faiva sa tatau ona ia te a'u i le taimi na ou tautua ai i le atunu'u e avea ma ana tausala, peita'i, e tuai ia ae ua fai mai. Ua ou lagonaina le taua o le la'ei, ma e le faigofie fo'i le tiga o le au, ae o mea ia e mafai ona ou fa'apea ai, ua ou fa'asili lou lagona o a'u o le Samoa Moni."