TOFIA LE LOIA SILI FAI MA LOIA FESO'OTA'I EFKAS

Mai le amataga o le tauaofiaga o le Fonotele 2018 se'ia o'o i lona fa'ai'uga, sa mautinoa ai e le laulauafono ua le fa'atasi mai le Loia filifilia a le Ekalesia - le afioga le Aloali'i Afoa Moega Lutu, o lea i lona fa'ai'uga, ua latou sailia ai se sui ina ia auai le loia i taimi o lo'o fa'atautaia ai fonotaga, ina ia fautuaina fo'i le fonotele i mataupu e ono mana'omia ai lea tulaga mai le loia faufautua.

I le taimi nei ua pasia ai e le laulauafono a le Fonotele le avea o le ali'i loia Talauega Eliasaro Ale, o ia o le Loia Sili a le malo o Amerika Samoa, ina ia avea ma loia faufauatua a le EFKAS i le taimi nei, se'ia mautu se latou sailiga o se tasi e tau'avea lea tofi.

Ua faia lea fa'aiuga, ona ua mae'a lelei le fonotaga, e le o fa'afeso'ota'i mai le Laulauatofi a le Fonotele e Afoa, ma e i ai fo'i mataupu sa fia fesiligia ai e le Laulauafono fautuaga mai le ali'i loia.

O se tasi o mea e sili ona taua i lea tofiga o le loia fautua, o le taimi e faia ai palotaga i so'o se tausaga o fonotaga, ina ia mautinoa o lo'o fa'atautaia e tusa o ala o tulafono tamau o le fa'avae o le EFKAS.

FA’AMAVAE PULE SILI OFISA O TIUTE

Ona ua vala'auina Liava'a Moevao e avea ma Faife'au tausi ekalesia EFKAS i Huntington Beach, Kalefonia, ua toe avanoa ai nei le tofiga o le pule sili o le Ofisa o Tuite a le malo (Chief of Customs).

O le aso 19 o Mati, 2018, na amata ai Moevae e pulea lea ofisa o le malo. Sa tuatua muamua o ia i le US US Navy ma litaea mai ai, ona avea lea ma Malu o le Malo i le aai o Los Angeles.

E ui ina pu'upu'u le taimi ua avea ai o ia ma fa'auluuluga o le Ofisa o Tiute, ae ua fa'aalia e lagona o nisi o lana aufaigaluega, "E matua iloa lava e ia ona fai le va ma ana tagata faigaluega. E fesoasoani e fa'amalamalama mai le tulafono e ao ina usita'ia e i matou i o matou tiute fa'atino, ma e a'oa'o fo'i i a matou amio. O le fa'amaoni sa ia naunau i ai, ae paga lea, o le a toe ave'esea atu fo'i mai ia i matou se tasi o tagata faigaluega ua fou ai fo'i lota fiafia e faigaluega."

Ua le gata i e faigaluega ma ia, ae o le vasega fo'i o tagata faipisinisi sa matele ina feso'ota'i ma le susuga Moevao.

Na faia le fa'amavaega a Moevao ma lona ofisa i le aso Faraile talu ai, ma soloa'i ane nei le ali'i sa avea ma Sui Taita'i Ofisa o Tiute Juliano Falaniko avea ma pule sili le-tumau se ia maua se isi mo lea tofi.

FA'AMAVAE LT. COL. SEYBOLD - SUIA E LT. COL BUNIAG

O le aso To'ona'i na te'a nei sa fa'atautaia ai le sauniga i le US Army Reserve Center i Tafuna ina ia fa'atofa atu ai i le susuga Lt Col. Clinton Seybold, ae fa'afeiloa'ia le susuga Lt Col. Alejandro Buniag Jr., o le ta’ita’i fou mo le vaega o le Theater Support Group Detachment i Amerika Samoa a le US Army Reserve.

O Lt Col Buniag o se tasi o ali'i fitafita mai le teritori o Northern Mariana Islands ae alaala tumau i Guam, ma sa fa'atinoina uma lava tapenaga ma ala o fesuia'iga o tofiga e alagatatau ma aiaiga a le Militeri i lea fo'i sauniga.

E tolu tausaga o tautua Seybold i lea tofi ma ua iloga fo'i le to'atele o ana uo ma aumea mamae ua masani lelei ai o ia i le atunu'u, aua e auai lava o ia i le tele o fonotaga faaleaoaoga e fa'atautaia i le Matagaluega o le Saogalemu Fa'alotoifale, aua e galulue feso'ota'i lelei le USAR ma lea fo'i matagaluega.

Na masi'i mai le ali'i o Col Travis Delk mai Hawaii ina ia fa'atautaia lea sauniga i ala e tusa ma le aiaiga fa'amiliteri i suiga o tofiga.

Saunoa Delk e tusa o le auaunaga matavela ma le aoga a Seybold i Amerika Samoa, ua mafai ai ona ia fa'auia poloketi e fa'aleleia atili ai le tautua i le teritori e tusa ma le $1.8miliona lona tau aofai.

Sa faigata ona saunoa Seybold ina ua maua lona avanoa e saunoa fa'amavae mai ai, peita'i sa ia fa'ailoa lona agaga alofa ma le fiafia e nofo ai i Amerika Samoa.

"O lau aganu'u, e matua fetaui ma lo'u nei sui fa'atauva'a, aua e i ai nai so'otaga fa'asikotilani e tutusa ai, ma o se malo ua faigata ona ou fa'atofa i ai. Ae ui o lea, ou te fa'afetai sa ou nofo ai mo le tolu tausaga, molimauina ma ola ai i lau aganu'u matagofie. E ui ina ou fa'atofa, ae ou te alu ma lo'u iloa lelei, e le galo Samoa ia te a'u,” sana fa'amavae mai.

PASIA 2 TAUSAGA AGAVA'A O FA'ASAO MARIST HIGH

I le fa'aiuga o le asiasiga a le WASC i le a'oga maualuga a Fa'asao Marist ua taua'aoina mai ai le agava'a mo le isi lua tausaga o lumana'i, o lona uiga e toe asia i latou i le tausaga 2020.

Susuga le Fa'atonu o A'oga a le Ekalesia Katoliko, Br. Christopher Popwell, "O le pasiga lava ua taua'aoina mai e 6 tausaga lona umi, peita'i e toe asia mai i matou i le tausaga 2020 ina ia mautinoa o lo'o fa'aleleia mea ua mae'a fa'atonuina ma fa'atulaga e ao ina faia e le pulega o a'oga.”

Ua fa'ailoa mai e Christopher, "E i ai mea na fa'atulaga e le WASC e tatau ona fa'aaogaina i Lipoti mai le tausaga a'oga 2016, peita'i e le'i iloa e le pulega o le a'oga maualuga.”

O le a'oga maualuga a Fa'asao Marist, ua na'o le pau lea o le a'oga tumaoti sa asiasia e le WASC i le masina o Me 2018. I lea taimi sa asia ai fo’i aoga maualuluga a le malo - Manu'a, Tafuna ma Fagaitua. Ma ua pasia nei aoga mo le 6 tausaga.

PASIA US COAST GUARD ULUFALE MAI VA'A TUVALU

Ua mautinoa e i ai oloa e mana'omia e le malo o Tuvalu ma nai ona tagatanu'u mai Amerika Samoa, ae ua iloga fo'i, e i ai le Au I'a e mana'omia e Amerika Samoa mai le gataifale o Tuvalu.

O le aso To'ona'i na te'a na mafai ai ona ulufale aloa'ia mai i Pago Pago le va'a la'u pasese ma uta o le "MV Nivaga III" mai Tuvalu ina ua mae'a pasia e le US Coast Guard.

O le susuga Iulogologo Pereira, so’oupu a le kovana, sa ia fa'ailoa mai le pasiga lelei e le US Coast Guard o le MV Nivaga III ma o le a avea ma se 'ave fe'au lelei i le va o malo e lua, Tuvalu ma Amerika Samoa.

Ona o lea ua manatu ina ia fa'aaoga le va'a lea mo femalaga'iga ma la'uga o uta i le va o Tuvalu ma Amerika Samoa, o lea e i ai le isi seti atoa o tulafono a le US Coast Guard e toe pasia lelei ai le MV Nivaga III. Ua fa'atonuina ai e Kovana Lolo Moliga le matagaluega o Uafu ma Taulaga i lona fa'auluuluga ina ia mataituina nei suiga ma fesoasoani i le Va'a mai Tuvalu, ia mafai ona pasia lelei e le US Coast Guard i se taimi vave.