Ads by Google Ads by Google

Tala I Vaifanua

MAIMOAINA GALUEGA FA'ATAUTAIA VA'A SUESUE HI'IALAKAI

 

Na maua le avanoa e asiasi ai ma maimoa i galuega o lo'o fa'atautaia e le au Saeanitisi a le NOAA o lo'o fa'aaogaina lea va'a mo a latou galuega e mataituina ai le olaola o le 'amu, le tele o le 'amu ma I'a o le tatou gataifale atoa i  Amerika Samoa nei, fa'atasi ai ma le tulaga olaola lelei po'o le fai atu fo'i o le ola o le a'au.

 

O le va'a lenei, o le Hi’ialakai, e tolu tausaga ma sau le latou suesuega lenei, ina ia mataituina lea tulaga lea i lo tatou gataifale. Ua fa'apea fo'i ona va'ai toto'a e i latou le tele o ituaiga i'a ma lo latou lapopo'a ua i ai i le tatou gataifale. E i ai fo'i a latou vaipanoa o le gataifale ua matua fa'atulaga mo a latou suesuega patino nei i le ta'itolu tausaga.

 

O nisi o a latou suesuega, e mafai ai ona latou sailia ituaiga fa'aletonu o lo'o a'afia ai le gataifale o Amerika Samoa ma le afuaga o nei fa'aletonu. O le sailiga o ituaiga o siama ua olaola i totonu o amu ma va o amu i le a'au, o se isi lea mea ua matele i ai latou saililiga, aua e ao ina latou silafia lelei, po'o ua fa'ateleina nisi ituaiga siama ua ola ai, pe ua fa'aititia fo'i siama mai le mea sa i ai muamua.

 

Ua mataina e le faigofie nei sailiga, ae fa'afetai aua o fa'amaumauga uma o nei saililiga ma suesuega e fa'auia uma lea aga'i i le NOAA mo le fa'amautuina ma tatala mai ai i le mamalu lautele mo le latou silafia, atoa ma le fa'aaogaina fo'i o nei fa'aiuga mai suesuega nei e nisi matagaluega o le tatou malo ma le Malo tele.

 

I nei suesuega, ua fa'ailoa mai e sui saenitisi galulue i lea va'a, "E faia uma e i matou suesuega ma fa'amautu atu i le NOAA mo le suesuega atili ma toe va'ai toto'a ai i mea sa i ai i le tolu, ono ma le iva tausaga ua tuanai, ona fa'ato'a toe fa'alauiloa mai lea e ala i lipoti fa'amaumau, se suiga o aga'i atu i ai le olaola o amu, po'o le fai atu fo'i o le latou ola, fa'apea fo'i ma le tulaga fa'aleleia o le a'au o Amerika Samoa po'o lona tulaga fa'aletonu fo'i."

 

O lenei le va'a o lo'o fa'atautaia ai galuega suesue ma mataituina le olaola o le a'au, lea sa fa'alauiloa ai le tulaga o le a'au o Aua, lona vaega tonu lava sa sailia muamua i le vaitausaga e 1970, ae toe fa'atusatusa mai i le 2012. O le ituaiga i'uga lelei na e va'aia, ma ua iloga ai ona aoga suesuega ma fa'amaumauga nei e faia e ali'i ma tama'ita'i saeanisi a le NOAA.

 

O se tala fiafia tele, ua fa'ailoa mai ai e i latou nei, o gataifale o le Manu'atele, o lo'o ua latou maimoaina ai le tasi fo'i o Amu sili ona tele o lo'o olaola lelei ai, ma o se mata'aga lea ia i latou o le maulu mai maimoa ai, ma fa'amaumau mai fo'i ni a latou sipesimeni mo latou suesuega atili i le olaola o lea 'amu.

 

O lenei vasega o Saenitisi, ua alu fo'i a latou suesuega i nisi malo e aofia ai le gataifale o Filipaina, ma sa ia ta'ua, "E matua tele na'ua ituaiga i'a eseese ua fa'aofaga i le gataifale o FIlipaina pe afai e fa'atusa atu i ai le gataifale o Amerika Samoa atoa, peita'i, e le tele ona i'a e pei ona matauina e i latou i nofoaga nei ua latou suesueina. O le isi ua tele fo'i a tatou i'a nini'i, ma ua tatau lava ona fa'amalosia pea le tetele o i'a lea ua fa'ataga ona fagotaina i o tatou gataifale e le mamalu o le 'au faifaiva."

 

Na auai fo'i le Tausala Lalelei o le Pasefika, Ms Matauaina Toomalatai i lea asiasiga i le Hiialakai, ma sa ia fa'ailoa mai, "Fa'afetai i le sao o nei ali'i ma tama'ita'i suesue fa'asaeanitisi aua ua fa'amoemoeina lo tatou gataifale i ona sosia i le lelei po'o le fa'aletonu i a latou fa'aiuga ma suesuega faia. E fa'afetaia fo'i le tutumau o le mau a le NOAA ina ia puipuia pea le gataifale o le tatou atunu'u."

 

O le tama'ita'i o Mareike Sudek sa ia taita'ia le asiasiga mo i matou uma sa aofia fa'atasi ai sui o le National Park, sui o le Ofisa o le Port Administration, sui o le ASEPA ma nai tama'ita'i faia'oga sa auai fa'atasi ma sui fa'asalalau i lea maimoaga i le Hi'ialakai.

 

E toe taliu lenei aufaigaluega i le latou va'a lea "Hi'ialakai" i le aso Gafua nei, ma ua fa'afetaia fo'i lo latou galulue malosi ina ia mautinoa e le tatou atunu'u, po'o le a se tulaga o aga atu i ai tatou 'amu, a'au ma le tele o ituaiga siama eseese e afua mai i lapisi o lo'o lafoaina i le sami, ua i ai nei i o tatou gataifale.

 

LDS YOUTH - AOAO TA’ALOGA HANDBALL

 

I le taumafaiga lava o lo'o fa'atautaia nei a le American Samoa Handball ina ia malaga atu i le ta'amilosaga a le Youth Olympics i Buenos Aires, ae ua toe fa'aofi mai ma le mana'oga tupito o le Autalavou a le Ekalesia a Iesu o le Au Pa'ia o Aso e Gata Ai, ina ia a'oa'oina i latou i lenei tu'uaga umi o A'oga, ina ia iloa tulafono ma ta'a'alo i lea ta'aloga.

 

O lo ua talia ma le fiafia e le susuga le Faia'oga a'o le Peresetene fo'i o le Handball i Amerika Samoa Carl Sagapolutele Floor lea talosaga.

 

Ua fa'atulaga ai e i latou le aso Faraile a sau, 27 Iulai, 2018 mai le itula e 9:00 i le taeao se'ia pa'ia lea itula e 11:00 e faia ai lea a'oa'oga taua mo fanau uma ua fia iloa ta'a'alo Handball a lea Ekalesia.

 

Ua fa'atulaga le a'oga Maualuga i Leone e faia ai lenei taumafaiga, aua o lea ua fa'aosofia le naunau i alo talavou o lea Ekalesia e fia iloa ta'a'alo i lea fa'agatama. O le tala mai, ia mautinoa ua atoa ma sili atu i latou e o ane mo lenei a'oa'oga i le 12 tamaiti ma teineiti. Ua toe aumai fo'i le fa'afetai tele mai le ali'i Peresetene ma le 'au Handball a Amerika Samoa mo le Youth Olympics ona o le foa'i a le vasega o pisinisi tumaoti ua fa'auia atu ia i latou ma le fa'amoemoe e fia gafatia ona malaga e tausaili so tatou 'ai i lea fa'agatama.

 

E le gata i pisinisi ae o le a faia se latou talotaloga i le aso Gafua a sau nei, Malae o le Suigaula a le Atuvasa i Utulei, ona o le naunau lava i le manumalo!