Ads by Google Ads by Google

Tala I Vaifanua


[ata: foa'i]
ausage@samoanews.com

TALIMALO PULEAGA SAMOA PAGOPAGO - ASO TUPULAGA SAMOA 2021

 

I le sauniga fa'ai'u o le Mafutaga a Autalavou uma a le Ekalesia Katoliko i le Pule'aga Samoa i Apia, Samoa, lea na amatalia ia Iulai 10 ae fa'ai'u ia Iulai 14, 2018 na tali ai loa le afioga Akiepikopo Alapati Mataeliga i le talosaga na fa'aulu e Epikopo Peter Brown i le sauniga amata o lea fa'atasiga tele i le Malumalu fou i Mulivai, e fia talimalo le Pule'aga Samoa Pago Pago i le isi Aso o Tupulaga Samoa i le 2021. O le tali, ua ioe mai.

 

O le fa'atasliga tele lea a Autalavou Katoliko uma, sa fa'atasia uma mai ai nisi o Autalavou na vala'aulia fa'apitoa mai Niu Sila, Ausetalia, Pule'aga a Tokelau, Amerika Samoa ma Samoa.

 

Na amatalia i le savaliga tele, ina ia aloa'ia le auai o Autalavou uma mai isi Pule'aga tuaoi, ae o se fa'atasiga fo'i ua auai uma talavou Samoa mai isi malo sa logotala i lenei fa'atasiga.

 

O le auau o le fa'atasiga sa fa'amamafa ai, "Talavou o Misionare o le Agaga Pa'ia!"

 

Na amata le savaliga mai lumafale o le Fale Tineiafi i Apia, agai i le Eleele fou i lumafale o le Maota o le Malo o Samoa.

 

O le sauniga lea sa ta'ita'ia aloa'ia e Epikopo Peter Brown; lea na maua ai loa ma lona avanoa e fa'aulu ai lana talosaga mo se taligamalo a le autalavou a le tatou pule'aga i le isi tolu tausaga o lumana'i.

 

O le ulua'i taimi fo'i lenei o le a talimalo ai le tatou Autalavou a le Pule'aga i le ATS, ma ua matua fa'afiafiaina i latou e galulue punoua'i mo lea fa'amoemoe ua loma nei. O sui iloga o le Autalavou a le Pule'aga Samoaa Pago Pago na masi'i na lafo lea i le Autalavou a le Matagaluega a Iliili, peita'i na tatala lava le avanoa matagofie i so'o se talavou mai isi matagaluega e fia malaga, o lea sa masi'i atu ai le to'atele mai Aua, Tafuna, Pavaiai, Leone i lea fa'amoemoe ma sa mata'ina fo'i le sao o le tatou autalavou mai Amerika Samoa nei i le savaliga, atoa ai ma le nofoaga sa tausia lelei ai i latou e le Autalavou a Sagato Telesia i Le'auva'a.

 

O isi autalavou malaga mai Niu Sila ma Ausetalia fa'atasi ai ma Tokelau, sa tausia lava fo'i e isi Ekaelsia Katoliko. O Falefa sa api ai le isi aumalaga tele, ae o i tatou lava na matua mafana le so'otaga a tupulaga talavou ma i latou i Sagato Telesia.

 

O le afuaga fo'i lea o le fa'amoemoe e tatau ona so'otaga lelei Tupulaga ma galuega fa'amisionare a le Agaga Pa'ia. O le latou fa'amasani fa'auo ma feso'ota'i lelei ma isi tupulaga talavou, o le a avea ma ala e galulue fa'atasi ai i le olaga fa'akerisiano ma fiafia atili ai i le Talalelei, o le fa'aafio fo'i lea o le Agaga Pa'ia i totonu ia i latou ta'ito'atasi ma galulue punoua'i ai i galuega lelei uma.

 

O le so'o ai ma Autalavou a Le'auva'a, o le isi lea fa'atasiga sili ona faigata ona fa'agalo e tupulaga talavou. Na masi'i fa'atasi fo'i lenei aumalaga to'atele ma o latou sui tofia i le laulauatofi a le Autalavou: Peresetene Patele Kolio Etuale; S/Pres: Aitkan; Tres: Athena Mauga [e le'i malaga]; Ipi P. Ieli o le Failautusi Aoao a le Autalavou Pule'aga Samoa Pago Pago.

 

MAUA VAEGA TUPE MAI FDA - MATAGALUEGA O FA'ATO'AGA

 

Mo le matagaluega o fa'ato'aga ua fa'ailoa mai le latou mauaina o se vaega tupe mai le Food & Drugs Administration e $50,000. O lenei vaega tupe ua fa'atulaga mai ina ia faia ai e le Matagaluega o Fa'ato'aga a le tatou malo se suesuega fa'apitoa, e tusa o Polokalama mo le Saogalemu o Mea Tausami a le atunu'u.

 

O lo ua fa'ailoa mai fo'i e le tatou Faipule i le Konekeresi, Aumua Amata, "Ua ou fiafia fo'i e va'ai atu ua maua mai lea vaega tupe a le tatou Matagaluega o Fa'ato'aga ina ia sofa'i le mataupu lea tau le saogalemu o meataumafa i le atunu'u."

 

"O lea ituaiga o fa'atupega ua matele ina ia fa'aaogaina e fa'aleleia atili ai le tautuaina o tatou tagata lautele i Amerika Samoa."

 

Ua fa'afetaia fo'i e Aumua Amata le galuga maeaea a le susuga le fa'atonu Filifa'atali Mike Fuiava ma lana aufaigaluega i a latou galuega tima'i  ma talosaga fo'i sa fa'aulu ina ia mautu mai lea fo'i vaega o le seleni mo lea fa'amoemoe lelei. E le gata i lea ae sa fa'aauau atu lana fa'afetai ia i latou ua fa'amatu'u mai ai lenei vaega tupe, le fa'auluuluga o le FDA le afioga le komesina Dr Scott Gottlieb, lana failautusi Alex Azar mo lana fo'i vaega.

 

MAUA ULUA'I SIAKI FANAU FAIGALUEGA - IULAI 27, 2018

 

Ua fa'aisaisa mai fo'i nai isi matua o le fanau faigaluega i le tu'uaga o a'oga, ina ua fiu fo'i e tatali siaki totogi a latou fanau, na manatu lava latou e maua i le aso Faraile ua te'a.

 

Ua o'o lava fo'i i nai fanau, ua matauina lo latou usupo ma le naunau e oo i falea'oga, ae o le lesona muamua lava fo'i lea e ao ina latou silafia lelei, "E le vave maua se totogi pe a o'o ina amata faigaluega, ma le isi, e faigata le olaga faigaluega pe fiu e fa'atali se totogi."

 

Na faafesili mai nisi i le matou fo'i Ofisa i lea tulaga, ae ua fa'ailoa atu i ai, o lo'o laina tutusa lava fanau o lo'o galulue i le matou fo'i Ofisa ma i latou, e le'i maua lava se siaki mo le fanau.

 

Ua fesiligia fo'i le Ofisa DHR e tusa ma lea tulaga, ae ua fa'ailoa mai, Makerita Enesi, "O le ulua'i totogi o le fanau a'oga lea e auai i le Polokalama o le a maua tonu lava ia Iulai 27, 2018. O le totogi lea e aotelega ai le ulua'i tolu vaiaso o lo'o faigaluega lava i latou mai ia Iulai 3 se'ia o'o mai ia Iulai 25, 2018."

 

E le o se mea fou lea i lenei polokalama, e fa'atali lava tagata faigaluega se'ia mae'a le 4 vaiaso atoatoa po'o le sili atu fo'i, fa'ato'a maua latou siaki. E toatele fanau talavou sa o ane i le EOB ma tatalia ai le maua o latou siaki i le aso Faraile ua te'a, peita'i na toe tu'ua lava le fale ina ua maea le 8 - 4 itula o tatali ae tu'u ane le tali i fanau, ua le maua ane i lea aso latou totogi.

 

Sa fa'ailoa mai fo'i e le DHR na fa'ailoa uma lava i supavaisa o siaki totogi o le fanau faigaluega e fa'ato'a mautinoa le maua tonu ia Iulai 27, 2018. I lenei tausaga e 805 le fanau ua fa'afaigluegaina i le polokalama.