SAILIGA KOMITI ATINA'E - $172,208 MAUA "PO O MATAGALUEGA"

Ua fa'ailoa mai le aotelega le tumau o le seleni ua mae'a aoina mai le vasega o matagaluega ta'itasi a le Ekalesia Aoao a le EFKAS. Na fa'ato'a amatalia lea fa'amoemoe i le afiafi ina ua afa le ono, ma sa va'aia fo'i le lotulotu atu o sui o matagaluega ta'itasi ina ia fa'aulu a latou seleni e tatala ai latou siva, ma toe talia fo'i meaalofa e lafoina i le fola, po'o le fa'aulu fo'i i le laulau se foa'i e tusia ai lou lava suafa.

Na aofia fa'atasi usofono, le vasega o fa'afeagaiga ma faletua i totonu o Matagaluega ta'itasi, ae maise o aiga, uo ma e masani ua latou mautinoa e faia lenei sailigatupe a le Komiti o Atina'e, e tua i ai le EFKAS i ana galuega atina'e.

E 11 siva iloga na tolaulauina, peita'i, na fa'alauiloa ai fo'i ma le siva a le Komiti o Atina'e, lona uiga o le nofo a matagaluega a le Ekalesia e sefulu lava, e afua mai le Manu'atele, lea sa lona sefulu i ai siva na fa'atulaga i lea po, ae 11 ai le siva a le falelima i sasa'e.

O le a toe maua mai se tala i le aofa'iga o foa'i a matagaluega ta'itasi, peita'i i le taimi nei ua na'o le aotelega o le aofa'i ua fa'amautu mai.

$5,000 MAI LE RADIOTHON - HANDBALL MO LE YOUTH OLIMIPEKA

Ua mae'a le taumafaiga a le Radiothon a le U18 Girls Handball Team a Amerika Samoa lea sa fa'atautaia feso'ota'i ma le KHJ/V103 peita'i, ua aga atu i latou ina ia fa'alauiloa le latou Koneseti Fa'aauro i le afiafi o le aso Faraile nei, i le Maliu Mai Beach Resort.

"O lenei fa'amoemoe, e fa'afetaia lava le aao fo'i o le mamalu lautele ua mae'a foa'i mo i matou, e le gata i aiga, o sui ta'ito'atasi, ae fa'apena fo'i le mamalu o le au faipisinisi ma ekalesia. Fa'afetai i lo outou fai fanau, lo outou agaga i le taumafaiga pe tua ma ni a se 'ai o Amerika Samoa e ala i lenei fa'agatama o le handball. E mafanafana le lagona, e manuia lava faiva tapua'i e le atunu'u atoa. Ae paga lea, e ao lava ina lava tapena mo le fa'amoemoe e koleni ma fa'amasani tino o alo o Amerika Samoa a'o le'i to'ai taunu'u i Buenos Aires,” o se tala lea a le ali'i peresetene o le Asosi Handball a Amerika Samoa, Carl Floor Sr.

O le aumalaga lenei e fa'amoemoe e fa'atauva ma le 'au a tama'ita'i USA lea ua mae'a fili i le ta'amilosaga Handball i Kalefonia i le latou malaga lenei, o se mea lelei lea mo i latou aua o lo'o aga'i atu fo'i i luga le latou taumafai ma e ta'a'alo le to'atele o nei tama'ita'i Samoa i le a'u Handball a Tamata'ita'i matutua e a o'o ina mae'a lenei ta'amilosaga a le Youth Olmipeka o le a tauva ai 2018.

Ua i ai fa'asalalauga o le a fa'alauiloa atu ai le Koneseti lea ua mae'a fa'atulaga i le Maliu Mai. O iina fo'i ua lava saunia ai tama'ita'i uma o le 'au Handball e feiloa'i ma outou uma o le a auai atu mo lea fa'amoemoe.

O le latou o'o ane i lea afiafi, ua fa'ailoa mai, "O se latou fa'afetai aloaia lea i tagata uma sa fesoasoani ma foa'i mo le latou fa'amoemoe. E ui fo'i ina mamao le ala i le Auro, ae i ai lava le taimi e gafatia ai pe a loto gatasi ma tapua'ia o latou faiva i malae,” o se tala lea a Floor o ia fo'i o le faia'oga i lea fa'agatama ma e malaga ma le 'au masi'i lenei.

Ina ua mae'a le Leitiofoni, peita'i ua o'o le ali'i faipisinisi lautogia o le atunu'u na matua masi'i atu e maimoa i le a'u Handball a'o koleni, ma fa'ao'o atu lana fo'ai na ofoina atu.

O ia na suia atu le Dream Builders ma le susuga Alexander Jennings, faipule o Swains, ma lana foa'i.

O le Dream Builders gaosia mai le falaoamata mai le Ulu, sa ia fa'ao'o le teutusi ma lana meaalofa e $1800. Patipatia lea foa'i tele e le 'au masi'i ma ua fa'ao'o fo'i le fa'afetai i lea faipisinisi fou i le atunu'u, ae tetele mea ua ia taumafai i ai. Ia saga fa'amanuia fo'i le Atua i lona soifua sogasoga e saili mea lelei, e tua fo'i i ai le atunu'u i lana taumafaiga.

I le aso Gafua a sau nei, o le a toe faia ai le latou Talotaloga mo sau foa'i ina ia mafai ona lava le latou tapenaga e tausia lelei ai i latou totogia mea e nonofo ai ao ta'a'alo fa'atauva i Kalefonia ma Niu Ioka a'o le'i malaga i latou i Buenos Aires.

A maua sou avanoa sapai le tatou 'au ta'a'alo muamua lea ua maua fo'i le avanoa e malaga ai e ta'a'alo mo se tatou 'ai mai le Youth Olympics a le lalolagi.

FA'AAUAU LE POLOKALAMA FAITAU TUSI I AFONOTELE

O le polokalama Faitau Tusi mo lenei tu'uaga umi a le fanau ua fa'atautaia lea e le Aoelua SIsters i Afonotele ma ua matua fa'afiafiaina ai le to'atele o fanauiti o lo'o taumafai ona a'oa'o le faitau ma le malamalama lelei i le gagana peretania.

O lenei fa'amoemoe na laga lava i le auuso lenei ma amatalia i le Tu'uaga umi o a'oga i le tausaga ua te'a i le afioaga o Nuuuli i le fale talimalo o Fanene. O le latou fa'anaunauga lea sa i ai, ina ia fa'atautaia lea polokalama i Afontele i lenei tausaga, ma ua fa'afetai, ua fa'ataunu'uina lea vaega o le miti.

O le aso Gafua na te'a nei sa amatalia ai loa le polokalama faitau tusi lenei a le Au Uso Aoelua, ma ua fa'ailoa mai e se tasi o matua, "O le polokalama faitau tusi e ao lava ina faia i tu'uaga umi nei o le tausaga, e faaleleia atili ai le malamalama o tamaiti i le faitau ma le malamalama i tala o faitauina i le gagana peretania. E o'o fo'i i le fa'asamoa, ua mana'omia fo'i lea lava a'oa'oga ina ia fa'amalosia ai fanau e fiafia e faitau. Ua le toe faia fo'i faitauga Tusi Pa'ia a faife'au e pei ona masani ai i tatou matua i la vaitau, ua tatau ai ona fa'aoso i le vaitaimi lenei e le polokalama fou lea ua fa'aa'e mai nei."

O lenei fa'amoemoe ua matua mafuli fo'i le matagaluega o A'oga a le tatou malo ina ia taumafai atili e fa'aleleia le faitau ma le malamalama lelei o fanau i uiga o tala o latou faitaua i le gagana peretania, atoa ai ma le fa'aleleia fo'i o le faitau ma iloa tautala ma tusitusi i le gagana Samoa ma le gagana Peretania.

E tolu aso o le vaiaso e fa'atautaia ai faitauga tusi nei i Afonotele ae o le a fa'ato'a fa'amuta lava lea polokalama i le aso 17 o Aukuso.