Ads by Google Ads by Google

Tala I Vaifanua


O le tama’ita’i Samoa o Elysha Lalau Samatua talia lona pale ma lona tusi pasi e avea ma “Tausala Lalelei Fa’avaomalo a Dixie University 2019-2020” mai le tama’ita’i sa avea lea tofi i le mae’a o le tauvaga sa fa’atautaia ia Novema 21, 2019. [ata foa’i]

TAMAITAI SAMOA - ELYSHA LALAU SAMATUA - MISS DIXIE STATE UNIVERSITY

 

Ua pale le tama’ita’i mai Amerika Samoa o lo’o a’oga i le Dixie State University i le “Tausala Lalelei Fa’avaomalo a Dixie State University 2019-2020.” O ia lea o Elysha Lalau Samatua mai le afio’aga o Vaitogi, ma o se tasi o le Autalavou a le Seventh Day Adventist Church i Vaitogi.

 

E to’a 9 o tausala lalelei sa tauva ia Novema 21, 2019. O atunu’u sa tauva nisi o latou tausala e aofia ai: Amerika Samoa, Nigeria, Spain, Japan, Canada, Peru ma Brazil.

 

Fa’aalia e Elysha, “O lenei tauvaga ua o’o ai fo’i i lea ituaiga lagona. Ua fa’afetaia lava le fa’alogologo atu i so’o se taimi o pepese mai ma vala’au fa’amalosi mai le matou kalapu o fanau a’oga uma mai Amerika Samoa i le DSU, e le motu ai le manatu, o lo’o i ai ou uso ma tuagane i le matou fa’amoemoe. Ua mafanafana ai le lagona e fa’aosofia e faia le mea sili mo lea fo’i taumafaiga.”

 

E tolu lava vaega o le Tauvaga Tausala. O se vaega o lau aganu’u e te fa’aalia taleni ma le La’ei Fa’aleaganu’u a lou atunu’u ma tali ai le fesili o le a fesiligia mai ai oe i lea afiafi a tamali’i.

 

Mo Elysha, sa ia fa’alauiloa aloa’ia ai le Puletasi Fa’asamoa, ma faaalia ai loa lana Siva Samoa o le Taualuga. O le taleni, o ituaiga siva e tolu e mafai ona sausaunoa ai o ia. O le Hula Fa’a-Hawaii, Siva Fa’a-Maori ma le Siva Samoa.

 

O la’ei ma teuga na faia mo ona la’ei fa’asamoa, sa lafo atu e si ona tama lana ula nifo ma le ie e su’i ai lona la’ei e faia ai lana taleni. O lana puletasi na siva ai lana siva Samoa, na alu atu ma ia i le Iunivesite o le toniga a le latou aiga. O lona Ofu lea sa la’ei i lona vala’aulia mamalu, o lana Puletasi lea sa la’ei i lona fa’au’uga i le ASCC i le tausaga ua te’a. O isi ana teuga sa fesoasoani i ai ai ana uo o lo’o latou fa’atasi i Utah, Simaotua Tuia, o ia e faia ana sei Samoa ma fa’atau atu, lea ua muamua ona seia nei sei ae le’i ave e fa’atau atu.

 

I lana tapenaga ina ia maua le manumalo sa ia to’a lava ina ua fesiligia o ia mo sana tali, “Po’o se isi e sili atu ona a’afia ai lona tagata talavou, e ese mai lona aiga i ona matua ma uso ma tuagane?”

 

O le tali, “E sili ona tele le aafiaga o a’u mai le Atua nai lo se isi lava mea. Aisea? Aua o ia e ona mea uma, o ia e fo’i ou te maua mai ai le fesoasoani i so’o se taimi. O ia o le fesoasoani sili lea i taimi fita, ae maise o le motusia ai o le mafutaga i totonu o le aiga ma matua ma aiga.”

 

O le tali lena sa ia mautinoa ai lava, ua ia manumalo i le tauvaga. Peita’i, e le’i uma lelei lana tali lea, ae ua le mafai tatali le maligi o ona loimata, “Ua ou lagona lava le pa’i mai o le Agaga o le Atua ia te a’u ma la’u taumafaiga, ae ua o’o fa’atasi mai ma le lagona o’otia o le misia o matua ma lo’u aiga, i nei mea uma.”

 

O Elysha, o se alo e fa’asino i le tama o Barritt ma Eseta Samatua mai Vaitogi. Na fa’au’u mai o ia i Iakina Academy ia Iuni 2016, ae fa’au’u i le Kolisi Tuufaatasi a Amerika Samoa i le  2018 ma togisilia i lana lea kosi o le

 

O le fa’ailoga tupe e $1,000. ua taua’aoina nei mo le taumafaiga, ua ia fa’ailoa mai, “Ua fesoasoani atili i pili totogi ina ia le poloka le taumafaiga, ae le galo ai ia te a’u le fesoasoani tele a la’u kalapu o tamaiti Samoa uma lava o lo’o matou nopia’i ai i taumafaiga e saili le atamai i le matou nei Iunivesite, fa’afetai mo le sapaia o a’u, ma o lea fo’i po, ua iloa e tagata uma, ua i ai Samoa i totonu o le tauvaga. O le matua’i lelei lava o le latou sapaiga o le taumafaiga vaivai, ma ua i’u ai i le manuia. Fa’afetai ma vi’ia ai le Atua.”

 

FA’AMALOSIA ATILI AIAIGA O E ULUFALE MAI I AMERIKA SAMOA

 

Ona ua fa’atetele lava le pepesi ma ua to’atele na’ua le aofai o fanau iti fa’apea ma tagata matutua ua maliliu ai e afua i le Misela o lo’o sasao nei i Samoa, o lea ua matua atili ai ona fa’amalosia aiaiga mo i latou e malaga mai Samoa i Amerika Samoa nei. O le Tui lava ia e ao ina faia le tui ma malaga mai i Amerika Samoa a’o le’i mae’a le 14 o aso.

 

Ua fa’ailoa mai fo’i e le ali’i foma’i o fa’ama’i pepesi ma latou faamaumauga, Dr Aifili John Tufa, “Mai le 55 ua  i ai nei le aofa’i o maliu i Samoa ona o le ma’i o le misela e to’a 48 o i latou o fanauiti e i le va o le 0-5 tausaga le matutua.

 

I le aso ananafi ua si’isi’i lava le aofai 3881, ma o lona uiga o lo’o malosi lava le pepesi o le misela I Samoa, ma o le ala fo’i lea o le a faaauau ai pea ona fa’amalosia le va’ava’aia toto’a o le gasolo mai o tatou tagata femalaga’i i lo tatou va, ina ia le aafia i tatou i’inei i lea pepesi mai o le misela.

 

E le o fa’avaivai ai le molita’i atu i talosaga e le to’atele o i latou uma o lo’o i ai aiga i Samoa, ona o lenei fa’ama’i, e le o se mea fou i Samoa, ae ua fou le maliliu ai o le to’atele o fanau i lenei tausaga.

 

Ua tele malo o le lalolagi ua auina atu fesoasoani i le malo o Samoa ona o le pepesi o le misela.

 

Ua fa’ailoa mai e to’atele fo’i nisi o malo ua fa’auia mai a latou fesoasoani tupe, ina ia fa’atauina ai tui e tatau ona fa’aaogaina i le taimi nei i le to’atele o fanau e le’i fai ni tui puipuia o le misela.

 

TU’U MALO SAMOA MUAMUA AVEA MA FA’ATONU LOTOIFALE FAA

 

O le susuga ia Sa’u Smitty Lutu, le ulua’i fa’atonu Samoa o le Ofisa fa’alotoifale o le Federal Aviation Administration (FAA), na maliu filemu o ia i lona aiga i Iliili i le aso Tofi o le vaiaso na te’a. Ua atoa le 74 tausaga o lona soifua, ma ua atoa fo’i le 45 tausaga o lana tautua matavela i le FAA i le teritori.  Mai lea tele o tausaga o lana tautua lea, e 17 lava tausaga latou o avea ai o ia ma Fa’atonu o le FAA i’inei.

 

E tele ni fa’ailoga na maua e Sa’u Smitty Lutu i lona tula’i mai i lana galuega lenei, e o’o lava fo’i i le “fa’ailoga fa’apitoa mo le tagata faigaluega i le tausaga atoa i le Pulega.” Na ia maua fo’i le fa’ailoga mo le tagata lelei i le fa’aaogaina o masini o galulue ai, maua fo’i ma le fa’ailoga i se tasi e sili ona galue saogalemu i le latou aufaigaluega uma, ma e mataituina fo’i le agava’a tele o ia i ala o feso’ota’iga ma pisinisi.

 

A’o le’i faigaluega o ia i le FAA, sa mua’i faigaluega i nisi o ofisa a le malo o Amerika Samoa, e aofia ai le ASPA, ma o se fai pisinisi. O ia lea o lo’o i ai lona sao fa’apa’aga i le fa’atula’ia o le South Seas Boradcasting Inc: 93KHJ, V103, The Beat & Island Television.

 

FOA’I AASU & AOLOAU - FA’AMAMA I LE ASO FA’AFETAI $432.50

 

Mai le agaga o le fa’afetaia ua fa’ailoa atu ai e le Autalavou a le SIDAC-AS mai Leone le latou fa’afetai tele i le a’ao foa’i o Aiga uma sa tali ane i le latou sailiga tupe na savalia ai le afio’aga o Aasu ma Aoloau i le latou fa’amama.

 

“O le aotelega o le foa’i na taua’aoina mai e le pa’ia maualuga o Aiga i le afio’aga o Aasu ma Aoloau e $432.50 ma e avatu ai le agaga fa’afetai i lo outou manatu i le taumafaiga a le Autalavou ona o fonotaga e fa’atasia lea i Kalefonia ia Iuni 2020, lea ua mafuli ai i latou e sailia i ala o se galuega faamama e faia, ae talia ai le fesoasoani ma le a’ao foa’i,” o se tala lea a ali’i ta’ita’i o le Autalavou Asuelu Lemaota ma La’auli Tuitea.

 

“Ona o le matou ekalesia fo’i e le faia ni ta’aloga faitupe, ae fa’amoemoe i mea fa’atau atu, pe ole totogia ae faia galuega e mana’omia e aiga ona faia.”