Ads by Google Ads by Google

Tala I Vaifanua

ASO MALOLO ASO-FA’AFETAI - THANKSGIVING

 

O le aso taeao, aso Tofi, e fa’amanatuina ai le Thanksgiving - Aso Fa’afetai - i Amerika Samoa, ma Amerika atoa. Ma o le aso malolo foi lea a le fetarale ae maise Amerika Samoa, ma o le a tapunia ai ofisa uma o le malo ae maise le tele o pisinisi i le atunu’u.

 

O le aso Faraile, e toe tatala ai pisinisi ae maise ofisa o le malo, ae leai ni aoga i lea aso. Ua fa’ailoa mai e le kamupani a le StarKist Samoa, e malolo galuega i le aso Tofi ma le Aso Faraile ae toe amata i le aso Gafua o lo’o muamua.

 

O le a leai se lomiga o le Samoa News i le aso Tofi ma le aso Faraile se ia toe aulia le aso Gafua, Tesema 2.

 

Mai le puleaga a le Samoa News, ae maise le aufaigaluega, ia Manuia le Aso Fa’afetai ia Amerika Samoa.

 

TAUA’AO MEAALOFA A LE HOMELAND SECURITY I LE HOPE HOUSE:

 

Ua fa’amanuiaina le Hope House i Fatuoaiga se alagatupe e ala mai le US Department of Homeland Security, lea sa fa’ailoa mai e ofoina mo se Sosaiete po’o se fa’alapotopotoga e le faia ina ia maua ai se tupe faasili.

 

O le taeao o le aso Gafua na mafai ai ona auai fa’atasi le afioga le Epikopo Peter Brown ma le ta’ita’ifono o le Komiti Fa’afoe o le Hope House, Faipule Larry Sanitoa e talia lea tupe taua mo le nofoaga e tausia fa’apitoa ai e mama’i tumau i le tino ma le mafaufau, ae maise fo’i e tausia fa’apitoa ai Matua Matutua ua faigata ona toe tausia i tua i aiga.

 

O le tama’ita’i o Lisa Tuatoo o le Amerika Samoa Homeland Security, sa ia fa’ao’o ane lea siaki mo le Hope House, ae o lo’o maimoa fo’i le to’atele o i latou o lo’o tausia fa’apitoa i lea nofoaga, fa’apea ma le aufaigaluega.

 

O le afioga le Epikopo sa ia saunoa e fa’afetaia le foa’i taua, ma sa ia fa’ailoa fo’i i le agaga moni o le fa’afetai i lenei tausaga.

 

O le tinotitupe lenei o le a fa’aaogaina e fa’atula’ia ai mea pu’e ata ma sailini fa’ailo pe afai e osofa’ia lea nofoaga e se tasi.

 

O lenei galuega fa’aleleia, e mafai ai ona agava’a le nofoaga lea mo le fa’atupega a le Medicaid pe a pasia mai e le CMS. Ua le fa’ailoaina le aotelega o lea foa’i, ona o le a tauofo le galuega lenei e ala i talosaga uma e fa’au’u i le Matagaluega o Oloa a le Malo, ma fa’apea fo’i ona piki atu iina le Kamupani e fa’atinoa lea galuega mo le Hope House.

 

O le tausaga lona lua lenei ua maua ai e le Honeland Security lenei ituaiga o fa’atupega ma o le tausaga ua te’a na maua ai e le Boys and Girls Club i Amerika Samoa.

 

MANATUA: GASOLO I LE OFISA FOOD STAMP MO TALOSAGA O LE AFA O GITA

 

O lo’o i ai lava nisi ua manatu i latou ua le mafai ona toe maua ni avanoa e fa’atutumu ai pepa talosaga mo pepa ‘ai aua sa afaina i latou i le Afa o Gita i le tatou nei malo. Peita’i o lo’o ua fa’ailoa mai, e leai o lo’o tatala lava le avanoa mo lea fo’i alamanuia.

 

“Afai e le’i fa’atumua sau pepa talosaga, o lo’o ua i ai le laulau i totonu o le Ofisa autu o le Food Stamp i Utulei, o lo’o gasolo atu i ai i tatou e fa’atutumu ai nei talosaga,” o se tala mai lea a se tasi o i la’ua o lo’o faia lea tiute i le Ofisa o le Food Stamp.

 

Manatua o le aso fa’amae’a ai talosaga o lenei alamanuia e muta lava ia Oketopa 31, 2020.

 

Afai fo’i e maua lau masina nei, po’o Tesema 2019, e fa’asolo atu lava ona e mauaina lea alamanuia mo le tausaga atoa lava. O lona uiga ua foliga mai lava ua e mauaina le food stamp, peita’i e muta loa fo’i lea alamanuia ia Setema 30, 2020.