UMI NA MOTUSIA ELETISE VAEGA SISIFO O TUTUILA

O le motusia o le eletise mai le itu i sisifo o Tutuila, lea na afua mai Lepuapua seia o’o i Fagamalo, i le vaveao o le aso sa ua te’a, e tele mea ua mafua ai, ma ua le ma’alofia fo’i ona motusia le eletise mo lea taimi umi, na toetoe atoa le 24itula o pe le eletise.

O le leaga, ona ua motusia le eletise, ae le ola ai ma le suavai i paipa vai mo afio’aga uma nei, ona ua le ola ai pamu vai i le motusia o le eletise.

O nisi fo’i o vaega o le itumalo o Tualauta sa a’afia ma motusia le eletise mo le silia ma le 12itula e aofia ai Ottoville, Fogagogo ma isi vaega o le Tualauta.

Ua fa’ailoa mai e le ali’i Pule Sili o le ASPA, Wallon Young, “E fa’amalulu atu i le atunu’u, ae masie i vaega nei na umi ona motusia le eletise, ona ua le ma’alofia lava lea tulaga, aua ua fa’aleagaina tonu le Sootaga o laina e feso’ota’i tonu ai le vaega o afi moli e sapalai ai le eletise i Tafuna ma le Sapalai o le Eletise ua fa’atuina i Satala.

Na amata motusia mai i le itula e 1:15 i le vaveao o le aso Sa ma ua fa’ato’a ola i le taeao o le aso Lua i le tele o vaega i le itu i sisifo o Tutuila.

“E ese mai lea fo’i ua atili ona umi lea motusaga o le eletise i lea itu o le motu, ona ua vaivai fo’i le sapalai o le eletise, ua gafatia ona maua le 3.0mw. Ua le lava afi moli i Tafuna e mafai ai ona maua le malosi’aga mana’omia o le eletise mo lea vaega lava o le motu. E afua le lava o afi, ona o lo ua fa’agasolo nei le toe siakiga ma fa’afouga lelei o afi moli i Tafuna ina ia soloa’i atu ona fa’atutu afi fou, ae tuu ese mai afi ua tuai.”

E tolu lelei afi ua faatulaga e ao ina fa’aaoga pe a mae’a fa’atutuina ma e maua ai le malosiaga e 3.0mw, ma isi afi caterpillar e lua e mafai ona maua ai le malosi’aga e 1.5mw i le afi e tasi, ma e mae’a lelei lea galuega i le masina fou i le lotoa i Tafuna lava.

Fa’aalia e  Young, “O lo’o galulue punoua’i lava le aufaigaluega a le ASPA ina ia mautinoa ua mae’a siakia ma suia le isi ono o totoga ua fa’aleagaina i uaea eletise, ma ua fa’ato’a mae’a lea galuega i le itula e 3:00 i le vaveao o le aso Lua.”

Na fa’ato’a mafai ona fa’aaoga ma ola lelei le laina o le so’otaga i le va o faleeletise e lua, Tafuna ma Satala i le itula e 4:00 i le taeao.

LE TOE FA’AFOUINA KONEKARATE PULESILI OFISA TURISI

Ua le fa’afouina e le Komiti Fa’afoe o le Ofisa o Turisi (American Samoa Visitors Bureau) le konekarate a le pulesili o lea ofisa, le susuga ia David Vaeafe.

O se fa’amatalaga lea a Vaeafe e pei ona fesiligia e le Samoa News, i lona tulaga fa’ataitai i lea vaega o le malo.

O lea komiti fa’afoe o lo’o avea ai le sui failautusi o Mataupu Tausaga, Malemo Tausaga, ma taitai fono. O isi sui o le komiti e aofia ai Poe Mageo; Paula Stevenson-McDonald; Tuli Fruean; ma Uili Leauanae

I le taimi o le iloiloina o le tupe fa’asoasoa o le tausaga tupe 2020 i le masina ua te’a, sa fesiligia ai e le Fono Faitulafono le konekarate, ae saunoa Vaeafe o lo’o fa’atalia le fa’aiuga o le fa’afouina o lana konekarate.

Ua tusa ma le 10 tausaga o avea Vaeafe ma taitai o lea vaega o le malo talu mai ona fa’atulafonoina le fa’avaeina o lea ofisa.

Fa’ailoa e Vaeafe o le suiga ua faia e le Komiti Fa’afoe e agai ai lea vaega o le malo i se auala fou.

Sa ia fa’ailoa le tele o tulaga lelei oloa i le teritory talu mai le 10 tausaga ua te’a, ma i le lenei 10 tausaga sa pisi lea vaega o le malo i le fa’alauaitele o Amerika Samoa i atunu’u i fafo.

O le vaiaso lenei e tuua ai e Vaeafe ia Amerika Samoa, ae toe taliu atu i Niu Sila ma lona aiga.

I le taimi nei, ua fesoasoani le tama’ita’i o Taimalelagi Minnie Tuia i lea ofisa o le malo ma le fa’amoemoe e sailia se taitai tumau i se taimi o i luma. Ma o le a fa’asalalauina foi lea fuafuaga.

O le a galulue fa’atasi Taimalelagi ma le sui pule sili o lea ofisa, Vaitoa Hans Langkilde, mo le fa’atulagaina o polokalama a lea ofisa aua le agai i luma.

O Taimalelagi e galue tumau i le Ofisa o le Kovana, o le deputy chief of staff.

O le aso ananafi sa fa’atulaga e faia ai le fonotaga mulimuli a Vaeafe ma totino o le Komiti Fa’afoe a le vaega o Turisi.