FA’ALAUILOA E KOVANA - UA OO MAI LE MISELA I AMERIKA SAMOA:

O le taeao o le aso Lulu na o’o atu ai sui mamalu o le Matagaluega o le Soifua Maloloina i le Ofisa o le Kovana Sili Lolo Moliga, ina ia fa’ailoa ia te ia, le fa’auluuluga o le tatou Malo, ua fa’amaonia ua o’o mi le Misela i o tatou laufanua ma soifuaga o tatou tagata lautele.

Ina ua mautinoa ua fa’amaonia e i latou le maua o nisi o le fanau ua fa’ao’o ane i le falema’i i le misela, ma ua le manatu ai i latou ia le toe taofiofia le faasalalauina fa’alaua’itele o le o’o mai o le Misela i Amerika Samoa.

Ina ia tausisia le televave mai o le to’atele e a’afia i le Misela, ua fa’atulaga ai le siakiga o tagata femalaga’i i le va o Amerika Samoa ma isi malo tuaoi lea e masani ona femalaga’i mai ai tagata i totonu o Amerika Samoa ma malaga atu fo’i i ai o tatou tagata o iinei.

E ao ina toe tapena matua uma i tui puipuia o le fanau o lo’o fia malaga i fafo, aua o lo ua suesueina fo’i lea tulaga mo i latou uma o lo ua ulufale mai i le tatou Malo mai le Malaeva’alele ma le Uafu fo’i i Fagatogo.

I nisi o i latou mai le Ofisa o Femalaga’iga ma le vaega a le Public Health ua tiute nei i le malae va’alele e fa’aulufale mai i latou e malaga mai Samoa ma Tonga i aso ta’itasi, ma ua taumafai i latou e fa’amalosia le tulafono ua fa’ataoto nei ma ua fa’amalosia e le Matagaluega o le Soifua Maloloina, e taofia uma ai le fanau ua taumafai e ulufale mai ae leai se pepa tui ua umia e fa’ailoa ai ua mae’a faia o latou tui puipuia mo le misela.

Pe afai o le a leai se pepa tui e fa’ailoa ai ua mae’a faia lona tui puipuia lea, o le a toe fa’afo’ia i latou i le va’alele ma toe taliu atu i le malo na e sau ai. Pe afai fo’i o le a fuafua malaga nisi o le tatou malo e malaga atu i fafo, e ao ina tapena fo’i e i latou pepa tui o le fanau ina ia mautinoa e le fa’apo’ia fo’i i tulafono a malo tuaoi, i taumafaiga lava e tasi, ia mautinoa ua mae’a faia tui puipuia o le Misela.

O le fa’amalosia o nei tulafono mo i latou e ulufale mai ma tu’ua le tatou atunu’u, ua fa’amalosia uma lava i o tatou malae va’alele ma uafu o va’a fagota ma uafu laiti fa’apea ma le uafu tele. O le umi o lea fa’amalosiga o nei tulafono i le ulufale mai i Amerika Samoa ma suesuega, ua fa’atulaga mo le 30 aso, peita’i afai e toe fa’atalosagaina se isi soso’oga o lea taimi e fa’atulaga, e mafai pe afai o le a toe feutaga’i le Fa’atonu o le Matagaluega o le Soifua Maloloina ma le tatou Kovana Sili mo lea talosaga.

I le fa’amatalaga a Kovana Lolo Moliga e tusa ai o lona tamauina o lea fa’amalosiga o tulafono e taofiofi ai le so’ona pepesi tele o le Misela i Amerika Samoa nei, sa ia fa’ailoa ai, “Ua fa’amaonia le i ai o gasegase ua a’afia i le Misela i Samoa, Tonga, Fiti, Niu Sila ma Ausetalia, ma e matua tele lava le so’otaga o Amerika Samoa ma nei malo uma i aso ta’itasi o le vaiaso. E le misia se vaiaso ma o tatou tagata e malaga atu i nei malo, ma i latou fo’i mai na malo e malaga mai i lo tatou malo.”

Ua fa’ailoa mai, na umi se taimi e le o maua le misela i o tatou laufanua ma o tatou tagata, e mafua lea ona o lo’o fa’aauau pea lava ona faia tui puipuia o fanau i le misela ma isi ma’i uma lava o lo’o fa’asolo ai tuiga a le fanauiti se’ia o’o ina ulufale i a’oga maualuluga.

Peita’i, ua mafua lenei gaoioiga fa’amalosi ina ia va’ai toto’a i e fegasoloa’i i le va o Amerika Samoa ma isi malo tuaoi, ona o le manatu, afai ae ova pepesi le fa’ama’i lea i le atunu’u, e tauau e le lava le aofai o le vaila’au mo tui puipuia e ao ina fa’ao’o i fanau ma tagata matutua fo’i o le a toe a’afia i le Misela i lenei vaitau, aua ua tau fai pepese lenei gasegase i malo tuaoi uma lava o Amerika Samoa.

FAIA TUI PUIPUIA O LE MISELA MO FANAU A’OGA - O LE ALA E TOGAFITIA AI LE MISELA:

Ua faailoa mai e le Matagaluega o le Soifua Maloloina, o le Tui Puipuia o le Misela ua mafai nei ona faia e le latou matagaluega, o se vaifofo sili lea ua mafai ona tu’ufaatasia mo le fanau talavou e gafatia ai e latou tino ona fete’ena’i ma le gasegase o le Misela.

Ua mae’a fa’alauiloa atu nei i matua o fanauiti ma fanau talavou i a’oga, ina ia mataituina tui puipuia nei MMR pe ua faia o fanau, ae fa’ao’o mai fanau i so’o se falema’i fa’aitumalo ma Faga’alu fo’i ina ia faia nei tui puipuia. O i latou fo’i o fa’aolioli malaga ese atu mai le atunu’u, ia mautinoa ua taulimaina pepa tui o fanau po’o se tusi mai le foma’i e fa’ailoa ai ua mae’a faia tui puipuia o lau fanau, ina ia mautinoa e gafatia ona ulufale i latou i malo o malaga atu i ai.

Ua fa’ailoa fo’i e le ali’i Foma’i Fa’apitoa mo Ma’i Pepesi fa’apenei Dr Aifili John Tufa, ua ia fa’ailoa mai, “E le’i i ai lava se gasegase ua fa’ao’o mai i le tatou falema’i e iloga ai ua maua se tamaititi i le Misela, ua na’o i latou na ulufale mai ae ua mae’a tau maua i le misela ma ua i’u ina sasao mai le misela ma ua fa’ao’o mai ai i le tatou falema’i nei. Ae o le fa’amalosiga o nei tulafono e taofiofi ai le so’ona pepesi mai o le Misela i le atunu’u, ua alagatatau ona faia, ina ia puipuia se pepesiga tele o lea fa’ama’i i le atunu’u, ma i’u ai ina faigata ona toe togafitia i o tatou falema’i. Ae o le avanoa lelei fo’i e fa’amalosia ai matua ina ia vave faia tui puipuia o fanau, a pepesi mai ai le Misela, ae ua lava tapena fanau ua mae’a i ai o latou tui e puipuia ai.”

Ua tatala falema’i uma i Tafuna ma Faga’alu mai le 8pm Aso Gafua seia oo i le aso Faraile, ma ua o’o fo’i i le aso To’ona’i ua tatala falema’i fa’aitumalo, e fa’ato’a tapunia lava i le 6:00 i le afiafi.

Ua fa’ailoa mai e le susuga le Pule o le Ofisa o Femalagaiga Peseta Dennis Lutu na ia faailoa ai, “Ua i ai pemita ua toe taofia mai le taua’aoina atu i e na talosagaina i le aso Lulu ma le aso Tofi ina ua fa’amalosia tulafono nei o le ulufale mai i Amerika Samoa nei, o le fa’amoemoe e ao ina fa’ailoa ia i latou na, e tatau ona mataituina le suiga ua fa’amalosia nei e le Matagaluega o le Soifua Maloloina mo i latou uma e fia ulufale mai.”

Ua fa’aopoopo nei fo’i la le isi vaega o pepa e tatau ona umia e le sui o talosagaina le pemita mo e fia ulufale mai i le atunu’u, e tatau ona aofia ai ma le tusi mai le foma’i o lo’o maloloina oe e te le o maua i le Misela, pe taua’aoina fo’i kopi o pepa tui o fanauiti ma fanau talavou o fia ulufale mai.

Ua fa’ailoa mai fo’i e Peseta Dennis Lutu, “Ua matou feso’ota’i atu fo’i i le susuga le Konesula o Samoa i le tatou nei malo, Manogiamanu Ioane, ina ia galulue fa’atasi ma i matou se’i fa’afaigofie ai feso’ota’iga ma i latou o lo’o fia ulufale mai i Amerika Samoa.”

O le pasese lea na ulufale mai ma le va’a MV Lady Naomi i le taeao ananafi, ua mae’a silafia uma e i latou, e malaga mai i latou ma latou pepa tui po’o latou tusi fa’amaonia mai foma’i e le o maua i latou i le misela.

Ua fa’ailoa mai fo’i e le Samoa Airways po’o le Ofisa Va’alele a le Polenisia lea sa masani ai i tatou i le taimi ua tuana’i, fa’atasi ai ma le Talofa Airways, le susuga Tone Tamali’i, ua mae’a fa’ao’o atu le fa’alauiloaga o nei mea e mana’omia mo pasese uma e fia ulufale mai i a latou malaga o nei aso talu mai le taeao o le aso Lulu na te’a nei.

Ua fa’ailoa mai e sui iloga nei o Kamupani Va’alele nei e lua, “Ua toe tu’u atu i tua taimi e tu’uva’a ese mai ai va’alele mai Samoa ona o lenei fa’amalosiga o pepa tui po’o tusi mai foma’i ona o le poloaiga ua fa’amalosia nei. E ui lava ina faigata mo pisinisi, ae o le va fealoa’i i ala e saogalemu ai tagata uma i malo na lua, e ao ina usita’ia ma fa’amautuina atili.