Ads by Google Ads by Google

Tala I Vaifanua


[ata: foa'i]

POLOKETI SOLAR & ELETISE MAI LE MATAGI - FA’ATAUTAIA MAI MAOTA FOU

 

E lua poloketi tetele a le ASPA ua amataina nei i lona tau aofaia e tusa ma le$150 miliona.

 

O le poloketi muamua o le 20megawatt Solar Photovoltic, lea o le a fa’atula’ia ona panele mo le mitia o ave malolosi o le la i eleele e soso’o ma le Veteran’s Memorial Stadium i lona tau e $42 miiiona.

 

O le poloketi lona lua mo le sapalaia lava o le eletise mo le atunu’u e fa’aaogaina ai le Malosi’aga o le Matagi ma Savili i le atunu’u, lea e fa’atuina ona pe’ape’a uma i le eleele o Aasu i lona tau e $100miliona. O le kampani a le Green Globe Solutions Inc.

 

O le Kamupani a le Canadian/Recurrent Energy lea ua fa’akonekarate mo le fausaga ma le fa’atula’ia o le Fa’ato’aga o Panele ma fa’auia fo’i le sapalai eletise e 20megawatts lona malosi’aga mo le sapalai eletise a le Malo o Amerika Samoa e fa’auia mai e le ASPA i le atunu’u.

 

Ua mae’a ona sainia maliliega uma e fa’atulaia ai e nei Kamupani poloketi uma nei e lua, e amata mai i le fa’atupega o le tusia o le ata o le poloketi, fausaga atoa,  ma lona toe galueaina se’ia o’o lava ina gafatia ona sapalaia mai lea malosi’aga o le eletise mo le atunu’u. O le susuga Mike Toomey mai le Canadian Recurrent Energy ua ia fa’ailoa mai, “E mae’a fa’auia e le latou kamupani lea malosi’aga o le eletie mo le atunu’u i le ASPA i le tausaga fou.”

 

Ua faapena fo’i le manatu fa’aalia o le ali’i o Chris Thunken, lea sa maliu mai e avea ma sui o le Green Globe Solution Inc. lea e latou te galueaina le malosiaga fa’aeletise mai le Matagi po’o le savili.

 

O le taumafaiga lenei ua fa’ato’a tino mai, o le taumafaiga ina ia totogia e le tagata lautele le eletise i le na’o le 10sene i le kiliwati, ma o se fa’anaunauta’iga na aa ai ona amata soalaupule e le afioga le Sa’o Utu Abe Malae, nei ituaiga o ala e sapalaia ai le eletise mo le mamalu o le atunu’u.

 

E to’atele sui iloga o le tatou Malo na auai fa’atasi i lea fa’amoemoe i le lotoa a le ASPA i Tafuna, i le taeao o le aso Lua na te’a nei, lea na sua ai le eleele mo nei poloketi e lua.

 

MANA’OMIA KAMUPANI FA’ATULA’IA NOFOAGA FAFAGA MA’A TA’AVALE ELETISE

 

Ua mae’a faatulaga i le masina lenei se fa’asilasilaga fa’alaua’itele a le ASPA ina ia sailia ni Kamupani e tauofo atu e fausia se nofoaga fa’apitoa e fafagaina ai ma’a o ta’avale e fa’aaoga le Eletise nofoaga faitele.

 

E tusa ai ma se fa’amatalaga mai a le Pule Sili o le ASPA Wallon Young, o le sologa lelei o le ola a le afi o le ta’avale e fafaga lona maa eletise e 60%, ae o le ta’avale e alu i le kesi e na’o le 20% pe afai e fa’atusatusa i lena tulaga lou fia fai ta’avale e ola umi lona afi.

 

Ua matauina fo’i ua mae’a ona aumaia e le vasega o pisinisi e fefa’ataua’ia ta’avale i le atunu’u o a latou ta’avale lea ua fa’aalu i ma’a e fafaga e pei ona mana’omia ai ona faatula’ia ni ituaiga o pisinisi e fafaga ai ma’a ta’avale.

 

Fa’ailoa e Young, “O se tasi o Kamupani Fefa’ataua’i Ta’avale i le atunu’u, ua ma’ea aga’i atu i lea faiga fou ina ia fa’aitiitia atili ai le fa’aaogaina o le Kesi mai le suau’u.

 

O nei taumafaiga uma ua aga atu i ai le ASPA, ia sailia nisi ala e mafai ai ona maua e le mamalu lautele o le malo le eletise e gaosia mai nisi auala ae le mai le suau’u. Lea ua ala ai ona manatu ina ia fa’aaoga le eletise e fafaga ai ma’a mo afi o ta’avale nei ua gaosia mai i lenei vaitau o lea fo’i talutalu fou.

 

O se talitonuga fou ua a’e nei, ua amata ona fiafia tagata e fa’atau ta’avale nei e fafaga o latou ma’a e fa’aalu ai i le aso atoa, ae le utuina sona kesi, aua e mama ai fo’i le ea ma le si’omaga.

 

TOFIA SO’OUPU MALO & KAMUPANI SAPALAI ELETISE ALA ESEESE

 

O le ali’i sa avea ma fa’atonu o le Ofisa o le Enetia a le malo, Leifi Ali’itama Sotoa, ua tofia nei e le afioga le Kovana, Lolo Matalasi Moliga, e avea ma So’oupu i le va o le Ofisa o le Kovana ma vaega o le malo tumaoti e pei o le ASPA, ASTCA, Falemai LBJ Med Center ma le ASCC.

 

I lea mataupu sa fa’alauiloa e le kovana i lana fonotaga ma le kapineta i le vaiaso ua te’a, lea fo’i sa fa’alauiloa ai le susuga ia William Ledoux e galue fesoasoani i le loia a le kovana, Steven Watson.

 

O le susuga Ledoux sa avea ma Sui Loia Sili i le Ofisa o le Loia Sili, ma o le loia foi o lo’o tautua i le ASTCA.