Ads by Google Ads by Google

Tala I Vaifanua


Komiti o le Au Toeaina a le EFKAS i le taimi na iloiloina ai le lipoti mai le suetusi i le tulaga o tupe a le Ekalesia i le Fono Tele o lo’o faia i le vaiaso lenei i Kanana Fou. [Ata: LF]

tusia: Leua Aiono Frost

 

FA'AAUAU FONOTELE - RIPOTI A SUETUSI I TUPE A LE EFKAS:

 

O le soso'oga o le tauaofiaga a le Fonotele sa tula'i ai fo'i le failauga i le taeao e fa'aosofia ai lagona lelei o le au usufono ma sa fa'aali manatu ai i le auau o le aso Lua: "E au le ina'ilau a tama'ita'i." Tulimata'i lea o le Ulua'i matua o le lalolagi, Atamu ma Eva ma le agasala na mafua ai ona fa'aleagaina le Lalolagi matagofie, po'o le a fo'i se a'oa'oga pe a tu'u mai i le EFKAS?

 

Na fa'aali taofi e tusa o le fuaitau, "O Eva ua mafua ai ona malaia le lalolagi i le agasala!" Na toe fa'ailoa mai e le mau ina ia toe taga'i lelei i le fa'aliliuga o lea mataupu o le Tusi Pa'ia, po'o talafeagai lona fa'aliliuina ma le mau tonu e tusa o le tu'uaia o Eva.

 

O nisi o folasaga, sa faaalia lea i se taofi o se tasi o usufono mai Amerika ma sa ia fa'ailoa ai, "O lo tatou toe ave'esea fo'i o nisi mata'itusi ma fuaitau o le Tusi Pa'ia ina ia talafeagai ma lo tatou aganu'u, o le a ave'esea ai ma fa'aleaogaina ai lagona o nisi e tusa o tusitusiga tamau o le Tusi Sa. O lea se mea e matua faigata ona fesoasoani i le mau o le fa'akeresianoina o tagata e to'atele, ae o le a fuatia ai le mau a le Upumoni, le afioga a le Atua."

 

Ina ua mae'a le faitauga lea ma lona auau sa tula'i loa le failauga o le aso e tatala le usugafono o le aso ananafi i le sauniga lotu ae ta'ita'ia lea e Rev. Ekitoa Sopoaga mai Ta'u Manu'a.

 

O le ulua'i lipoti na tolaulauina mo le au usufono o le lipoti lea a le Au Su'etusi o lo'o totogia pea le latou auaunaga ina ia mataituina teugatupe, fa'amaumauga o alamanuia ma lona fa'aaogaina ae maise o Aseta a le EFKAS.

 

O le susuga Pili o le FM Pili & Assciates na tolaulauina latou fa'ai'uga, o lenei tauaga fa'aletupe lea e muta ia Me 31, 2018.

 

E ao ina tapena e le Ekalesia Aoao se latou SOP po'o le Standard Operating Manual - e fa'agaoioia aga'i i ai le Tupe a le Ekalesia Aoao. O iina fo'i o le a fa'aaogaina o se fuafuaga fa'ataoto e fua aga'i i ai le fa'aaogaina ma le teuina o Tupe ma meatotino a le Ekalesia, o le Fua a'ia'i fo'i lea o le olaola o le ekalesia i lona itu tau le tamaoaiga. O iina fo'i e fa'amautu atili mai ai le Lipoti o le Tupe i taimi uma, i ana aseta, teugatupe ma tupe fa'aalu. E mautu loa lea SOP, ua mautu fo'i le nofoaga tonu e tasi e mafai ona tali mai ai uma matou fa'afesili.

 

Sa ia fa'ailoa muamua le aofa'i o tupe maua, le aofa'i o tupe fa'aalu, ae maise o sala e afua mai i le maulalo o le aotelega o tupe teu i totonu o teugatupe a le ekalesia i le tausaga atoa.

 

Ua i ai a latou fautuaga e ao na tima'ia ai le fonotele ma ua fa'ailoa ai, a usita'ia nei fautuaga taua, o le a fa'ateleina nisi tupe fa'asao a le Ekalesia Aoao ma o le a fa'atumauina le aga'i pea i luga o le aofai o tupe teu i a latou teugatupe.

 

Ua fautuaina ina ia toe taga'i lelei le Ekalesia e toe suesue lelei tau aofa'i o mea totino fa'aletausaga. O tau o meatotino o lo ua lisia e le Ekalesia e le'i toe suesueina lava ina ia mautu mai tau i le vaitausaga nei.

 

O le isi fautuaga ina ia taga'i toto'a e fa'ailoa atu i tusitusiga iugafono ua tatau ona fa'amalosia i tulaga o femalaga'iga e totogia e le Ekalesia. O a lava Iugafono e ao ina mataituina a'o matou suesueina tusi, ia mautu atu ma aiaiga e siaki aga'i i ai, ina ia mafai ona fa'ailoa mai i se matou fautuaga tonu e tusa o se fa'afitauli e alia'i mai ai, pe ua tulaga lelei uma fo'i i lea tausaga ma lea tausaga fa'aletupe.

 

I tulaga o fa'amaumauga o tupe atoa fo'i ma tupe fa'aalu, ia matua mautu uma i se mea e tasi, ina ia mautinoa ua le na'o i matou fo'i e mafai ona o'o i ai ma sailia ai ni tali o latou fa'afesili i le tamaoaiga tausi o le Ekalesia. A i ai se mea e fia fesiligia e i matou, e mafai ona matou uia lea faila ma mafai ona maua tali o matou fesili i tulaga uma tau tupe ma aseta.

 

Na malolo le fonotaga mo sina taimi, ae ua mae'a fa'atuina le lafo, ina ia pasia le lipoti a le Su'etusi, ae talia fo'i fautuaga ua taua'aoina mai, ina ia fa'aleleia atili ai le Tala o Tupe fa'aletausaga e mulimuli mai.

 

TU'UA LE MALO TINA POLOKALAMA ECE AMERIKA SAMOA: IUTIA SAVALI

 

Ua tu’u malo le tina matua o Iutita Savali le mafutaga ma le fanau, peita'i o lo ua malolo o ia, ae o lo'o olaola pea lava lana tautua sa afusisina ai, ona o le taga'i mamao ia Amerika Samoa ma lona lumana'i. O le Ofisa Autu o le Early Childhood Education (ECE) i Fagatogo, o lo'o ua fa'aigoaina lava i lenei tina matua; Iutita Savali, ose tina faiaoga.

 

O lana auaunaga sa o'o mai ai le polokalama o a'oa'oga a fanauiti i le atunu'u, ma ua avea ma auau o lona soifua galue ai mo le Matagaluega o A'oga.

 

O lona to'esea nei, 15 Iulai, 2018, ua avea ma se nofoa e le mafai ona fa'atumu gofie e lana fanau; ae fa'afetai i le Atua, ua mae'a tula'i mai fo'i nisi toa i le galuega. Ua atoai le 87 tausaga o le tina ina ua maliu nei.

 

I le tausaga 1967 na galue ai Savali e fesoasoani ia Dr Betty Johnson i le fa'atuina o le ulua'i ECE i le Matagaluega o A'oga. Ina ua fa'amavae Dr Johnson i le 1978, na se'e loa lea o ia e avea ma Fa'atonu o le ECE, ma sa ia galue mai ai lava i lea tofiga, se'ia o'o mai ina litaea i le tausaga e 1998.

 

Mai le ulua'i vaseaga ECE sa la'ua taumafai e fa'atula'ia ma Dr Johnson i le amataga, ua matua tupu lauolaola le galuega ma ua silia nei ma le 100 potua'oga ECE ua faatutuina i totonu o le teritori o Amerika Samoa.

 

I le soifua aoaoina o Savali na faau'u i le A'oga Maualuga a Amerika Samoa lea ua fa'aigoaina nei o le Aoga Maualuga a Samoana. O lana galuega na mua'i faigaluega o le Faia'oga i le A'oga Maualuga a Leone, ma o lona afio'aga fo'i lea.

 

Na filifilia e ulufale i le a'oga a Kamehameha i Hawaii ma maua ai lana sikolasipi e sailia ai lona fa'ailoga BA i le National College i Illinois.

 

I le vaitau tonu na litaea mai ai o ia mai le ECE a'o avea ma fa'atonu, ua toetoe a aotelega afio'aga uma o Amerika Samoa ma latou a'oga ECE e ta'ilua.

 

O se molimau a i latou sa galulue fa'atasi ma ia, Miraneta Tinitali, sa ia fa'ailoa ai lenei tina, "Tina galue ma le leoa, peita'i e alia'i ana galuega i faitoto'a."

 

O i la'ua uma ma lona to'alua ua mapu mai nei i ti'asa, ae o lo'o soifua pea i si a la'ua fanau, 2 teine Loretta ma Iutita, ma lo la'ua tuagane e to'atasi o Lui Savali.