Ads by Google Ads by Google

Tala I Vaifanua


O faletua o faifeau mai Niu Sila, ua auai mai e usufono i le fonotele a le EFKAS i Kanana Fou 2018. [ata: Leua Aiono Frost]

O se va'aiga lea i le vasega o tama o le EFKAS mai matagaluega i Amerika Samoa. O i latou o sui filifilia o latou ekalesia ina ia auai i le fonotele e avea ma usufono, lea o lo’o taoaofia i Kanana Fou. [ata: Leua Aiono Frost]

TATALA LE FONOTELE EKALESIA - E.F.K.A.S  2018

 

O le taeao ananafi na amatalia ai tauaofiaga a le Fonotele a le Ekalesia Fa’apotopotoga Kerisiano i Amerika Samoa (EFKAS) i lona Laumua i Kanana Fou ma e tusa ma le 600 sui usufono i le Maota o Tina, lea ua tauaofia ai le fonotaga aua e le'i mae'a le Malumalu "Ua Taunu'u" lea e avea lava ma maota fono i tauaofiaga o fonotele i tauaga ua mavae.

 

Na tatala le usugafono ta'ita'ia e le Faife'au mai Los Angeles Rev. Sepulona Tanuvasa.

 

I le Upu fa'amalosi na vagana e lana auauna sa ia toe fa'amamafa mai ai le auaunaga a le tagata o le Atua e le fa'atuaoia pe matau mea e silasila po'o le a se avanoa e tatau ona fa'aleleia o le galuega atoa.

 

"E fa lelei anava soifua ua mautu nei a le Ekalesia e ao ina tatou fa'aleleia atili ma matua galulue a'ia'i i ai: Inisiua o Meatotino uma a le Ekalesia i lona Laumua nei. Ua mautinoa afai e le fa'atinoina lea anava soifua, e le mafai ona tula'i mai o galuega tetele ia mautu lelei. Lea ua le fa'aaogaina le tatou Malumalu Ua Taunu'u i lenei fonotaga, ae o le aoga lea o isi meatotino e pei o lenei maota, e tua mai i ai le galuega. O le malumalu fo'i, e mautinoa lava e maea lelei ma matagofie e pei pona manatu i ai ma fa'anaunau i ai le fonotele."

 

"O le anava lona lua o le tulaga o galuega feso'ota'i ma le United Christian Churches lea ua matua saoasaoa lona fa'agaoioia ma ua milo fa'atasi atu ai ma tatou galuega fa'amisionare mo isi atunu'u e tele o le lalolagi. Ua le pule mai le UCC ia i tatou, pe aia fo'i i le fa'atautaiga o le tatou galuega iinei, ae ua le pule atu fo'i i tatou i le fa'ataotootoga o aiaiga a le UCC latou, peita'i ua matua saoasaoa le so'otaga lea e mafai ai ona vave galuega fa'atala'i i atunu'u mamao. Ua auina atu tatou tama fanau mo lea fa'amoemoe, ma ua fa'atutuina fo'i Ekalesia i nisi o setete ma atunu'u eseese e o tatou alo na auina atu."

 

"Lona tolu o le anava soifua o le aga'i i luma o le A'oga Fa'afaife'au a le Ekalesia po'o le Seminare i Kanana Fou. Ua la'asia e le tatou a'oga fa'afaife'au le isi la'asaga fou ona ua to'atele atili i latou ua mae'a a'oa'oina, fa'asolo atu ina saili fa'ailoga maualuluga, ma ua toe taliu mai ma avea ma faia'oga, ua toe sailia isi tusi pasi mataupu silisili, ma ua tutula'i mai ma tusi pasi e fa'aleleia atili ai le agava'a o le tatou Kolisi e tapena ma a'otau ai Auauna a le Atua.”

 

"Lona fa o anava soifua o le tulaga o le Penisione a le Ekalesia, lea ua le gata na'o Fa'afeagaiga ma Faletua ae ua tatala atu i le lautele o tagata lolotu ina ia galulue ma toe va'ai i taimi fa'aletonu o le soifuaga, le taimi e tu'ua ai le mafutaga i lenei galuega ma mea uma o lenei olaga, ae ia le nofo fa'aletonu ai le faletua ma fanau. Ua le faia nei na'o faife'au ae ua tatala mo tagata lautele o le ekalesia e fia penisione."

 

O lana toe tima'i lea i le au usufono ma sana fa'amalosi lea ina ia soalaupule mataupu uma o le fonotaga i le agamalu ma le agaga moni.

 

AUDREY ENGLISH - KONESETI PESE I MOOREA

 

A'o tatou fa'atofa atu i se tasi o alo o Samoa e lauiloa i le musika, Siuleo Chico Pouesi, ae o le taimi tonu fo'i lea na malaga ai le aiga o Audrey English, tama'ita'i Samoa ua amatalia ona fa'alauiloa lona sogasoga i lea lava fo'i taleni, i Tahiti mo lana ulua'i koneseti fa'atasi ma isi sui iloga i le musika i Moorea, Tahiti.

 

O Audrey English o se ulumatua lea o le fanau teine e to'a tolu a le tama'ita'i o Ane Ah Foon ma le ali'i pailate o John English i Las Vegas. O le fa'aaliga muamua fo'i a Audrey na faia fo'i i Las Vegas i le masina o Me 2018, ae o lea ua soso'o ai ma lona sao i le Koneseti a le ali'i lauiloa i le musika, Michelle & Vance, i Tahiti.

 

O le fa'aaliga lea sa faia i le faletalimalo o Sofitel Moorea & Le Meriden i Papeete. I se saunoaga a le tina, Ane English sa ia fa'ailoa ai, "Ina ua fa'afiafia ma pese Audrey i Tahiti, e pei lava ua ia pese i ona laueleele, ua i ai le lagona fa'a-teine o atumotu ia te ia, ma ua naunau o ia ina ia fa'afiafia i Samoa i se taimi lata mai."

 

Ua fa'atulaga fo'i ni koneseti lata mai a Audrey, aua sa soifua a'e lava o ia i Amerika Samoa a'o galue lona tama i le Samoa Air, a'o si ona tina i le Samoa News. O le ulua'i koneseti a Audrey i Las Vegas sa valaaulia fo'i o ia e fa'afiafia fa'atasi ma isi sui iloga i le Musika, ma ua maua ai fo'i lona avanoa lenei mo le malaga atoa a si ona aiga i Tahiti mo lea koneseti.

 

Peita'i, ina ua to'ai i fanua i Las Vegas le latou aumalaga ua mae'a lea fa'afiafiaga sa auai ai, ae fa'ailoa ane le maliu o se tasi o ali'i tusi pese, fatu pese sa galulue fa'atasi ma fefa'asoa'i ma Audrey e ala i lea taleni, John McGough.

 

Ua fa'ailoa fo'i e Audrey, "O le galuega sa ia fa'asoa mai ia te a'u fa'atasi ma isi e to'atele i lea taleni, o le a ou naunau pea e fa'aolaola atili, aua o le taleni ua tu'uina mai ina ia fa'amumu atili. O le a avea fo'i ma se toe fa'afo'i atu i lenei ali'i lauiloa i fatuga tau musika."

 

Ua le gata i lea, ae i ai se poloketi sa ia fa'aofia i ai Audrey ina ia fefa'asoa'i ma isi fanau uma e taumafai o latou olaga i le Musika, le James Arthur Project,'@jamesarthurinsta23' ma o se tasi lea o fa'amau fa'ailoga o le naunau o lea ali'i i le Musika. E aoga fo'i lea so'otaga mo nisi o tatou fanau e fia taumafai i le musika. Mafai ona e fa'afofogaina nisi o ana pese i le YouTube i lalo o lona igoa, Audrey English.

 

KOVANA - LEAI SE TALOSAGA ALOAIA A LE FALEMA'I FOU I LE MALO

 

I le fonotaga a le Kovana sili ma lana Kapeneta i le vaiaso ua te’a na saunoa ai Kovana Lolo Matalasi Moliga, e tusa o le falema'i fou e fia fausia e fa'atula'ia ai i le Paka Liona, e le o se galuega ua uia ala e tatau ai ona amatalia lona fausaga.

 

Saunoa le kovana, "E le o se galuega leaga, o le tautua o lo'o aoga ma e mana'omia, peita'i e ao ina mua'i fa'auia mai e i latou le ala e tatau ona mua'i faia a'o le'i amatalia se auaunaga fa'apenei i le teritori."

 

Saunoa le kovana, e le’i tuuina atu i le malo se talosaga aloaia mo lea galuega o le falema’i fou ma e leai fo’i se fanua o le malo ua fa’amonia mo lea poloketi.

 

O lenei galuega o lo’o fa’atautaia e le EAU Claire mai South Carolina, ma e so'ofa'atasi ai ma le Hope Ministries i Amerika Samoa.

 

O le saunoaga fo'i a Bishop Vaifanua Mulitauaopele, sa ia fa'ailoa ai, "O le talosaga ma isi pepa uma e ao ina taga'i toto'a i ai le  afioga Kovana Lolo Moliga, ua mae'a i luga o lana laulau, peita'i, e le'i o'o mai se tala e tusa o le fa'amoemoe. Ae i ai le manatu, e le o se poloketi e pa'u tasi mai se leleiga i lenei itu, e iloga mai, e matua tele le aoga mo Amerika Samoa e afua mai le Malo e o'o i ona tagata nu'u e mana'omia togafitiga ma siakiga i gasegase ua maua ai."