TALI FA’ATONU SOIFUA MALOLOINA: TA’AVALE LISI AE LE FA’ATAU:

Ua saunoa le fa’atonu o le Matagaluega o le Soifua Maloloina e tusa o le tulaga o le tele o ta’avale ua lisia i le vaitau lenei, o ta’avale i lana matagaluega, e tusa ai ma le saunoaga a le Kovana i se tasi o ana fonotaga fa’apitoa ma lana kapeneta.

“Ona o le tele na’ua o tiute o lo’o ua mana’omia ona fa’atino e tagata faigaluega a le la’u matagaluega, ona o le fa’ainumaga o fuala’au e togafitia ai le Mumu Tutupa, ua mana’omia ai ona tele ta’avale e feoa’i ai i latou. Ua le na’o se to’a lima ni paga o lo’o ua faigaluega i le taimi e tasi, ae ua fa’ateleina, ese mai ai lava fo’i i talavai e togafitia ai fanau mai le Misela lea ua taumafai ina ia le pepesi fo’i i le atunu’u. Ua tatau ai ona lelei taa’avale e fa’aaoga mo le saogalemu o le aufaigaluega i ala maualuluga. O nei ala uma e fa’aaogaina, e fa’atupe mai e le Malo Tele.”

I le taimi nei ua ia fa’ailoa e 10 ta’avale nei e lisia e lana matagaluega.

“FAITAU TUSI, E AVEA OE I NU’U E TELE” - FAITAU TUSI EFKAS AMAULUIA!!

O le tina o Mina Saifoloi ma lana vasega o faia’oga Aso Sa o lana Ekalesia Fa’apotoga Kerisiano i Amaluia, na fa’atautaia le polokalama na fa’atupeina e le Amerika Samoa Humanities Council, e aoao ai le faitau tusi a le fanauiti ma talavou i le latou afio’aga ma le ekalesia fo’i.

O le autu o le latou polokalama faitau tusi lenei ua fa’ailo “Faitau Tusi E AVEA OE I NUU E TELE!

“E ta’u mai lava e le manulauti le faamoemoe ina ia fa’aosofia le mafaufau o le fanau, ia ia faitau i le tusi, e mafai ai ona ia silafia se isi nu’u fou ma sona tala’aga ina ia ona silafia,” o se tala fiafia lea a le tina ole galuega i Amaluia, Mina Saifoloi.

O lenei polokalama o le Amaluia Summer Literacy Program. Ua fa’ailoa e Saifoloi, sa auai i la’ua ma le tama o le galuega, Rev Fa’aeteete Saifoloi i le tele o semina ina ia mafai ona la’ua talosagaina lenei fa’atupega ma e fa’afetai i la’ua ina ua maua.

Ua le gata ina fa’aleleia atili le faitau tusi Fa’asamoa a le Fanau i le Tusi Pa’ia, ae ua fa’asolo atu ma isi tusi, i le gagana Samoa ma le fa’aperetania fo’i.

Ua fa’avasega lenei polokalama mo le fanau ua i vasega amata se’ia o’o i le fa’aiuga o le taumafai i vasega o aoga maualuluga.