FIAFIA FANAU PAGO PAGO - HALLOWEEN MA LE LATOU FAIPULE

O le afiafi o le aso To’ona’i na te’a nei na vevesi ai le vasega o fanauiti ma latou matua ae maise fo’i l vasega o tupulaga talavou a le afioaga o Pago Pago ina ia auai i le fiafia mo i latou na tapena e le latou faipule Vesia’i Poyer Samuelu, na fa’tautaia lea i le Maota o Pulu i Pago Pago lava.

E afa le lima ae ua amata na tutu laina a le fanau ma teuga lasi o soo se ituaiga o tagata o lo’o faia o latou ata tifaga. O le aulelei lava o ou la’ei ma teuga fa’aatagia ai so’o se tasi o lauiloa i ata tifaga, ae maise fo’i o lou auleaga ma le fa’afefe tagata i au teuga fa’a- Aitu o le Aoa, o oe lava e tele au lole ma sukalati foa’ia mai e le ali’i faipule ma le au tufa manuia i lea afiafi faapitoa mo le fanau.

O le fale taliamalo atoa lea na fa’aaogaina mo latou ta’aloga eseese ma o iina e fa’atino ai fo’i lou silafia ona ta’alo fa’atauva fa’atausala.

O se fe’au taua mo le fanau, “Ia mafai ona tauva fa’atausala ma ia maua sina mea aoga mai au taumafaiga uma, ia iloa fo’i le va lelei ma le isi uso a tamaititi, aua ne’i tu’ua le feso’ota’i i mea lelei ma fetufa’i i mea ua e maua.”

TOATOLU LEOLEO FALEPUIPUI - FAAMALOLO SEI FAIA SUESUEGA

Fa’ailoa e le Komesina o Leoleo, Le’i Sonny Thompson, o lo’o faia le sailiga mautu a le Matagaluega o le Puipuiga o le Saogalemu Lautele i le mafuaga ua mafai ai ona sosola i tua pagota, o lo’o masalomia fo’i e i ai nisi o leoleo o le toese o lo’o aofia ai.

Lea ua fa’ailoa, e to’atolu i latou ua fa’amalolo ae sei fa’agasolo pea le sue’suega. E to’alima Pagota na sosola i tua i le mai le toese i le aso 19 o Oketopa ma ua toe maua uma i latou nei. 

O lo ua fa’amalolo mai nei sui mo le 30 aso mai le galuega, ae se’i fa’atino le suesuega.

I le taimi nei ua galulue nei Falanaipupu Ta’ase Sagapolutele le sui Komesina ma COP Foifua Foifua fa’atasi ai ma le Pule o le Falepuipui Tauese Va’a Sunia mo le fa’amaumauga ma le faitauga o pagota i le tose.