FAAILOGA FU'A A MANU'A I LE TAEAO NEI

O lenei aso, Iulai 16, ua ma’ea ona aloaia i se poloaiga fa’alauaitele a Kovana Lolo Matalasi Moliga, o se aso malolo i Amerika Samoa, mo le fa’amanatuina o le Fua a Manu’a, e atoa ai le 114 tausaga talu ona tuuina atu Manu’atele i le va’aaiga a Amerika, ma avea ai i latou o motu o Amerika Samoa.

I le poloaiga a le kovana, o lo’o fa’ailoa ai le manulauti o lenei tausaga - Tupulaga mo A Taeao, ma saunoa ai e faapea o i latou ia o le lumana'i o le atunu’u ma ia latou lava tapena mo so'o se fatiga i la tatou folauga i le lumana'i.

Ua naunauta'i le malo ina ia mautinoa lo latou olaga a'oa'oina lelei i tomai e mo'omia, ia sao ma uli le folauga a Amerika Samoa i o latou fo'i vaitau ua tutu mai ai i le foe. Ia soifua laulelei i latou ma ia le galo ia i latou le aganu'u a Samoa, o tatou laueleele ma o tatou gataifale.

E malaga le kovana le nisi taitai o le malo i le taeao nei i le va’alele mo Ta’u aua lenei aso fa’amoemoeina mo Manu’a ae o le toatele o le au valaaulia e malaga i le MV Manu’atele lea na tuuva’a ese atu i le po o le aso Faraile ua te’a.

LIKI VOLLEYBALL - IULAI 16 MO LE TU'UAGA UMI O A'OGA

Ua mautu le fa'amoemoe o le Asosi Volleyball Federation a Amerika Samoa e fa'atautaia se ta'amilosaga o lea fa'agatama i le vaitau lenei o le Tu'uaga umi a fanau a'oga.

O le a faia lea i Leone Gymnasium i le itula e 4:00 i le afiafi ta'aloga. Ua fautuaina fo'i o lo'o i ai pea le avanoa aua e fa'ato'a fa'amuta lava le fa'auluga o so'o se 'au i le taeao o le aso Gafua, o le aso Malolo fo'i mo le Fu'a a Manu'a.

Fa'ailoa mai fo'i e lea lava Asosi, ua mae'a fili le 'au a Tama U19 fa'avaomalo a le tatou malo, ma ua i ai nei i latou i koleniga fa'atasi, ina ia mautinoa lava o lo ua lava saunia i latou mo ta'amilosaga i lea fo'i fa'agatama e le o toe mamao ae faia le Pacific Games i Samoa.

I le polokalama a le DYWA mo le fanau talavou i lenei tu'uaga o a'oga, sa o atu uma ai lenei 'au ta'a'alo e fesoasoani e a'oa'o le ta'aloga volleyball i le fanau laiti nei e a'o'oga Elementary, a'o lea e auai i le polokalama i le Fale Ta'alo i Pago Pago.

"O le latou lea poloketi ua fa'atula'ia mo i latou, ina ia fesoasoani e fa'asoa atu so latou iloa i le pasiga o le polo, taliga o le sipaika ma ia tu mata'alia i taimi uma e ta'a'alo ai i latou. Ua iloga mai ua lelei ona pasi le polo e le fanau, ae o lo'o ua taumafai atili ina ia iloa e le fanau iti lea ona sipaika le polo ia ova i le neti,” o se fa'amatalaga lea a Iose Afu o le ASVF, lea fo'i na te a'oa'oina le 'au fili lea a tama talavou a Amerika Samoa.

KOVANA - LEAI SE TALOSAGA ALOAIA A LE FALEMA'I FOU

I le fonotaga a le Kovana sili ma lana Kapeneta i le vaiaso ua te’a na saunoa ai Kovana Lolo Matalasi Moliga, e tusa o le falema'i fou e fia fausia  e fa'atula'ia ai i le Paka Liona, e le o se galuega ua uia ala e tatau ai ona amatalia lona fausaga.

Saunoa le kovana, "E le o se galuega leaga, o le tautua o lo'o aoga ma e mana'omia, peita'i e ao ina mua'i fa'auia mai e i latou le ala e tatau ona mua'i faia a'o le'i amatalia se auaunaga fa'apenei i le teritori."

Ua fa'ailoa fo'i le mae'a fa'asalalauina o tala tusia i lea galuega, atoa ai ma se tasi o atali'i o Amerika Samoa o lo ua ia foai mo le fa'amoemoe e fa'atula'ia ai le ulua'i fale mo lea poloketi, peita'i e le'o uia mai ala e tatau ai i le va ma le malo.

I se fa'amatalaga a Lolo sa ia fa'ailoa ai, "O le susuga Utu Abe Malae sa ia mua'i fa'ato'aia atu lea mataupu ia te ia, ona o lo'o ua saili mo se eleele e mafai ona fa'atula'ia ai. Ma sa gata ai i lena taimi ona talanoaina lea tulaga, ae o lea ua o'o mai i le aso Lulu, ae talosagaina ai le suaina o le eleele mo lea fa'amoemoe."

Ua ia saunoa fo'i e ao ina siakia lelei agava'a ma tusi pasi o i latou o le a faigaluega i lea falema'i, ma e tatau ona mataituina uma e le Ofisa o le Medicaid, Matagaluega o le Soifua Maloloina ae maise fo'i o le Matagaluega o Fefa'ataua'iga, pe ua mae'a faia le latou galuega iloilo toto'a i lea falema'i o le a fa'atuina iinei.

I le itu a le falema'i fou lea e tau fia fa'atuina, EAU Claire mai South Carolina, o a latou foma'i ua mae'a pasia uma e i latou laisene e galulue ai ma faia togafitiga mo gasegase o soo se ituaiga i a latou falema'i fa'atalavai masani mo le lautele o tagata soifua i lena setete, ua latou asiasi mai fo'i mo le lima tausaga ma faia latou talavai e le totogia lea e so'ofa'atasi ai ma le Hope Ministries i Amerika Samoa.

"Ua i ai nei fa'amaumauga o i latou ua matou va'aia i aso ta'ilua pe tolu ua faia ai matou talavai nei. Ua iloga mai ai, e i ai le mana'omia i tulaga o le siakiga lelei o le gasegase ma togafitiga ua tu'uina atu e ala i vai ua fa'atonuina e tala e togafitia ai latou gasegase. Ina ua va'aia lea tulaga, ua  a'e ai se agaga e fia fa'atuina le tautua ina ia mafai ona fesoasoani e tausia lelei le soifua o tagata Amerika Samoa iinei, aua e le gafatia uma ona malaga atu i fafo e siakia latou gasegase i Hawaii ma isi setete, po'o South Carolina fo'i,” o se saunoaga lea a le ali'i foma'i sinia sa ia fa'atuina le 23 falema'i i totonu o le setete o South Carolina, Dr Hamilton.

O le saunoaga fo'i a Bishop Vaifanua Mulitauaopele, sa ia fa'ailoa ai, "O le talosaga ma isi pepa uma e ao ina taga'i toto'a i ai le  afioga Kovana Lolo Moliga, ua mae'a i luga o lana laulau, peita'i, e le'i o'o mai se tala e tusa o le fa'amoemoe. Ae i ai le manatu, e le o se poloketi e pa'u tasi mai se leleiga i lenei itu, e iloga mai, e matua tele le aoga mo Amerika Samoa e afua mai le Malo e o'o i ona tagata nu'u e mana'omia togafitiga ma siakiga i gasegase ua maua ai."

O le tulaga totogi o talavai a tagata, pe mata e taugata pe a, ae ua fa'ailoa mai, "O lo ua matou iloa le tulaga o le tamaoaiga o lo'o i a'ao o aiga ta'tiasi i le tatou atunu'u, e matele mea uma ina tau fa'asoa le tamaoaiga, e le lava i le tele o taimi. E i ai fo'i fuafuaga fa'ataoto o le a tapena i ai lenei tautua, ina ia mautinoa ua fesoasoani i le mamalu lautele e le lava le tamaoaiga tausi o aiga,” o se tala lea a Mulitauaopele.