Ads by Google Ads by Google

Tala I Vaifanua

PASIA TALOSAGA FA’ATUPEGA O LE PA-SIMA MO LE TOESE

 

Ua ma’ea ona pasia e le Fono Faitulafono le pili mai le faigamalo mo se vaega tupe e fa’atupeina ai le fausiaina o le pa-sima e si’omia ai le Falepuipui i Tafuna. O lo’o aofia i lea pili le vaega tupe mo le fausia lelei o le apitagalu mai Aua e aga’i atu i sasa’e, ma le isi fo’i apitagalu e aga’i mai i sisifo o lea lava afio’aga.

 

Ua fa’ailoa mai o lenei vaega tupe uma ua fa’amautu mai lea i tinoitupe totoe mai le tausaga fa’aletupe 2018 ma le 2017 i le vaega tupe na maua fua mai le kiviteni o le Hawaiki Cable.

 

O le taumafaiga ina ia saogalemu lelei le nofoaga o e nofosala i Tafuna, o le ala lea o le agaga o le Kovana sili ina ia fausia loa lava lenei pa tele e si’omia ai le To’ese. Ua iloga fo’i e le atunu’u, le tele o taimi ua sosola ai i tua pagota mai le Toese, ma ua le saogalemu ai fo’i le soifua lautele o le atunuu, ona o lea tulaga.

 

O le galuega tele mo le apitagalu e afua mai le afio’aga o Aua fa’asolo i sasa’e ma sisifo, o se galuega e ao ina faia vave, aua o lo’o ua si’isi’i pea lava le maualuga o le suasami ma ua malolosi atili ai fo’i le sofa’i mai o galu tetele i le apitagalu ma au aia atili ai le eleele e aoga mo le atunu’u atoa. O a’afiaga uma nei o le suiga matuia o le tau ua femoumoua’i ma ua aafia tele ai afio’aga e maualalalo o latou apitagalu.

 

O le galuega ina ia puipuia le solofa atu pea i eleele i le sami ma ua fa’aitiitia atili ai eleele mo afio’aga e galulue i ai, ma fausia ai maota ma laoa. O le taofiga o le palapala e ao lava ina fa’ataua, aua e i ai ni vaega tetele o nu’u tu matafaga ua va’aia mo le isi 20 tausaga ua i’u ina o’o mai le sami i uta i nofoaga o maota o aiga

 

FOAI KAMUPANI JS TANK SERVICES - 100 PUSA MOA MO LE FALEPUIPUI:

 

O se foa’i mai se tasi o pisinisi i le atunuu ua fa’atutu lea mo le To’ese i Tafuna, ma ua latou taua’aoina lea i le afioga le Komesina o Leoleo Le’i Sonny Thompson ma le susuga le ali’i Sui Komesina Falanaipupu Ta’ase Sagapolutele.

 

E ese mai le 100 pusa moa, ua latou taua’aoina fo’i le 20 x 50lb taga alaisa, 20 Pusa fuamoa ma le Uilipaelo e tasi. O le pisinisi lenei o le JS Tank Services o se pisinisi e fa’afoea e le ali’i faipisinisi, o Hapakuki Fotuaika ma lona faletua.

 

Na faao’o fo’i le fa’afetai tele i le susuga Hapakuki Fotuaika ma le faletua atoa ma le pisinisi ona o lenei foa’i taua ma le aoga mo le mamalu o le atunu’u o lo’o nofosala. I se saunoaga ale afioga le Komesina o Leoleo, sa ia fa’apea ai, “O le fa’afetai e fa’ao’o atu i le ali’i faipisinisi ma le faletua fa’apea fo’i le pisinisi i lana aufaigaluega atoa, aua ua ia fa’aalia le agalelei i lona foa’i i lea vasega o e nofosala o le atunu’u. O i latou nei na saunoa fa’apitoa i ai le ali’i Fa’aola, afai sa tatou alofagia, ua tatou alolofa lava ia te ia.”

 

“E le gata i lea, o le foa’i a lenei tama ma le pisinisi, ua fa’ailoa ai lona agaga i le atunu’u ae maise le Malo i lana taumafaiga ina ia fagaina lelei pea i latou o taumafai ona toe fuata’ina o latou olaga ina ia aluga lelei le lumana’i, tia’i ese fatia ua tuana’i, ae fa’afouina lagona ma manatu, aua se lumana’i manuia.”

 

“O lenei fo’i foa’i tele ua taua’aoina o se toe fa’atepa lea o i tatou uma, po’o le a se leaga o se tasi, e tutusa lava i tatou uma i le silafaga a le Ali’i. O lenei fo’i foa’i e aoga tele e fa’ailoa atu ai i nai uso ma tuafafine i le a’ai o le To’ese, o lo’o amanaia ma alofagia i latou e le mamalu lautele o le atunu’u.”

 

I le ali’i faipisinisi, sa ia fa’ailoa atu ia i la’ua, “O le fa’ailoga lenei o lo oulua sapaia o le tatou fo’i malo ma ona tiute fai fa’aletulafono ina ia tausia lelei tagata o lo’o nofosala, ina ia toe fa’ailoa ia i latou le ala tonu e ao ina soifua fa’atasi ai ma nisi fa’apea ma latou aiga. Fa’afetai tele mo lo oulua sao aoga tele mo lea fa’amoemoe maualuga o le Malo.”