Ads by Google Ads by Google

Tala I Vaifanua


Le faipule a AS i le Konekeresi - Aumua Amata [ata: foa'i]

FA’AILOA MAI E AUMUA AMATA - E LE O SUIA LE MAU A LE FETERALE TUPE TOINA MAI:

 

Ua fa’ailoa mai e le tatou faipule i le Konekeresi, e tusa o le saunoaga a Kovana Lolo Moliga e talosaga atu ai mo sona sao e fa’amautu mai ai se isi fa’atupega faaopoopo mai le konekeresi, e fa’amae’a ai le Fale Fono.

 

Peita’i, mo lea lava fanoga, ua tusi aloaia mai ai le tatou Sui i le Konekeresi ia Kovana Lolo Moliga, “E le o suia lava tulafono tamau a le Konekeresi i ala e toina atu ai tupe fesoasoani mo so’o se poloketi e fia fa’atuina ma fa’amae’a i le teritori o Amerika Samoa. O le ulua’i taimi na o’o atu ai se fanoga muamua i le tausaga ua mavae sa fia maua ai le $50miliona mo le falefono lava. Peita’i o lenei tusi ua toe fa’afou mai, ua talosaga mai ai se ala e fa’amautu ai le tinoitupe e $20miliona mo le fale fono lava fo’i.”

 

Ua tali mai Aumua Amata ma ia fa’ailoa manino mai ai, e matua fa’asa lava e le Konekeresi ona talosaga mai ni sui faipule i ni nogatupe fa’apea, pe talosaga mai fo’i e toina atu e le Konekeresi ni vaega tupe fa’apenei. Na taofia fo’i nei faiga faapenei, ina ia le toe fa’aaoga sese ai e Faipule o le Konekeresi tupe ma a’afia ai i latou ini faiga e fa’aaoga sese latou malosi’aga e talosagaina ai fesoasoani tupe mo poloketi fa’atutu i o latou atunu’u o lo’o palotaina i latou ina ia avea ma sui o le Konekeresi.”

 

Peita’i e i ai le ala ua fa’ataga, o se tupe toina lea e i le sui faipule lava po’o le e pule i latou i le fa’aaogaina, ma o le a fa’aulu lea e fa’atauva i ai Faipule o le Konekeresi ua talosaga, ae maua le fa’atupega e le poloketi e sili ona aoga i lona atunu’u fa’ateritpri po’o le setete foi.

 

O lea ituaiga o talosaga, ua ia fa’ailoa mai, o le a fesoasoani ane i le tatou talsoaga le tamaita’i Faipule, ina ia ausia e le tatou poloketi le tulaga togisilia, ia maua lea fa’atupega.

 

Ua toe fa’ailoa mai e le tama’ita’i Faipule i le Konekeresi i le tatou Kovana, “Masalo e lelei fo’i ona toe tagai i le tinoitupe e $1.3miliona lea sa ia fa’auia mai mo le tatou malo i le ausaga ua mavae e amata fa’aaoga i lea fo’i galuega lelei, ma o le fatu lava o le tatou malo le fono faitulafono.

 

LE AVEA E LE “ALOFA I MEAOLA” LATOU MEAOLA - OFISA O LE FOMA’I MANU I TAFUNA:

 

Ua fa’ailoa mai e se sui o le Sosaiete o lo’o nafa lava ma le tausiga fa’apitoa o meaola ta’aloa, ma nisi fo’i meaola ua sulufai atu latou aiga e fia maua nisi e tausia i latou, le “Alofa i Meaola,” e latou te le o toe avea latou fagafao e siakia pe faia talavai i le Foma’i Manu ua galue nei i le Matagaluega o Fa’ato’aga, Vaega o Lafu Manu ma Meaola Fagafao.

 

Ua fa’apena fo’i ona fa’ailoa e i latou i nisi o latou pa’aga, o aiga lava e gasolo atu i lea Sosaiete mo le tausiga lelei o latou fagafao, “ia le toe avea latou fagafao i le Foma’i Manu i le Matagaluega o Fa’ato’aga, aua e le o toe i ai ni vaila’au mo togafitiga o meaola o i ai i lea ofisa o manu.

 

Ua fa’ailoa mai e Mona Michelle King, o le Foma’i Manu i le Matagaluega o Fa’ato’aga, Dr Kenneth Lameta, e le o laiseneina o ia e oka ni vaila’au e togafitiga ai ma’i o meaola fa’afagafao, ma ua le iloa fo’i poo a ni vailaau o loo totoe nei i lea Ofisa o Manu.

 

Ua fa’ailoa mai fo’i e King, “O nisi o meaola sa faia e le foma’i manu taotoga, ua po le va’ai a’o nisi ua mamate ai lava, ma ua le mautinoa lava po’o a taotoga na faia e le foma’i i meaola nei.

 

Na faailoa fo’i e King, “Ua mae’a matou fono ma le afioga le Kovana Lolo Moliga, i matou o le Alofa mo Meaola, ma sa ia fa’ailoa mai, e mafai ona fa’atautaia e i matou le Ofisa ole Foma’i Manu i Tafuna.”

 

Peita’i, o le fuafuaga sa manatu i ai i latou, ia fa’atautaia e le Alofa mo Meaola le talavai mo Meaola, ae koleti pea e le Matagaluega o Fa’ato’aga le totogi, peita’i e o’o mai i le aso, e le’i toe maua atu lava se tali.

 

Ua fa’ailoa mai la e le Alofa mo Meaola, “Ua aga atu nei i matou e fa’amautu lelei se nofoaga e faia ai talavai a Meaola uma, ma ua tatau lava ona mafai ona tatala mo le galuega i le vaiaso a sau nei.”

 

Ua vala’au faapitoa mai le sosaiete a le “Alofa mo Meaola” ina ia fa’atasi uma atu le mamalu lautele o outou e agaga ina ia fa’aauau le tausiga lelei o tou fagafao, “Ina ia auai mai i le fonotaga fa’apitoa e faia i le itula e 4:00 i le afiafi o le aso Lulu nei. E faia lea i le Pacific Energy Tank Farm, ma e vala’au atu ina ia auai uma mai pe afai e fia fa’ailoa sou taofi lelei i le aga’i i luma o le tautuaina o tatou meaola fa’afagafao. O le tele o manatu lelei, e mafai ai ona fa’atuina se nofoaga e agava’a mo le tausiga lelei o tatou meaola.”

 

Ua le maua lava se feso’ota’iga ma le ali’i fa’atonu sili o le Matagaluega o Fa’ato’aga  Filifa’atali Mike Fuiava, e tusa lea o le leai oni vaila’au i le Ofisa o le Foma’i Manu i lana matagaluega.”