Ads by Google Ads by Google

Tala I Vaifanua


O se va'aiga i le alo o Amerika Samoa, Col Vasaga Tilo Jr. ma le faletua, lea ua soloa'i atu nei e avea ma Fa'auluuluga o le 6th Field Investigation Unit a le Air Force i Hawaii. Malo le tauata'i ma le fa'atoatoa i tiute, ua fa'aeaina fo'i Amerika Samoa ma Aiga ona o le tautua ma le fa'amaoni. [ata: foa'i]

COL. VASGA TILO JR. TA’ITA’I VAEGA SU’ESU’E AIR FORCE

 

O le aso 11 Iuni sa fa'atautaia ai se sauniga e taua'aoina atu ai le fa'auluuluga o le Air Force 6th Field Investigation Unit i se tasi o alo o Amerika Samoa, Col Vasaga Tilo Jr. mai le afioaga o Aua.

 

Na malaga fa'apitoa atu i ai i le sauniga lona tama, afioga i le Senetoa ia Tilo Vasaga mai Amerika Samoa, ma sa auai fo’i le tofa ia Aumua Amata, le faipule o Amerika Samoa i le Konekeresi a le malo tele.

 

O lenei fesuia'iga o tofiga i le setete o Hawaii, ua fa'aeaina ai fo'i lenei atali'i o le atunu'u ua iloga lana tautua i le Air Force po'o le Fuava'alele a le Malo Tele, ma sa faia i le Joint Base Pearl Harbor Hickam, Aloha Aina Park, Hawaii.

 

E ese mai lea ae sa saunia lelei fo'i le Tusi Pasi e taualoa ai le tautua ua fa'aeaina a lenei alo o le atunu'u e Aumua Amata.

 

Ua fa'ailoa mai fo'i agava'a o lenei alo o le atunu'u i tulaga o suesuega a le Fuava'alele a le Malo tele ma o le ala fo'i lea ua soloa'i atu ai o ia i lea tofiga fou.

 

"Avatu le fa'amalo i lenei alo o le atunu'u, fa'afetai mo lau tautua, ua avea fo'i lau tautua ua fa'aeaina o se pine fa'amau o le ola tautua ai o alo o Amerika Samoa i le vaega au a le Malo Tele. Avea oe ma fa'ata'ita'iga lelei mo isi o fanau uma a le atunu'u o lo'o tausaili ma taumafai i so'o se avanoa o galulue i ai ma le fa'amaoni,” o se toe fa'amanuia lea a Aumua Amata.

 

$5,000 TUPE FESOASOANI MAI FALETUPE O HAWAII MO PISINISI LAITI

 

Ua toe fa'alauiloa mai fo'i e le Faletupe o Hawaii le latou fesoasoani masani i le taua'aoina atu i se pisinisi laititi e talosaga mai mo lea seleni fa'ameaalofa e toe faaleleia atili ai so'o se vaega o lau pisinisi tau atina'e.

 

O le a fuafua lou mauaina o lea tupe pe a sailiilia e le Faletupe o lau fuafuaga fa'ataoto ma le ala o tautua a lau pisinisi e ono fa'aosofia ai atina'e o pisinisi laiti i totonu o le atunu'u.

 

E taga'i toto'a fo'i le faletupe i lau fuafuaga fa'ataoto, i le aga'i i luma o lau pisinisi, pe ono fa'aleleia ai ma fa'atumauina lau tautua, si'isi'i fo'i le tamaoaiga maua mai ai, ma le aoga o lau auaunaga i totonu o Amerika Samoa.

 

Pe afai e te talosaga mo lenei tinoitupe, e le fa'apea ua mautinoa ai lou mauaina o lea fa'atupega, peita'i e ao ina manino lelei au fa'amaumauga uma o lau pisinisi, e iloga ai lou iloa lelei ona fa'atautaia o lau pisinisi i taimi uma.

 

O pisinisi ua mae'a mauaina lenei fa'atupega i tausaga ua mavae, ua le mafai ona toe ulufale i le fa'amoemoe, ae ua mana'o fo'i le faletupe o Hawaii ina ia tofu maua le avanoa e nisi pisinisi e le'i fa'amanuiaina muamua, po'o isi fo'i pisinisi fou o lea fa'ato'a fa'aulu mai a latou talosaga.

 

Ua tu'uina atu le avanoa mo pisinisi e talosaga mo lenei fa'atupega ina ia fa'ao'o mai talosaga a'o le'i mae'a le aso 10 Aukuso, 2018.

 

O pisinisi fo'i o le a fa'amanuiaina i lenei fa'atupega ua talosagaina e le Faletupe o Hawaii ina ia fa'ao'o mai se lipoti e fa'ailoa mai ai, po'o le a se aoga o lenei seleni sa taua'aoina mo lana pisinisi, ma e tatau ona toe o'o mai lea lipoti a'o le'i mae'a le aso 30 Oketopa, 2018.

 

TATALA FONOTELE EFKAS - KANANA FOU IULAI 15

 

O lo ua mae'a gasolo mai le vasega o usufono mai Ekalesia eseese a le EFKAS mai ona matagaluega i fafo mo le Fonotele lea e faia i le ta’ilua tausaga.

 

Ua fa'ailoa mai fo'i e le susuga le Failautusi le tumau i lenei vaitausaga Rev Ioelu Onesemo, "E silia ma le 600 sui usufono i lenei tausaga mo le fonotele, ma ua ta'ilua fo'i tausaga ma usuia fonotele a le Ekalesia, ae ua faia fo'i suiga i nofoaga e usuia ai."

 

I tausaga uma e tauaofia ai fonotele a le EFKAS, e le o usufono mai na'o usufono filifilia mai ekalesia ta'itasi o pulega eseese a le Ekalesia, peita'i o lo'o malaga fa'atasi mai ai ma 'autalavou ma aiga.

 

O lona uiga, o le tutumu o va'alele e aga'i mai o lenei to'atele e le fa'aitiitia lea. O le a a'afia ai fo'i ma le vaitau o femalaga'iga i le taimi e toe malaga ese atu ai lenei to'atele. O lo ua fa'atautaia fo'i i le taimi nei Liki Volleyball a le Ekalesia mo ana tupulaga talavou, ma o lo'o fa'atautaia uma lava i le faleta'alo tele Toe Afua se Taeao, i totonu lava o le lotoa i Kanana Fou.

 

Ina ua fesiligia ni mataupu iloga o le a talanoaina ai, sa tali le susuga le Failautusi le tumau a le EFKAS, "O le mea mautinoa lava, o le filifiliga o tofiga fou a le Ekalesia ae maise ai fo'i o le tofiga o lo'o o'u tauavea nei, aua e le o se tofiga tumau lenei mo a'u. O le a toe palotaina fo'i tofiga mo le Laulauatofi. E mautinoa lava le tulaga o tala'iga ma le tulaga ua i ai i nisi o setete ma a'ai o Amerika ua to'atele ai tagata Samoa o alaala tumau ai. Ae maise fo'i o le tulaga o le tupe, o mea masani lava nei e matele i ai talanoaga ma mataupu i tauaofiaga o le Fonotele."

 

O lala o le EFKAS o lo'o i ai lea i Niu Sila, Ausetalia, Alaska ma Hawaii fa'apea isi Ekalesia i a'ai eseese i Kalefonia ma isi setete o Amerika e o'o lava i Uosigitone ma le Laumua.

 

I le taimi nei o lo'o avea pea le susuga le Faife'au Toeaina Mamoe Eveni ma Ta'ita'ifono, ma o le tausaga lenei ua atoa i ai lona 70 tausaga fa'apea fo'i ma le Fa'afeagaiga o Faletoi Uso mai Vailoatai EFKAS.

 

O le a sui tulaga Rev Elder Saifoloi Fa'aeteete i le tofi Taitaifono ae sailia loa se sui ta'ita'ifono ma isi tofiga uma o le laulauafono, e aofia ai le Failautusi ma le Teutupe lea e tula'i ai le Tiakono Tina Fiasili Haleck.

 

Ona o lenei to'atele ua aga'i mai i totonu o le atunu'u, ua va'aia fo'i le faigata ona toe maua o ni ta'avale Rental ma ni avanoa i faletalimalo i le taimi nei, ae ua matua'i lelei fo'i mo tatou pisinisi o lo'o fa'atautaia fale'aiga ma faleoloa, ona o fa'atauga a i latou ua asiasi mai.