Ads by Google Ads by Google

Tala I Vaifanua


Faatonu o le UH Cancer Center, Dr Randall Holcombe i lana folasaga e tusa o le Falema’i Suesue mo le Kanesa a le Iunivesite o Hawaii lea na te va’ava’aia. Ua ia talia fo’i fa’afesili e tusa o se nofoaga i Amerika Samoa, pei o Guam lea ua tula’i ai lea ituaiga o falema’i ae ua tasi lava le laisene mai le falema’i suesue lea o le Iunivesite o Hawaii. O lana saunoaga, e ao ina silia ma le $250,000. ata: Leua Aiono Frost]

Tamaita’i lalelei o le atunu’u sa auai uma i le fonotaga fa’apitoa e soalaupule ai galuega tima’i, galuega tau suesuega i ituaiga o kanesa ma ona togafitiga o lo’o ua fa’atautaia ina ia fa’aumiumi ai le soifua o i latou o lo ua maua ai. [ata: Leua Aiono Frost]

TALANOAINA KANESA MA SUESUEGA O FAIA MO TOGAFITIGA

 

Ua mae’a le tauaofiaga na fa’ailo o le “INSPIRE” lea sa auai mai ai le tele o e o lo’o autu i ai suesuega tau le Ma’i o le Kanesa, o ala o sailiga o fa’atupega, ae maise o le aotelega o nofoaga uma ua fa’atautaia ai suesuega mo ni togafitiga i le lalolagi, ina ia sofa’i ma tineia ai le Kanesa mai o tatou atunu’u uma i le lalolagi.

 

Peita’i, ua fa’aalia nei, e le susuga le Taitaifono o le American Samoa Cancer Coalition lea sa talimalo i lenei fonotaga taua i Amerika Samoa nei, i le tauaofiaga na fa’atautaia ia Oketopa 03 & 04, 2019,

 

“Ua matua sau le Kanesa i lona malosi, ma ua sofa’i mafutaga vavalalata ma le mafana i totonu o lotoifale o aiga, ua amia ai le ola o le to’atele o e pele ia i tatou, ma ua galulue faatasi nei le ASCCC ma le Galea’i Cancer Foundation, ina ia taua’aoina atu nai fa’amlosi’au e ala i seleni ua mafai ona taulimaina ia i latou ua maua i lea gasegase, tau ina ia totogia ai nai pili o faigamalaga mo a latou talavai. O le aotelega o nei fesoasoani tupe ua taua’aoina mai le 15 o tausaga talu ona amata mai lea fa’amoemoe, ua silia ma le $200,000.”

 

E ese mai lea taumafaiga sa’o ua faia aga’i mo le sui ua maua i le Kanesa, ua ese fo’i le kosi ua fa’amalosia mai e le atunu’u ma nisi o Koalisi e tete’e i le Ulaula Tapaa, fa’aitiitia le Ma’i Suka, fa’aititia le so’ona mamafa o tino, i totonu o le teritori.

 

“O lea ua matua mafuli le malo ae maise o ona tagatanu’u e fa’aalia lo latou naunau e tineia le Kanesa i lo latou taofia atoatoa o le ulaula tapa’a i nofoaga faitele, luga o pasi ma ta’avale la’u pasese, nofoaga fa’atali pasi ma nofoaga o lo’o fa’atasia i ai le to’atele o tagata i le taimi e tasi e pei o Bingo ma isi mea fa’apena. Ua fa’apasia fo’i tulafono e si’itia ai le lafoga totogi e fa’aulufale mai ai tapa’a ma sikaleti e fa’atau i Amerika Samoa. Ua usita’ia nei tulafono ma ua fa’amalosia fo’i.”

 

Ua ia fa’ailoa fo’i, “E to’atolu sui o le Komiti Fa’afoe mo le Koalisi a le Kanesa ua maliliu i le gasegase Kanesa. E le o toe fou ia Amerika Samoa le Kanesa, ua nofouta i latou i le tulaga, afai ua e maua ai, e leai se togafitiga vave e mafai ai ona fa’asaoina oe, pe afai ua tuai ona maua ane ua e Kanesa.”

 

I lana folasaga ua fa’ailoa ai, o le tele o ituaiga o Kanesa o lo’o ua a’afia ai tele tagata o Amerika Samoa, ma ua afenoa ai le faigamalaga a le to’atele ua lisia mai ai le Kanesa o le Susu, Kanesa o le Fa’autama, Kanesa o le Mama ma le Prostrate.

 

I le avanoa sa tu’uina mo le afioga le Kovana e saunoa fa’apitoa ai i lea tauaofiaga mo le Kanesa, sa tula’i ai le afioga le Fa’atonusili o A’oga, Dr Ruth Matagi-Tofiga, sa ia talatala fo’i ona o’otiaga fa’atasi ma nai ona uso ma tuagane, ona o le amia fo’i o lona tina i lea gasegase fita.

 

“O le Kanesa na te le fa’atuaoia lana fasi. Ua avea o e pele i o tatou loto ma agaga. Ua avea fo’i ma lalamua i mafuaga o le maliliu o le to’atele. Ua fa’afetaia lenei tauaofiaga, ina ia soalaupule i ala e fa’afaigofie ai ona fa’atula’ia ni falema’i suesue fa’apitoa o ni togafitiga o nei ma’i faigata.”

 

O e na auai mai i lenei tauaofiaga, e aofia ai le tama’ita’i suesue i togafitiga o le Kanesa mai Ausetalia, le sui saeanisi suesue fo’i mai Kalefonia, o le Pule ma le aufaigaluega o le UH Cancer Research Center, ae maise fo’i le sui mai Samoa sa ia folasia fo’i le tulaga o i ai suesuega ma togafitiga fa’apea ma le aotelega o le atunu’u o Samoa ua a’afia i le Kanesa, ma ua o mai fa’atasi ma sui mai le tatou fo’i nei malo i lea fonotaga taua.

 

PASIA HOPE DIALYSIS - UA FAATAGA FOI E LE CMS A LATOU PILI

 

Ua asiasi mai sui o le Centers for Medicaid and Medicare (CMS) a le fetarale i le  Hope Dialysis Center ma ua fa’afiafiaina i latou. E muamua ona pasia le nofoaga ina ia mafai ona va’aia e gasegase fa’amama toto le foma’i agava’a ua mae’a galue punoua’i ai mo le suesuega o le toto o i latou ua aga’i atu e fia fa’aaogaina fo’i lea falema’i mo latou togafitiga.

 

I le taimi nei ua tatalia nei e i latou le fa’atonuga mo i latou i ala e pili ai togafitiga mo e gasegase o le a togafitia e i latou. Peita’i ua fa’ailoa mai fo’i, ua leai se pili mo i latou e fa’amama toto pe afai o gasegase nei ua mae’a agava’a i le Medicare, po’o sui fo’i e i ai o latou Inisiua ma’i.

 

E to’alima i latou ua mae’a faia suesuega o latou toto, talatalanoa vavalalata ma le ali’i foma’i fa’apitoa o Fatuga’o Dr Letarte, ma ua fa’atulaga fo’i o latou togafitiga ina ia mautinoa lelei, o lo’o talafeagai ona fa’amama ma tulaga o lo’o i ai o latou toto.

 

Ua fa’ailoa mai, ua mafai fo’i ona piki mai e le tautua a le “Dial A Ride” gasegase mai le falelima i sasa’e ma le falelima i sisifo i so’o se taimi lava ua fa’atulaga mo lau talavai. Peita’i e ao fo’i ona mae’a feutaga’i oe ma le falema’i ona fa’atulaga ai lea o lou taimi fa’apitoa mo ta’avale nei e te malaga mai ai i aso uma mo ou togafitiga.

 

SIITIA AOFA’I PENEFITI & AOFA’I TUPE MAUA MO LE FOOD STAMP

 

O le vaiaso ua te’a sa fa’alauiloa ai e le DHSS suiga i le Food Stamp, lea ua si’itia ai penefitis ma le tupe maua.

 

Amata ia Oketopa 1, 2019 ua si’itia ai i luga o le aofai o le tupe maua e agava’a ai, mai le $1,008. sa i ai i le $1,718.

 

E ese mai lea ua i ai fo’i aiaiga tau le tagatanu’u e ao ina e agava’a ai. I latou o sitiseni o Amerika Samoa ma Amerika po’o se isi lava teritori o Amerika o alaala iinei, ma i latou fo’i ua mae’a atoa le 5 tausaga soso’o o nofo mau i Amerika Samoa, ae ua silia fo’i ma le 55 tasuaga o le matua mo sui matutua ua agava’a fo’i i lenei alamanuia.

 

Fa’ailoa e Muavaefa’atasi John Suisala lona agaga fiafia tele ina ua talia e le fetarale le talosaga a Amerika Samoa. “E fai lava si toatele o nai matua matutua e matua mana’omia lenei fesoasoani, ae ua na’o le pau lava lea o le mea ua toe taofia ai, ona ua tele latou tupe maua i le $1,008 sa i ai.

 

O le suiga la nei i penefiti o le a maua pe afai ua e agava’a i lenei alagamanuia:

 

Tupe Maua:      Penefiti:

 

$0 – $343.              $139

 

$344 - $687        $111

 

$688 - $1,032      $89

 

$1,033 - $1,375        $71

 

$1,376 - $1,718     $56

 

Fa’afetaia fo’i e Muavaefa’atasi i latou o sui tofia o le Komiti na fonoa ma latou aumaia ai le fa’aiuga i le si’itaga fou ua i ai nei, aua ua latou aumaia se suiga lelei tele mo le soifua lautele o i latou o le a fa’aopoopo fo’i i lea tautua.