FAAILOGA MO MALAKAI SEVAAETASI & MOLIMAU PATINO ATA GAOTEOTE

I le sauniga fa’apitoa e fa’amanatu ai le to’a 34 na maliliu i le Tsunami tele ia Setema 29, 2009, lea sa fa’atautaia e le Rotary Club o Pago Pago ma ana paaga, sa toe tepa ai le atunu’u i le tulaga faigata talu mai lea Galulolo.

Na o’o mai le sui o le One Global Family Foundation (OGFF), Laura Lafoia Ava-Tesimale, e fa’ao’o mai so latou valevale alofa mo nisi o fanau nei ua lutia o latou olaga talavou, ona ua maliliu matua i le galulolo. O lea alofa e ala i sikolasipi.

O le ali’i talavou o Malakai Seva’aetasi na avea ma se tasi na maua lana fa’ailoga fa’asikolasipi e $300. “Ou te mana’o ina ia e alu i le Kolisi, aua ne’i e fa’avaivai i lau a’oga, aua o le fa’anaunauga lena o so’o se matua mo lana fanau,” o le tala lea a Tesimale ia Malakai e 11-tausaga ma o lona tina ia Sabrina sa maliu i le galulolo

Fa’alauiloa fo’i e le Rotary Club o Pago Pago ma ana pa’aga, o le toe tausaga lenei e fa’amanatuina ai e i latou le Tsunami i tausaga ta’itasi, peita’i sa fa’ailoa e Tesimale, e fa’aaau pea ona faia a latou foai sikolasipi.

O se tasi fo’i o tama’ita’i talavou na maua fo’i lana sikolasipi mai le OGFF o Edwina Tanielu, o lona tama sa maliu i le galulolo. I lana molimau i lea aso, “O lenei lava le taimi e fa’ato’a mafai ai ona ou tautala i le igoa o lo’u tama.”

O nisi o i latou sa sao mai i le galulolo sa latou fa’ailoa mai i le Samoa News o latou manatu, e aofia ai Ata Gaoteote, le faletua o le galuega a le AOG i Leone.

“O la’u ta’avale, na maua tonu mai lava a’u a’o aga’i atu i Pago Pago i magatolu e alu i Fagasa. Aga’i atu la’u fa’avale ma ua le iloa se mea, pau le mea ua va’aia o le lanu moana o le lagi, ae o ao o le lagi e va’aia ua pa’epa’e ma ua punitia ai le lagi lanumoana. Pupula to’a atu pea i se mea e aga’i i ai, ae ua tu le ta’avale, aua ua le va’aia se ala. Na’o se togi e tasi ua pa i le tioata o le ta’avale ma va’aia ai le gasolo ese atu o ao papa’e, ae va’aia le alatele ua sa’onoa atu aga’i i luma, fai mai le mafaufau, alu le ta’avale. Alu le ta’avale e le’i pe lava, ae fa’alogoina le fe’ei mai o le ta’avale i o’u tua, o le ta’avale a le faife’au i Lauli’i ma le fanau, o lo’o fia topetope aga’i atu i Lauli’i, ona ua na’o le tina o le aiga o i ai.”

Alu le ta’avale ua le mautinoa poo le a le saoasaoa o alu ai, ae toe va’aia le punitia fo’i o le alatele, ma ua le iloa se mea, tu le ta’avale ma pe ai le afi o le ta’avale. Le mautinoa pe o le a le umi, ae toe togi mai fo’i le fa’ata o le ta’avale ma ua va’aia, le malama mai, ua foliga o lo’o malaga i le lagi, ua gagase mai vae, ua foliga e tu le vae i le vae kesi ae le mafai ona oomi le vae kesi, tatu’i ai lava le vae se’ia fa’alogoina ua mafai ona o’omi le vae kesi ma toe alu ai le ta’avale. Taimi fo’i lea ua fa’alogoina ai fo’i le fe’ei mai ma le tauvala’au mai a le faife’au i lana ta’avale i o’u tua, e alu le ta’avale.

“O’o tonu mai i lumafale o le au Foster i Pago Pago ae ua alu pea lava le ta’avale, a’o le’i o’o atu i le ASPA ae toe tau mai galu maualuluga ma toe ta la’u taavale toe fa’asaga mai Fagatogo, ae va’aia autafa ua matala mai le ala i luga o le mauga o le itu i tu’ugamau. Vala’au mai ma le Faife’au, “Ata alu le ta’avale i le mauga, oso ai i lena fa’atonuga ma sao mai ai le tetele o fatiga o peau o le sami. Lagona i lena taimi le vaivai o le tino, ua le fa’alogoina se mea e tasi i le tua. Peita’i ina ua toe maua le masele, toe oso mai e alu aga’i i Vatia, ae va’aia ai le va’a tele ua poloka ai le alatele i lumafale o le ASPA i Satala. Ina ua kilia le ala e mafai ai ona fa’aauau le malaga i Vatia, ma oso mai loa le ta’avale ma aga’i atu i tua, ae le mailoa, ua leai se fale atoa e nofo ai. Peita’i e le o mea ia na taua, a’o le ola o le mamalu lautele. O a fo’i mea sa va’aia, e le’i anoanoa e le mafaufau vaivai, peita’i, ua le iloa le maualuga o le mauga o Afono ma Aua, ae ana fa’apea e fa’aletonu le afi o le ta’avale, o au le isi e saili e si o’u aiga.”

“E mautinoa e i ai faiva na toe tu’u mai e fa’atino i lenei vaitau o le olaga. O le tama o le aiga sa i Honolulu i le taimi o lea galulolo. Peita’i, na o’o ma le manuia le malaga i Vatia, oso i fafo mai le ta’avale ae patatu i tuli, e foliga mai ua leai ni vae. Ae le’i tau lava se loto i le fale ua leai atoa, ua na’o si a’u tama ua taumafai mai e fa’ailoa mai, o ta’ua ua leai se mea e momoe ai, ta o i le mauga e mapu atu i ai.”

“O le mae’a ai o mea uma, e tusa lava ma le lua vaiaso o pei o se tasi ua le toe tautala so’o, ua o’o mai fo’i le tama o le aiga, ae na’o le taumafaiga lava e toe tata uma lavalava ma mea na maua mai le sami ua tafefea i ai, e fa’amama ma toe fa’aaoga. E le’i tele se mea na toe fa’atau, sa toe fa’aaoga lava mea tua ua mae’a ona fa’amamaina lelei. I so’u manatu i nei ituaiga o taimi, o a’oa’iga mea uma lava mai le Atua. O se toe fa’amama fo’i a le Atua ia i tatou i le agaga fa’apea ma le tino, ae ese ai fo’i ma le toe fa’amama i le si’omaga o tatou o ola ai.”

LAGONA USUFONO PICP AOGA FESO’OTA’I MA TA’ITA’I O AFIO’AGA

Ona o i tatou na talimalo i le fonotele a Taitai Leoleo ma Komesina o Leoleo a Malo o le Pasefika (PICP) lona 48, lea na maua ai fo’i le avanoa o ta’ita’i o le tatou atunu’u, le afioga le Failautusi o Mataupu Tau Samoa, le afioga le Ma’oputasi Mauga Tasi Asuega e fa’asoa atu ai ona lagona e tusa o le auau o nei fonotaga, “ia matua fa’aitiitia lava ma taofia le fefa’ataua’i o fuala’au fa’asaina ma vaila’au o’ona i le atuvasa.”

I se lopoti a le PICP o lo’o fa’ailoa ai le saunoaga a Mauga i lea fonotaga. “O le alofa e le ‘alo ai lagona fa’aalia, i le tulaga o’otia o i ai le atunu’u ona o fuala’au fa’asaina ma vaila’au o’ona o lo ua fefa’ataua’i i ona laufanua, pe a mae’a taula mai i fela’ua’iga i va’a po’o feoa’iga fo’i a va’alele, mai lea malo ma lea malo e fia fa’atuina i o matou tagata i lo matou nei malo.”

O le auau o lana folasaga, “O a’afiaga o le Atunu’u ona o soligatulafono tau fuala’au fa’asaina ma Vaila’au O’ona.”

Ua fa’atulaga fo’i le isi fonotaga o soso’o mai a le PICP lona 50 o le a faia lea i le Malo o Fiti ma ua fa’atulaga fo’i e talimalo le Malo o Fiti i lea fonotaga tele 2020.