TOE MANATUA LE GALULOLO - SETEMA 29, 2009

O le aso ananafi, Setema 29, sa fa’amanatuina ai le 10 tausaga talu mai ona sofa’i le nofo filemu o le atunu’u ina ua lutia ile mafui’e tele ma tomuli mai ai le Tsunami po’o le galulolo tele ia Setema 29, 2009, ma amia ai le soifua o le to’a 34 o tama, tina ma fanau i le teritori o Amerika Samoa.

Ua le mafai ona galo, aua o lo ua matua tuia le atunuu i le tui sili ona matuitui ina ua amia ai pelega i lea lava fa’alavelave fa’afuase’i ma le matuia. Ua tele fo’i le lesona ua maua mai ai e le atunu’u, ua nofouta i mea e osotatau ina ia faia, pe a fa’alogoina se fa’ailo, ua lalata mai galulolo.

Ua mae’a fa’aalia se fanoga o le afioga le Matua, Togiola Tulafono, aua o ia sa tula’i mai o le Kovana o le Faigamalo a Amerika Samoa i le vaitau. Ua ma’ea fa’ailoa mai e ia mo i latou uma o loo nafa ma tapenaga ina ia ta’imua atu e fa’ao’o se fesoasoani i le mamalu lautele, “Ia a’otau outou i faiva eseese ina ia outou nofouta i le fa’atulagaga ma le fa’agaoioiga o tautua eseese e ao ina fa’ao’o i tagata i taimi o nei pagatia, ae ia outou sauni lava ma le silafia lelei, o taeao e ao ona fa’ataunu’u ai nei tiute uma.”

O se tima’i lelei lea, aua mo le tapena, ua mae’a manumalo i le afa o le taua!

O le sauniga tatalo a le malo e fa’amanatuina ai le Galulolo o le 2009 sa faia i le taeao o le aso Toanai ua te’a i le Veteran Memorial Center i le Tafuna Industrial Park. Ma sa auai le afioga i le kovana sili, sui o lana kapineta ma nisi o le atunu’u ae maise aiga o i latou sa maliliu i le Galulolo.

O le aoauli o le aso To’anai sa faia ai le sauniga a le Kalapu a le Rotary i Pago Pago, ma le Hawaiian Airlines i le nofoaga i le Lions Park.

O le afiafi ananafi sa faia ai le sauniga i le afioaga i Leone, lea e to’a 12 o i latou ma ua maea fo’i ona fa’atula’ia le latou ma’a faamanatu i le Healing Garden I Leone lava.

I se lagona fa’aalia o Kovana Lolo Matalasi Moliga i le 10 ai lenei o tausaga o le Galulolo o le 2009, sa ia taua ai i se tusitusiga i le vaiaso ua te’a, e fa’apea, “E ui lava ina o lea ua atoa le 10 tausaga talu ona tula’i mai lenei fa’alavelave mata’utia, ae o lo’o tumau pea le matuitui o manu’aga ae maise lava o fa’anoanoaga i soifua o tatou tagata na afaina ai. O le upu moni, o le a le mavae lava i o tatou loto o latou suafa ma uiga.”

“O le a tumau pea la tatou  tatalo fa’aauau i le Atua mo lana fa’amalosi ’aua o tatou lagona pea le mafatia ona o lo latou mavae fa’afuase’i atu. E maua lo tatou malosi pe a faitau atu i upu a le Fa’aola o lo’o fa’amauina i le Tusi o Ioane 11:25, o lo’o fetalai ai Iesu ia Mareta i le maliu o lona tuagane, “O a’u nei o le toetu ma le ola, o le fa’atuatua mai iā te a’u, e ui lava ina oti ae ola lava ia.”

“Na fanau mai i lea lava fa’alavelave la tatou ta’utinoga i le alagatatau ona faia tulaga uma mo le saogalemu ma le puipuia o tatou tagata ma meatotino i le toe tula’i mai o sea ituaiga fa’alavelave fa’alenatura. Ole a va’ava’ai toto’a i ala uma e lavea’ina mai ai ola o tagata, e ala i le toe asia ma toe iloilo fuafuaga ua fa’ata’oto mo lea lava fa’amoemoe e tasi,” o se feau lea a le Kovana mo le atunu’u.

MANAOMIA SOIFUA MALOLOINA FESOASOANI TINEIA LE MUMU

UA toe fa’asolo mai le inumaga lona lua a le gasegae o le Mumu Tutupa i Amerika Samoa, ma ua matua nofouta foi le vasega o tagata tausimai ma foma’i ua nafa ma le fa’ainumaga o nei fuala’au, o lo ua fa’atulaga fo’i nofoaga fa’apitoa e fa’atauaia ai inumaga o fuala’au, ae maise o asiasiga a i latou i nisi o afioaga maotua mai le alatele, ina ia fa’afaigofie i le mamalu o aiga ni auala e o’o atu ai inuga o fuala’au ia i latou.

O le aso Sa na te’a nei sa fa’atautaia ai le sauniga lotu tele i le Ekalesia Metotisi i Nuuuli, ina ia talosia ai fa’apitoa taumafaiga uma a le Matagaluega o el Soifua Maloloina, ia ausia le to’atele o le atunu’u i le fa’ainuga o fuala’au e fa’amautu ai le mau, “Ua tineia le Mumu Tutupa i Amerika Samoa.”

O le ali’i foma’i o Aifili John Tufa sa ia fa’ailoa maia le tele o le galuega o le a nafa nei ma le Matagaluega, lea o le a tala faauto i tafa uma o le atunu’u ina ia inumia e le to’a 80% o le faitau aofai o le atunuu nei fuala’au o le Mumu Tutupa.

O le tausaga ua te’a na fa’amauina ai le to’a 30,500 tagata na inumia fuala’au nei o le Mumu Tutupa. O le tusa lea ma le 73% o le faitau aofai o le atunuu.

O i latou uma nei na inumia fuala’au o le Mumu i le tausaga ua te’a, e ao fo’i ona toe iumia e l latou fuala’au fo’i o lenei tausaga ina ia mautinoa, ua aoga le fuala’au i lona tino.

Ua fa’ailoa mai ua i ai nisi e fa’ainumia fuala’au mumu nei i Fa’asao Marist High, Leone High, Pavaiai Elementary atoa ai ma le aoga foi a le afio’aga i Amaluia Asili ma Leone.

O lenei kemupeni ua fa’atulaga e mae’a lelei i le aso muamua o Novema, 2019, ma ua fa’ailoa atu i le vasega o matua, e alofagia ma ia sainia pepa tui ua malaga mai ma latou fanau mai latou aoga, ina ia inumia ai e i latou fuala’au nei o le mumu.

PASIA MAOTA MAUALUGA SUI KOMITI FA’AFOE O FEMALAGA’IGA

E to’atolu sui na fa’aulu e le Kovana e fa’apasia e le Fono Faitulafono mo le Komiti Fa’afoe o Femalaga’iga. O i latou nei e aofia ai le afioga i le senetoa Fa’amausili Mau Mau Jr, afioga faipule Gafatasi Afalava, ma le fa’atonu o le Ofisa o le Property Management, Niumata Malo.

O le vaiaso ua te’a sa pasia ai e le Maota Maualuga i latou nei, ina ua ma’ea le iloiloga a se komiti a le Senate. I lea iloiloga sa fa’aalia ai e le afioga senetoa Fonoti Tafa’ifa Aufata atugaluga ona ua matua fa’ateleina lava le ulufale mai o tagata mai Asia ma alatalata tumau i le tatou atunu’u.

Ae na tali Gafatasi “E le o taofia e le tulafono le ulufale mai o tagata mai Asia poo se isi atunuu i le tatou Malo. Peita’i e ao ile Komniti Fa’afoe ona va’ai toto’a i tulafono e aiaia ai le ulufale mai ma nonofo mau o ni si ua ulufale mai.”

Fa’ailoa e Fa’amausili ua tele i latou na o mai ua ova le taimi e nonofo ai iinei, ma ua tatau loa ona tipotia i latou.