PILI FA’AAUAU ONA MAUA MEDICAID 100%

O le vaiaso ua te’a na pasia ai le Maota o Sui o le Konekeresi le pili a le fetarale, o lo’o aofia ai le aiaiga e fa’aauau ai ona fa’atupeina e le fetarale e 100% le Medicaid for Amerika Samoa mo le isi 8 vaiaso. Ua auina atu nie lea pili i le Senate a le Konekeresi mo la latou iloiloga ma fa’aiuga.

O le tulafono fetarale i le taimi nei, e fa’amuta i le aso 30 o Setema, 2019, le fa’atupeina 100% e le malo tele le Medicaid for Amerika Samoa ma isi teritori.

Saunoa le faipule o Ameirka Samoa i le Konekeresi, o lo’o va’ava’alua ma nisi e fa’aulu lea pili, “O le a mafai ai ona fa’aavanoa mai le faitau miliona o nisi tupe mo le Falema’i e faia ai latou suiga lelei e ao ina fa’aleleia atili ai le tautuaina o tagata o le atunuu, fa’alautele nisi o tautua o lo’o fa’aitiitia ona o fa’atupega, ae maise ia lelei ona tausia le soifua maloloina o tagata uma o lo’o gasegase ma faia talavai i le tatou falema’i.”

O lenei soso’oga ua pasia nei ua mafai ai ona maua le taimi lelei e soalaupule ai le Maota ma le Senate a le malo tele i a latou iloiloga mo le pili fa’aulu lea, aua o le aotelega o le seleni ua fa’aavanoa mai mo le LBJ pe a pasia lea pili ma maua le 100% fa’atupega a le falemai, e tusa ma le $84miliona i le tausaga.

“O lea vaega tupe tele, ua fa’aluaina ai le tupe sa talosagaina e Amerika Samoa ia Iuni o lenei tausaga, ae tatou tapua’i lelei, e ao ina pasia fo’i e le Senate a le Malo tele le fa’aupuga o le pili lenei,” o sana tala lea.

TOTOGIA MEDICAID NOFOAGA E NONOFO AI MA’I MALAGA I NIU SILA

Ua fa’ailoa e le fa’atonu o le ASG Medicaid Office, Sandra King-Young i le kovana se tala fiafia e fa’apea ua mafai nei ona totogia e le Medicaid nofoaga e alaala ai e gasegase pe a malaga Niu Sila mo talavai i le “Off Island Medical Referral Program.”

E tolu masina o lo’o feutaga’i lenei tulaga ma ua i’u lava i le manuia, ina ua talia mai e le CMS lea talosaga mai Amerika Samoa lea na fa’aulu ia Iuni 28, 2019 ae o lea ua fa’ato’a talia mai ia Setema 18, 2019.

Fa’ailoa e King Young, “Mai le amataga o lenei polokalama ua malaga ai nisi i NIu SIla mo togafitiga, na faaaogaina e le Medicaid le 100% o tupe mai le $2miliona na totogia mai e le Malo o Amerika Samoa mo le nofoaga e alaala ai le Ma’i.”

“Mai le amataga o le polokalama lenei, sa mua’i taumafai muamua e fa’amautu le iloa ma le naunau o tagata o le tatou atunu’u ina ia si’ima’i i Niu Sila, e lelei fo’i a latou togafitiga o i latou, ma sa malie ai le Malo e totogia le 100% o le nofoaga e alaala ai le ma’i, ae le taulia ai mea taumafa, e tatau ona fa’atau e le Ma’i ana ia pili.”

“Ina ua faia lea, ua iloga mai ua matua fiafia tatou tagata e agai i Niu Sila ona o le taugofie, ona sa tatau fo’i ona totogia e le sui gasegase le vaega o lana pili, ia gatusa ai ma le fa’atupega ma ona aiaiga sa sau a’i.”

“O le ulua’i iloiloga fo’i o le OMRNZ  i le tausaga e 2014, na aveesea ai le totogia o le nofoaga e alaala ai le ma’i a’o faia talavai, ona ua faailoa mai e le talia, lea la na talia mai lea tulaga i le tausaga 2017.”

“Peita’i, ua toe talosagaina lea vaega na to’esea o le aiaiga i lenei tausaga, fa’afetai lava ua talia mai. Ua toe fa’ailoa mai e le CMS, ia toe fa’aulu atu lea talosaga SPA na to’esea mai le aiaiga muamua, ma ua pasia mai ai nei.”

Na fa’ailoa e King-Young, ina ia ua amata aiaia le faia talavai i Niu Sila, OMRNZ, na faia lava ma le aiaiga e tatau ona i ai ma le vaega lea SPA, e totogia ai ma le pili.

“Ua matua fa’afetaia lava e i tatou uma lenei vaega ua toe pasia mai mo le totogia o nofoaga e alaala ai tagata gasegase a’o fa’atautaia talavai i Niu Sila,” o sana tala lea.

Faafetaia e ia le sapaia malosi mai a le fono faitulafono i le latou fa’apasia mai o le $2milion e fa’atupe ai le nonofo o tagata gasegase ma faia talavai i Niu Sila, a’o saili lenei avanoa e toe talosaga ma pasia mai lea fa’atupega.

FESILIGIA FA’ATUPEGA FALE MATA’AGA & FOA’I MANU SAMOA

I le iloiloga o le tupe fa’asoasoa a le malo mo le tausaga tupe fou 2020 e le Fono Faitulafono sa fesiligia ai le $800,000 e fa’atupe ai le fausia o le Fale Mata’aga fou, lea sa tatala i le masina ua te’a.

O le fesiligia o lea vaega tupe sa saunoa i ai le afioga i le Senetoa ia Magalei Logovi’i i le taimi o le iloiloga o tupe fa’asoasoa o Polokalama Fa’apitoa a le Kovana, aua na saunoa le kovana, o le vaega tupe lea sa fa’atupe ai lea galuega.

O le tamaitai Fa’atonu o le Tupe Fa’asoa a le malo, Cathy Saelua, na ia saunoa “O le $500,000  mai le Paketi fa’asoa o le tausaga fa’aletupe 2018 na fa’atulaga lava mo le fausaga o le Fale Mata’aga, lea ua fa’aaoga, peita’i ua toe fa’aaoga atu i ai ma le $300,000 o le tupe fa’asoa o le FY2019 e maua ai le tauaofai e $800,000. sa fa’aaoga mo le Fale Mata’aga.”

Sa talosaga Magalei i se lipoti tusitusia o lea mataupu ona o lo’o ia fesiligia le aofaiga o le tupe i lalo o le Special Program mo lea galuega.

Sa lagaina foi i lea iloiloga, e le afioga Senetoa ia Fonoti T. Aufata le vaega tupe sa fa’atupeina ai le $100,000 lea sa ave e le kovana i le Manu Samoa.

O le sui o le Ofisa o le Kovana, Fiu Johnny Saelua sa ia fa’ailoa o lea tinoitupe na toina mai e le Kovana mai lana tupe fa’asoa e pule ai lava ia i lona fa’aaogaina.

Sa fa’apupula e Magalei, “O le tupe fa’asoa lea e tuuina fa’apitoa i le Kovana e na te fa’asoaina i so’o se mea e manatu ai o ia”.

O lea vaega tupe e pei ona fesiligia e taua o le “Governor’s Contingency Fund”, lea o lo’o i ai le aofaiga e $300,000 mo le tausaga tupe lenei 2019 ma o le aofaiga foi lea mo le tausaga tupe fou.

Saunoa Fonoti, “Ia outou nofouta i le tulaga so’ona faaaoga o tupe a le teritori, e le mo se tagata e to’atasi, e tatau ona outou iloa e le sa’o ona so’ona fa’aaoga tupe e mo le lautele o tagata uma o le atunu’u.”