Ads by Google Ads by Google

Tala I Vaifanua


Fa’atonusili o le Matagaluega o Fefa’atauaiga, Keniseli Lafaele, ma se tasi o sui o lona ofisa i le iloiloga o le tupe fa’asoasoa a le matagaluega i luma o le komiti a le Fono. [ata: FS]

FA’AILOA KENISELI LAFAELE VA’ALELE FOU INTER ISLAND AIR FAAIUGA 2019

I se ripoti a le Fa’atonu o le Matagaluega o Fefa’ataua’iga, Keniseli Lafaele, i le taimi o le iloiloga o le tupe fa’asoasoa a lana matagaluega, sa ia fa’ailoa ai le tulaga o le va’alele fou a le Inter Island Airways.

“E i ai le fuafuaga o le a va’aia e le mamalu lautele le va’alele fou a le Inter Island Airways i le fa’aiuga o lenei tausaga. O i latou lea sa taua’aoina i ai le $400,000. a le State Small Business Credit Initiative, o se vaega tupe e fesoasoani e fa’aleleia atili ai tautua a pisinisi laiti i le teritori,” o sana tala lea.

O le va’alele e faaoga i feoaiga i le va o Tutuila ma Manu’a ma o le tausaga ua te’a sa tuuina atu ai lea vaega tupe i le kamupani valele.

“Ua tulata ina mae’a sainia ma aiaia se maliliega i le va o le Kamupani o lo’o fesoasoani i le fa’atauga o lea va’alele fou lea a le Inter Island Airways, aua o le tauaofa’i o lea vaalele e $10miliona,” o se fa’amalamalamaga lea a Lafaele ina ua fesiligia e le komit.

O nisi mataupu na tali ai le susuga le Fa’atonu, Keniseli Lafaele, o le tulaga tau eleele lisia mo le Industrial Park i Tafuna, lea ua tau matauina ua nonofo mau ai nisi. Peita’i na tali Lafaele, “E leai e le o fa’atagaina nisi ona nonofo i lisi nei i le Industrial Park.”

Na fesiligia fo’i e Fetu Fetui mai Manu’a,  le tulaga o lo’o taua’aoina ai avanoa e lisia ai nei eleele e fa’atutu ai pisinisi i le vaipanoa lea, “Ua fai si leva o talosaga e lo’u fo’i faipisinisi se eleele, ae le o maua mai lava so’u fasi fanua, ae o lo’o matauina, ua tele avanoa i nisi pisinisi, ae matua leai lava i nisi ua loa o talosaga, ma e fou fo’i o lo’o fa’atutu isi pisinisi i eleele fou i’ina.”

Na tali Lafaele, “E le’i o’u mautinoa o lo’o i ai sau talosaga mo se eleele, ae afai ua i ai se talosaga tusitusia mo se eleele e fa’atu ai lau pisinisi, o le a sailia fo’i ma toe fa’ao’o mai se tali.” Peita’i e le o le agaga lea e tatau ai ona faia galuega nei, o le talosaga mai so’o se tagata faipisinisi e tatau ona fa’ailoa mai fo’i se tali vave i lana mataupu, i so’o se taimi.

$661,550 FA’ATUPEGA HOMELAND SECURITY SAUNI MO GALULOLO

Fa’ailoa e le tatou Faipule i le Konekeresi, Aumua Amata, ua mautu le vaega tupe e $661,550 mo le Matagaluega o le Puipuiga o le Saogalemu Fa’alotoifale (ASDHS)o le tatou malo. O lea tupe mai le fetarale mo tapenaga aga atu i Galulolo i le atunu’u.

Ua to’ai pasia tonu mai le taua’aoina o lea vaega tupe i le masina o lo’o fa’agasolo ai fo’i fa’alauiloaga o galuega lavea’i ma tapenaga mautu a lea matagaluega ina ia nofouta tagatanu’u uma ma pisinisi a le tatou Malo i mea e ao ina faia, pe a o’o ina tali atu i fa’alavelave fa’afuase’i ta’u Galulolo.

E le gata ai na’o galulolo, ae ua faia fa’atasi atu ai ma fa’ailo ma tapenaga uma e nofouta ma tima’ia ai le atunu’u i ona tagata lautele, pisinisi ma fa’alapotopotoga eseese e fa’ataututu le tulaga o so’o se ituaiga o fa’alavelave tutupu fa’afuase’i fa’anatura pe o ni faiga fa’aterarisi fo’i.

Ua fa’afetaia e Aumua le mata’alia fo’i ole afioga le Fa’atonu Semo Veavea Samana ma le aufaigaluega a le ASDHLS, e fa’ataunu’u nei tima’iga uma, ina ia mautu le iloa e le atunu’u o gaoioiga fa’ata’alise e faia pe a o’o mai nei taimi tuga o le soifuaga.

O le alagatupe mai le NOAA National Oceanic Atmospheric Administration mai le Matagaluega o Fefa’ataua’iga a le Malo tele, ma e ao ina fa’aaoga leleia e tima’i ai le atunu’u i so’o se agava’a e mafai ai ona fa’aitiitia le afaina tuga i taimi o fa’alavelave fa’afuase’ia fa’anatura pe fa’aterarisi fo’i.

Ua taua’aoina fo’i lea fa’atupega fa’atasi ma sona vaega o le seleni e mafai ona fa’atautaia ai a’oa’oga, fonotaga e fa’alauiloa ai gaoioiga tatau i taimi e sofa’i mai ai fa’alavelave fa’afuase’i i le teritori, ma sona vaega e fa’alauiloa a’ia’i ai ia silafia e le atunuu atoa nei tima’iga ma a’oa’oga fa’apitoa.

E tatau fo’i ona fa’atautaia ai ma ni fa’amaumauga tamau o fa’afanua o vaipanoa uma o le teritori e afaina i fa’alavelave fa’afuase’i, se sailini e fa’aleo ai le fa’ailo ia silafia e tagata lautele o lo ua tulata mai a’afiaga i fa’alavelave fa’afuase’i o so’o se ituaiga, atoa ai ma le fa’alauiloaga o nei auaunaga uma e mafai ona fa’ao’o mai e le matagaluega i tagata lautele, pisinisi ma fa’alapotopotoga o so’o se ituaiga i taimi tuga nei o le soifuaga.

MALIU PALEMIA O TONGA I NIU SILA - PM AKILISI POHIVA

O le amataga o le vaiaso na te’a na fa’ailoa mai ai le maliu o le afioga le Palemia o Tonga, Akilisi Pohiva, ma o ia fo’i o lo’o tula’i mai i lea tofi taua mo lona malo, i lenei vaitau, ma ua lua ai lea o ana nofoaiga soso’o talu mai fo’i ona mua’i tofia i le tausaga e 2014.

Peitai e le na’o le pau lea o se mea ua iloga ai le tautua ma le auaunaga a Pohiva i lona atunuu ae maise i ona tagatanuu lautele. O ia lea e lalamua tele i le taumafaiga a le mamalu lautele o tagata Tonga ua filifilia e fia suia le latou faigamalo i le faigamalo fa’a-Temokalasi. Peita’i e le’i mafai lava ona latou soloia le faigamalo fa’amonaiki lea e fa’atautaia ai pea le malo o Tonga, ma o le pau lea o le malo fa’amonaiki i le Pasefika atoa, e pulea e se Tupu.

O le fua fo’i lea o le sapaia e ona tagata lautele o Akilisi, ua fa’alua ona soso’o ona tula’i mai e avea ma Palemia o lona malo talu mai le 2014 na mua’i malo ai i lena tofiga.

O lona gasegase na fa’ao’o atu ai o ia i Niu Sila mo ni togafitiga, ua foliga mai e pheumonia, peita’i ua maliu o ia ina ua afaina lona ate.

E ui ina tuai ona tino mai lona fa’amoemoe i le suia o le faigamalo a lona atunu’u i faiga faa-temokalasi, ae mautinoa ua tele se suiga ua mae’a ona a’afia ai le Malo a Tonga, talu ona mua’i taumafai o ia mo nei suiga tetele.

Ua ia mua’i alauta suiga lelei mo ona tagata lautele, aua e le o faigofie lea lava mau i loto o ataga nopele ma ta’ita’i o le malo fa’amonaiki o i ai nei. O suiga iloga na i totonu o le faigamalo a Tonga na fa’ato’a mafua ai ona mafaia ona filifilia o ia e avea ma Palemia o le Malo o Tonga i le tausaga e 2014.

Na fa’aalia fo’i le finagalo o’otia ma le agaga fa’avauvau o le afioga le Kovana Sili Lolo Moliga, ona o le amia o se tasi o ta’ita’i o le atunuu tuaoi o Tonga i lenei vaitau o lana nofoaiga. O lo’o ua molia fo’i le fa’amaise a lana afioga le ta’ita’i o le tatou malo i le malo o Tonga ona o le vala’auina o lana auauna Palemia, a’o galue pea. O Tonga fo’i, o le isi lea malo o loo feololo foi si to’atele o tatou uso e malaga mai ai, o loo tatou papa a’ao fa’atasi ai i le tatou teritori nei.