Ads by Google Ads by Google

Tala I Vaifanua: Tulaueleele 6 Va’alele E - US Marines & Fitafita 55


O le taimi na feiloa’i ai le vaega a le US Marines na malaga mai, le ‘au va’a i pailate ma latou soa fa’apea ma fitafita na atoa i ai le 55 o i latou, ma le tatou vaega fa’apitoa o le Pulega US Army Reserve i Tafuna. [ata: Leua Aiono Frost]

Susuga le ali’i Vetereni mai le US Marine Corp, Tusi Palaita Suiaunoa lea ua ia fa’afeiloa’ia le mamalu o fitafita na muamua lava o mai i tua mai va’alele sa malaga mai ai C-130. [ata: Leua Aiono Frost]

O le afiafi o le aso Lua na taunu’u ai i le Malaeva’alele i Tafuna le 6 va’alele a le US Marine Corp na malaga mai Ausetalia, lea sa fa’amautu i ai le latou misiona, ma uia Fiti, ae afea Samoa e momoe ai mo le po e tasi, ma utu ai latou va’a ona toe tu’ua lea o le teritori i le aso ananafi.

 

O ituaiga va’alele C-130 a le US Marines e lua na muamua tulaueleele fa’atasi ai ma fitafita e 55 e aofia ai ma ‘auva’a. So’o mai va’alele e 4 ituaiga MV-22 Osprey, o le fa’ato’a o’o mai lea o ituaiga va’alele i le teritori.

 

Matagofie le maimoaga i nei va’alele MV-22 Osprey i le taimi na tulaueleele mai ai. A o’o fo’i ina toe alu ese atu, e masi’i sa’o lava i luga mai le malae va’alele, se’ia lava le maualuga, ona fa’ato’a lele loa lea e pei o se va’alele.

 

E fa’amautu le malaga i Hawaii.

 

O le tamaita’i o Janet Utu Mulipola Suiaunoa o le Air Mobility Command i lana pisinisi o le Afio Mai Aviation sa ia fa’aalia, o lo’o tautuaina e i latou ituaiga faigamalaga nei a le Matagaluega o le Puipuiga o le Saogalemu a le Malo tele [Defense] lea e aofia ai ana vaega au uma, ma o ia fo’i lea e masani ona fa’auia i ai mana’oga fa’apitoa o le tatou falema’i tele ina ia sailia ni va’alele e avatu fa’atopetope ai i fafo nisi e fa’agasegasea tigaina.

 

Ua fa’ailoa e Suiaunoa, “Pe a mana’omia le tautua lenei, e mafai ona feso’ota’i mai lava le matou Ofisa i le Malaeva’alele nei, peita’i pe afai e malaga mai ni faigamalaga mai fafo, e muamua lava feso’ota’i ai le Tower a le Malo o Samoa i Faleolo i le matou telefoni i so’o se taimi o le ao ma le po, ina ia mautinoa ua nofouta i ai i matou nei, ae maise i va’alele uma lava a le Malo.”

 

TATALA ALOA’IA HOPE DIALYSIS - ASO FARAILE NEI

 

Ua mae’a tapena le tatalaga o le Falema’i Fa’amama Toto fou, le Hope Dialysis Center, i le aso Faraile nei. Peitai, ua fa’ailoa mai, o le a fa’ato’a amata ona talia le togafitiga o tagata gasegase i le vaiaso fou.

 

O le susuga le Pule Sili Chris Fischer na ia fa’ailoa mai, o le ali’i foma’i fa’apitoa o gasgase tau Fatuga’o Dr. Jean Letarte, o le a mafai ona amata va’aia gasegase ma fa’atino ana sueuega ma le vaaiga fa’apitoa o le toto e amata lelei i le vaiaso fou.

 

Pe a mae’a lea suesuega fa’apitoa ona fa’ato’a fa’atulaga loa lea o le taimi e fa’amama ai toto o i latou ua mae’a sailia o latou toto e le ali’i foma’i fa’apitoa. E le gata i lea o le a latou fa’atulaga fo’i ala o latou fa’atupega mo talavai e fa’aaoga i ai latou Medicare po’o latou inisiua ua mae’a i ai.

 

Ua tapena fo’i e le Hope Dialysis Center se isi ala o fesoasoani tau le tupe mo gasegase ua i ai le latou “The Kidney Fund” ua fa’atulaga mo le fa’amoemoe lea e fesoasoani i gasegase e totogia se vaega o le pili mo talavai.

 

O tautua ua mafai ona ofo mai e le Hope Dialysis Center i le taimi nei e aofia ai le suesuega lea o le toto ESRD [End stage Renal Desease] o tagata gasegase ua mae’a fa’atuaina e fa’amamaina o latou toto, ma e ao fo’i ona mua’i sainia e i latou ni konekarate mo le lua tausaga e latou te fa’aaogaina ai le tautua a le Hope Dialysis Center.

 

I le taimi nei e 12 nofoa ua mae’a fa’atutuina mo le togafitiga o tagata gasegase ma e lua sifi. O le taimi nei ua 48 tagata gasegase ua fa’atulaga o le amataga o lenei tautua.

 

Fa’ailoa e Fisher, “Pe afai o le a fa’ateleina le aofai o i latou e fia tautuaina atu e le Hope Dialysis Center, o le a fa’atulaga loa fo’i ma le lisi sifi lona tolu.”

 

Ua faailoa mai fo’i, ua mae’a fa’atulaga le tautua a le Medicaid ma le Medicare mai Hawaii e auai mai ia Setema 20, 2019 mo le fa’atinoga o le latou suesuega [CMS] muamua i le tatou falema’i nei, ma ua vala’auina fa’apitoa fo’i sui o le Malo e auai i lenei f’amoemoe, aua e $300,000. fo’i le sao o le tatou Malo i lenei galuega mai le fa’atupega a le American Samoa Venture Fund.

 

SI’ISI’I TAUTUA A LE FALETUPE ANZ AMERIKA SAMOA

 

Ua fa’ailoa e le Pule Sili o le Faletupe a le ANZ Guam Inc., le susuga Clarke Shaumann, i le taimi nei o lo’o ia asiasi mai fo’i i le tatou nei lala i Amerika Samoa ina ia fa’atalanoaina suiga tetele e ao ina si’itia atili ai le auaunaga ale tatou faletupe iinei.

 

O le lona tolu ai lenei o asiasiga i Amerika Samoa talu mai lona tofiga ia Setema 2018.

 

O nisi o mea ua amata ona si’itia o le tulaga lea o inivesi e fa’atautaia e le faletupe ANZ Guam Inc. i Amerika Samoa, ma e aoga tele lea i le tulaga o feuiuiaiga o tautua eseese a le faletupe mo tagata o i ai a latou teugatupe i luga o laina tafa’ilagi

 

Sa ia fa’ailoa, “E le na’o na sau le ANZ e avatu tupe a le atunuu, ae o lo’o i ai fo’i lona sao i ala e valu ua latou fa’atautaia ai pisinisi iinei, ina ia fa’asaoina ai tupe a le mamalu lautele o tagata o loo avea ma latou pa’aga fa’apisinisi.”

 

ARCHIE SOLIAI - KONESULA FAAMALUMALU O KOREA

 

O le tofa Taotasi Archie Soliai ua avea ma Konesula Fa’amalumalu o Korea i Saute i Amerika Samoa nei, o lea tofiga sa tula’i mai ai le afioga le Aloali’i Afoa Moega Lutu se’ia o’o mai i le tausaga na te’a nei.

 

O Taotasi na tofia mai e le Konesula o Hawaii Choon-goo Kim lea na malaga mai i le teritori e na te fa’ataunuuina lea tofiga. Sa maua fo’i sona avanoa e feiloa’i ai ma Kovana Lolo Moliga ma le ali’i Loia Sili Talauega Eliasaro Ale.

 

Na fa’atautoina Taotasi mo lona lea tofiga i le aso Lulu, Setema 11, 2019 ma sa auai i lea sauniga mamalu le alii Konesula o Korea i Hawaii Kim, Song ma nisi o le auaiga fo’i o le susuga Soli’ai.

 

Ua fa’ailoa e Taotasi, “O lenei tofiga e mautinoa ose fa’amanuiaga ae o se tautua fo’i e tatau ona fa’atino ma le fa’aeteete. Ou te taliaina ma le fa’afetai lenei tofiga ua avea ai lo’u sui fa’atauva’a ma se konesula o le malo fa’a-Ripapilikana o Korea i Amerika Samoa. O se avanoa fo’i e tautuaina ai malo e lua, i a latou so’otaga e afua mai ona tagatanu’u se’ia o’o i matau fa’avaomalo. O se tautua fo’i e ao ina matua fa’atino ma le loto atoa ina ia saogalemu lea so’otaga i malo na lua, o tiute fo’i e fa’atino e ao na sologa lelei ma talafeagai ma aiaiga ua tamau i le feagaiga ua osia i le va o malo e lua.”