Ads by Google Ads by Google

Tala I Vaifanua

PASIA E LE US-EPA LE POTU SUESUE O LE SUAVAI A LE ASEPA UTULEI:

 

Ua mae’a pasia nei le Potu Su’esu’e fa’apitoa mo le Suavai a le Matagaluega o le ASEPA le isi tolu tausaga e fa’aauau ai galuega suesue o le suavai ina ia mautinoa le tulaga mama ma agava’a mo le inumia e le mamalu lautele o le atunu’u. O lea pasiga na fa’atautaia e le Ofisa o le USEPA Region 9.

 

O le tama’ita’i suesue o Amy Wagner sa ia fa’atautaia lea suesuega i le potu suesue o le suavai a le ASEPA, ma ua agava’a nei lea potu suesue o le suavai e tusa o aiaiga uma a le USEPA Region 9.

 

Ua fa’ailoa mai e tolu lelei aso o fa’atautaia nei sailiiliga maumaua’i a le Wagner i le masina o Iuni 2019 ma ua toe siakia lelei ai fo’i ma le ala o loo sailia ai e le Potu Suesue atoa lea le tulaga mama o le tatou suavai taumafa. E tolu vaega na sailia ma ua faapea fo’i ona pasia uma nei vaega e tolu: Standard Operation Procedures; Quality Assurance ma le Quality Control.

 

E le gata ona sailiilia uma nei vaega e tolu, ae ua taga’i toto’a fo’i o ia i fa’amaumauga uma o galuega sa fa’atino e i latou o lo’o sailia le tulaga mama o le tatou suavai, atoa ai ma latou fa’ai’uga sa fa’atulaga mai ai ona latou suesuega sa fa’atino. Na sailia fo’i mea faigaluega uma i lea potu suesue, ma le tulaga agava’a e fa’atautaia ai suesuega lelei mo le suavai taumafa. O le toe vaega lava, o le va’ai toto’a lea o Wagner i fa’aiuga na faia e le vasega o e na faigaluega e sailia le suavai, pe mata o manino ia i latou a latou sailiga, suesuega ma fa’aiuga e ao ina fa’amalosia mo le lautele e tusa o le fa’aaogaina o le suavai, pe o le taofia lea e le tatau ona fa’aaogaina pea le suavai mama.

 

I IulI 26, 2019 na fa’amatu’u mai ai loa e le US-EPA le latou fa’atagaga e ao ina fa’aauau pea galuega a le AS-EPA Laboratory e sailia ai le tulaga mama o le suavai taumafa i totonu o Amerika Samoa.

 

Ua latou taua’aoina mai fo’i e latou fa’atagaga atoatoa ina ia fa’aaogaina e le Potu Suesue o le Suavai a le ASEPA le ala e ta’ua o le Colliert Procedure e sailia ai siama nini’i i le suavai taumafa mo le atunu’u.

 

Ua fa’ailoa fo’i la le agaga fa’agae’etia o le susuga le Fa’atonu Fa’amao Asalele Jr. ina ua mafai ona pasia a’ia’i e le latou Potu Suesue mo le Suavai lea suesuega a le USEPA.

 

Ua ia fa’ailoa mai, “E taua tele lenei suesuega a le USEPA i le matou potu suesue lea, aua e siakia faatasi mea faigaluega, o ala na fa’atino ai suesuega, o mea na faaaogaina, ae toe silia ma galuega na fa’atino mai lenei foi tele o tausaga ua tuanai, ina ia mataituina ai le agava’a lenei mo le lumana’i i sui faigaluega o loo fa’aautu i ai le galuega lea, atoa ma latou fa’amaumauga uma, ma fa’aiuga sa faia i a latou suesuega na maua mai le faitauina o le agava’a o le suavai taumafa o le atunuu.”

 

“E ao ina mautinoa, o a latou fa’aiuga fo’i e fa’ailoa atu ai i le USEPA lo latou agava’a i le galuega o feagai ma i latou.”

 

O le galuega a lea aufaigaluega i le potu suesue a le tatou suavai a le ASEPA, e latou te aoina mai le suavai mai so’o se paipa o lo’o ta’ia mai ai le suavai taumafa i le atunuu atoa ma latou suesueina. Afai fo’i o le a fa’ao’o atu se fa’asea a nisi o le atunu’u i le latou Ofisa ona o lo’o palapala le suavai o loo ki mai a latou paipa vai a le ASPA, o iina fo’i e fa’atautaia ai e i latou se suesuega i lea nu’u atoa o lo’o fa’ailoa mai e le mamalu lautele lea fa’afitauli.

 

Afai e mae’a ona latou faia se suesuega mae’ae’a lea, ona latou fa’amauina lea i a latou tusi mo sailiga nei a le USEPA ma latou faila foi ina ia faia fa’atatau i ai latou fautuaga i le mamalu lautele o le atunuu i le tulaga inumia, pe taofia, pe fa’apupuna fo’i le suavai a’o le’i inumia.

 

Ua le gata ai na’o paipa o le suavai e sailia e i latou, ae aofia ai foi auvai, vaitafe ma le suasami fo’i o lo’o matele ina ta’e’ele ai le mamalu lautele o le atunu’u. O le ala fo’i lea e fa’alauiloa ai lava e le ASEPA le tele o a latou fa’asalalauga fa’alaua’itele i tulaga o le mamao le suavai i nofoaga ma matafaga eseese o le atunu’u, fa’apea ma vaitafe ma suavai taumafa mai paipa vai a le ASPA.

 

Pe afai fo’i la e silafia e so’o se tasi o le mamalu lautele ua palapala atu le suavai o lo’o ta’ia atu i paipa suavai mama a le ASPA i lou maota, e ao lava ina lipotia i le ASEPA mo le latou galuega fa’atino, ina ia mautinoa lelei, e le afaina se soifua o nisi e to’atele ona ua inumia le suavai palapala.

 

FA’ASALA LE STAR KIST I LE “$100MILIONA” - AUAUFAATASI FETU’UNA’I TAU O OLOA:

 

Ona ua fa’amaonia le auaufaatasi ai o le StarKist & Co. ina ia fetuuna’ia tau o oloa fa’atau atu i totonu o Amerika, o lea ua fa’amaonia ai le latou sala tupe e $100miliona e ao ina totogia i le isi lima tausaga o lumanai.

 

O le Star Kist o le isi lea kamupani na tolu i ai kamupani Tu’uapa I’a tetele sa latou auaufa’atasi e fa’ataunu’u lea soligatulafono.

 

Na fa’atuai ona fa’amautu mai lea sala tupe e ao ina totogia e le StarKist ona sa toe tau fetuuna’i e tatalia ai nisi o fa’asea sa fa’aulu mai Pittsburg, Pennsylvania ma le Matagaluega o le Fa’amasinoga a le Malo tele, e toe aiaia ai le aofaiga o le sala tupe e gafatia ona totogia e le Star Kist mo lea soligatulafono. Peita’i ua fa’ai’u nei ma ua tu’uina mai e le ali’i fa’amasino, Edward Chen, e gafatia e le Star Kist ona totogia le $100miliona. Na filifili le ali’i fa’amasino i le sala tupe e afua mai le $50miliona se’ia o’o i le $100miliona.

 

O le totogia o lea sala e amata mai i le peimeni muamua e $5miliona e tatau ona totogia ae le’i mae’a le 30 aso talu ona tuuina mai lea fa’asalaga e le ali’i fa’amasino. Peita’i o le 2020, e tatau ai ona mae’a totogia e le Star Kist le isi $11miliona, ae soso’o loa ma le ta’i $24miliona mai le tausaga 2021 se’ia o’o i le 2024 ma mae’a ai lea sala tupe. E leai se tupe fa’asili e totogia e le Kamupani mo le vaega o totoe e ao ina totogia mai lea tausaga i lea tausaga o le fa’asalaga lea.

 

O le a nofo va’ava’aia fo’i le Kamupani I’a lenei mo le isi 13 masina a’o fa’agasolo le totogia o lana sala tupe lea.

 

O le saunoaga ale alii faamasino e tusa ai o le talosaga a le Star Kist ina ia fa’aitiitia le latou sala mai le $100miliona i le $50miliona, e le’i fa’aalia patino mai e le Star Kist nisi mea e ao ai ona talitonuina e le Fa’amasinoga e latou te le gafatia totogi le sala e $100miliona. Peitai, ina ua ia taga’i atu i le tele o aseta a le Kamupani lenei, atoa ai ma le aga’i i luga o lana tupe mama e maua fa’aletausaga, e agava’a ai i latou mo le totogia o le sala $100miliona.

 

I le masina o Aukuso 2019 na fautuaina ai e le Fa’amasino Edward Chen vaega e lua o le fa’amasinoga lea, le itu tagi ma le Star Kist, ina ia feutagai i la’ua pe fia le sala e tatau ma agava’a ona totogia e le Star Kist aua o lea ua faamaonia le solitulafono a le Star Kist.

 

Ona ua taua’aoina le mua’i fa’aiuga a le fa’amasinoga e totogia e le Star Kist le $100miliona o lana sala, sa toe talosaga le Star Kist, afai e totogia e i latou lea sala, e ono tapunia ai le Star Kist ona ua tele na’ua lea sala mo i latou.Aua e ese mai lea sala i le Matagaluega o Fa’amasinoga, a e o lo’o i ai fo’i isi pili a le Star Kist e totogia i ana kamupani na a’afia i lea soligatulafono, ua fa’amaonia fo’i e ta’usalaina ai i latou ma o le aotelega o ia pili e tusa ma le $518miliona, e totogia fo’i e i latou.

 

Peita’i, na fa’ailoa e le ali’i loia mo le Matagaluega o Fa’amasinoga a le Malo tele, Andrew Mast, sa ia fa’ailoa ai, “E le o aofia nei pili e totogia i kamupani ua a’afia i le soligatulafono a le Star Kist ua fa’atino, i le latou talosaga e fa’aitiitia le sala tupe e totogia i le DOJ a le Star Kist.”

 

“Peita’i, o lo’o ua i ai fa’amaumauga i luma o le afioga le Fa’amasino e mafai ai ona fa’amaonia lana fa’aiuga e ao ina faia i le sala ua fa’atulaga mo le Star Kist e totogia, toe totogi ma isi ana sala i kamupani ua a’afia i lana soligatulafono.” O se toe fa’aaliga lea a Andrew Mast e tusa o lea talosaga a le Star Kist.

 

I le toe iloiloga lea na faia tonu ia Setema 11, 2019 na tula’i ai le susuga Scott Meece, le loia na tula’i mo le Star Kist ma ia fa’ailoa atu, “O loo fa’ailoa atu e le Star Kist le a’afiaga o loo feagai ma le 2,600 o tagata faigaluega a le Star Kist i Amerika, ua le mautinoa le lumana’i o latou olaga galulue pe afai o le a le gafatia e le Star Kist ona fa’aauau ana galuega ona ua le gafatia ona totogia le sala tupe ua fa’atulaga mai, fa’atasi ai ma le fa’agaoioia pea o le kamupani i ana pisinisi masani, ma totogi fo’i ma pili i isi kamupani ua a’afia fo’i i lenei soligatulafono ua faamaonia nei.”

 

“Ua loa fo’i o fesiligia pea e nei to’atele o tagata faigaluega se lumana’i o latou olaga galulue i le Star Kist. O le to’atele o i latou o lo’o fa’amoemoe tasi i nei avanoa faigaluega e tausia ai o latou aiga.”

 

Ua ia fa'ailoa mai foi, “E pau le mea e i’u ina faia e i latou, o le vaea lea o ni avanoa faigaluega mo nisi o le aufaigaluega pe o le a motusia loa le toe fa’atautaia o le Star Kist i Amerika Samoa ae fa’aaoga mai na’o le latou lala i Thailand.”

 

O lana toe saunoaga sa ia fa’ailoa manino atu ai i le ali’i fa’amasino, “E le o i ai se fa’amoemoega ina ia le afaina avanoa faigaluega mo le aufaigaluega ua mae’a fa’afaigaluegaina i lenei vaitaimi, ae ua na’o se popolega lava ia te a’u i le taimi nei lea ua fa’ailoa manino atu.”

 

Ina ia taua’aoina mai se ala e alagatatau ma le tulafono ua fa’atino e le Star Kist ma ua fa’amaonia fo’i e le fa’amasinoga, ua faailoa mai e ao ina amata mai le sala i le $100miliona, ona mafai lea e le fa’amasinoga ona toe tu’utu’u teisi i lalo le sala pe afai o le a fa’amaonia ma mautu le popolega o lo’o ua fa’aalia e le pulega ale Star Kist e afua ai ona faigata totogi e i latou lea tinoitupe.

 

“Pe a o’o ina faigata ona gafatia e le Star Kist ona totogi le $100miliona lea, e mafai ona toe fa’aulu mai le latou talosaga e tusa ai o latou popolega nei ua fa’ailoa mai, ma o iina foi e fa’ato’a mafai ai ona tu’u mai i lalo le latou sala tupe e le fa’amasinoga.”

 

O aseta uma sa fa’ailo mai a le Star Kist i le suesuega sa faia e le DOJ, ua iloga mai ai e $250miliona le malosi’aga o le Kamupani o i ai, e mafai ai ona latou totogia le sala tupe e $100miliona. Peita’i o le isi $155miliona o nei aseta o lo’o fa’amautu mai lea i le Kamupani o le Techpack Solutions lea e fa’atautaia fo’i e i latou e ona le Star Kist i le taimi nei, le South Korea Dongwong Enterprise. Peita’i e le o mafai ona fa’atau ese atu e le Dongwong Enterprise le Techpack Solutions i le taimi nei.

 

TAUSAILIA PE I AI SE OFAGA O PEPE I SAMOA - PALAULI I SAVAII?

 

Ua fa’alauiloa fa’alaua’itele mai i se fa’asalalauga i ala o feso’ota’iga a le Facebook se taumafaiga ina ia sailia pe i ai nisi mai le afio’aga o Paulauli i Savaii e sogasoga lona mafaufau ma fia auai i le sailiga lea ua aga atu i ai le susuga Greg Paulson ma Tony Brunt, o nisi e iloga a la’ua fa’amaumauga o mea ua leva na tutupu mai i totonu o le atu Samoa.

 

O Greg Paulson, o se ali’i Peace Corp, sa malaga mai i Samoa ina ia avea ma faia’oga i a’oga ma e le totogia e le Malo, ae totogia mai lava i Amerika, e tali tutusa lelei ma le Polokalama a le World Teach lea fo’i sa fesoasoani mai i le atou ASDOE, ma ua motusia lea polokalama mo lenei tausaga a’oga.

 

O ituaiga pepe lea e ta’atele i Samoa e lanumoli e togitogi uliuli o latou lanu ma ua fa’aigoaina o le Monarch Butterflies. O ituaiga pepe la nei sa matauina e Greg Paulson i se latou savaliga e asa atu ai le vaomatua o Palauli se latou ofaga o pepe, ma ia pu’ea ai le ata.

 

Lea ua toe fafagu mai lana suesuega i lenei vaitau, ma ua fa’ailoa ai, e ala i fa’amaumauga, e ta’i 40 tausaga ma ofaga fa’apei o le ata lea, le aotelega o pepe i so’o se vaomatua e i ai la’au fa’apitoa e foliga mai inu pe miti’ia mai ai e pepe nei le sua suamalie, e tali tutusa ma latou mea’ai mai fuga o la’au.

 

Ua fa’amauina mai e Greg Paulson ia fepuari 24, 1979, sa ia matauina ai lea mea uiga ese i le vaomatua e latalata lava i le vaitafe o Palauli, ma e tusa ma le 30-60minute le umi o le taimi na ia latou savalia ai le vaomatua, ae latou tau atu loa i le nofoaga tonu lea e ofaga i ai pepe nei.

 

“Ua foliga mai le ogala’au ma lau o le la’au ua lanumoli uma mai ona o le lanu o pepe ua ofaga uma i ai, ae foliga mai o lo’o latou taumafai e miti’ia mai le sua o le ogala’au atoa e o’o i ona lala.”

 

Ona o suesuega fa’amaumau o nei ituaiga o pepe, ua mafai ona mautinoa ai e toe ofaga pepe nei ta’i tausaga. O lea ua manatu ai Greg e toe sau lava i Samoa e fia asia lea nofoaga sa ia mua’i va’aia ai lea va’aiga matagofie.

 

Afai o i ai se isi o le afio’aga o Palauli e fia auai fa’atasi ma Tony Brunt ma Greg Paulson i lenei galuega lelei mo le si’omaga, e mafai ona feso’ota’i ia Tony Brunt i luga o upega tafa’ilagi a le Facebook, ma maua ai se so’otaga ma i la’ua.

 

O Fepuari 2020 lea ua manana’o ai i la’ua nei e fa’atino lea asiasiga i le nofoaga o Ofaga o Pepe i Palauli.